Read berom Susumo 22 Bible Online

Susumo 22 - berom bible

Susumo 22

¹E bamâ pyɛ́ yane, Dagwi a mara Abraham. A yang ɛ, “À Abraham!” Abraham a ye, “Me à womo.”

²Dagwi a yang ɛ, “Jut sɔ mō gwining wane mo, Yishak, de hwà vɔk ɛ̀ yey, na hwo kyè vɔk e vwêl Mɔriya. E hwomo hwà rɔda nára hɛ pyɛ rangas vey na me e rahwol hwak de ma rɔda dura a hwo.”

³Abraham a sogo bop nagasi, a tɛ̀ a madung mɛ wap, a jut bemât fwom mɛ beba tanga yɛ na sɔ mɛ Yishak. A vugus cɔ́gɔt yaga rangâs pyɛ́, a kaba gwong vɔk e kwɔn de Dagwi á kana há a yɛ.

⁴E pɔlɔ hê tat, Abraham a ye ganga, ko a di kwɔn o ha rɔngɔl yikyik tyɔng.

⁵A yâng bemât fwom mɛ, “Yin ka gyeng e ngamo na madung. Me na sɔ hom, wot e kyè vɔk e hwol gwɔrɔ, na wot wɔ̀ re a Dagwi fongol, ko wot e to toyo ba sɛ̀ in.”

⁶A jut cɔ́gɔt yaga rangâs pyɛ, a tos a sɔ mɛ yɛ̄, ko yɛ pyɛ mɛ a jut dyam-kya tanga bá. Yɛn beba ba kyè.

⁷Ko Yishak a yâng da mɛ, “À da.” A ye, “Ey, à hwey hom.” Hwey ha ye, “Di, dyam-kya na cɔ́gɔt, ko vyel de wot e yɛrɛ a yɛ̌ arɛt?”

⁸Abraham a yang ɛ, “À hwey hom, Dagwi pyɛ mɛ e nɔng vyel o.” Ko yɛn beba ba re nuyel na kwɛngɛl.

⁹Yɛn a pom e kwɔn de Dagwi á kana ha a Abraham. Abraham a yong gàgbang nɔrɔ pyɛ mo e hwomo, a ngyɛrɛ cɔ́gɔt o. A rɔgɔs sɔ mɛ Yishak, a lasha hɛ e ra kwɔn o, e ra rak cɔ́gɔt o.

¹⁰A jut ba e vwɔ mɛ, na a yɛrɛ mɛ sɔ mɛ.

¹¹Ko tom-lagwî Dagwi Darwey a yila hɛ yi e lagwi, a ye, “À Abraham! À Abraham!” Abraham a hanat, a ye, “Me à womo.”

¹²Ko tom-lagwi o a yang ɛ, “Hwo kwon tɛ̀ vwɔ mō e ra wen o wɛt! Hwo kwon ra a yɛ pyɛ cak wɛt! A remo ma tɔk, hwó wok bengyip Dagwi, yaga hwà ro na hwey mō hining na me wɛt.”

¹³Abraham a ye ganga, ko a di turuk gwining[37] de ngɛngɛ̂ wɛ ba kyɛ́ ɛn e sɔ̂s rɔgɔ. A kyè a wɔ̀ jut turuk o, a nára wɛ pyɛ rangas vɔk na Dagwi e tô hwey mɛ.

¹⁴Ko a vo a kwɔn o rezâ “Dagwi a ga yong ɛ.” Ko vey e jeng yemo bemat be tē, “E ra rakû Dagwi Darwey e yong ɛ.”

¹⁵Tom-lagwî Dagwi Darwey a to yila Abraham yi e lagwi, yila he neba,

¹⁶a ye, “Me, Dagwi Darwey, ma sé sira na reza hom: ma rɔda tɛ̀ a hwo nerat, yaga hwà wok fwɔ hom, ko hwà ró mɛ̀ na hwey mō hining o wɛt. Mê tɛ̀ yére mō ye gwɛ̌ hɛ pyak sede netangacɛ̂n lagwi, sede bazɛk e vwarâ gworep. Yére mō yê re bemât repugu mɛn, ko be sey ɛ bapomo mɛn.

¹⁸Mwa yére bemasi e jey yê ra won, na me tɛ̀ nerat e ra yɛ̄, sede remo de ma tɛ̀ nerat e ra yére mō, yaga hwà wok fwɔ hom.”

¹⁹E bama mo, Abraham a toyo na bemât fwom mɛ, ko yɛn mwa ba vo gwong vɔk e Bɛɛr-Sheba. Abraham a sangal e Bɛɛr-Sheba.

²⁰E bamâ pyɛ́ yemo, ba ha a Abraham wɔgɔ, Milka a ga tɔ a gwa mɛ Nahor nèy:

²¹nɛ à Us, hwêy yel, na Bus, gwà mɛ, na Kɛmwɛl, dâ Aram,

²²na Kɛsɛt, na Hazo, na Pildash, na Yidlap tanga Bɛtuwɛl, dâ Rɛbɛka. Yɛn rwit vemo mo, neng mɛn Milka a tɔs a Nahor, gwà Abraham.

²⁴Ko jɛn-hwā mɛ de reza mɛ à Rɛyuma a tɔ Teba, na Gaham, na Tahash tanga Maaka.