Read berom Susumo 23 Bible Online

Susumo 23 - berom bible

Susumo 23

¹Sara, hwâ Abraham, a vɔk neshey naga na kuru baba na nɛ netaama (127) e jey.

²A ku e pomô Kiriyat-Arba, de be tâng hɛ, à Hɛbrɔn a remo, e sevwêl Kanaan. Abraham a lashe yey mɛ, a tosho Sara.

³A hwo hala revîn hwā mɛ, a wɔ́ na BeHiti, a yang ɛn,

⁴“Ma sé kwɛnɛt e sangal e ngamo e ji min. Row a me hin kwɔn de hê tɛ́ ɛ nap, na me lɛrɛ ɛ hwā hom, na me gas me na revin mɛ.”

⁵BeHiti ba toyo a Abraham, ba ye,

⁶“Wok ot, à darwey! Hwà sé mwat e ji mot de Dagwi a ga nɔng o reto na nerey. Lɛrɛ hwā mō e ji kwɔn de ha dal na nerat de wot a vɔk. Vit a hwak e ji mot de a rɔda ró mɛ a hwo na kwɔn mɛ, yaga na hwo lɛrɛ ɛ hwā mō.”

⁷Abraham a sogo, a ye a BeHiti, bedâ vwel o, guduruk,

⁸ko a yang ɛn, “Ka sede yin a simo, na me lɛrɛ hwā hom, na me gas me na revin mɛ, ko tik na yin wok me. Ra in a me won na Ɛfrɔn Zohar,

⁹na yɛ a nɔng me fwara mɛ, de gwa sé e Makpɛla, wɔ̀ sɛ̀ yɛnɛ̂ cwɛl mɛ. Rangal hin hɛ, na yɛ a row a me kwɔn o e bayis min, e mwa dyām de kwɔn o ha kaba, na he tɛ́ ɛ kwɔ̂n besak hom.”

¹⁰E jeng yane mo, Ɛfrɔn á sè e sangal e kwɔn o tanga bwang BeHiti mo. A toyo a Abraham e wôk bemat mwa de ba sé e dúra e rwi yel e ji pomo mo, a ye,

¹¹“À darwey hom, wok me! Ma nɔng o cwɛl o tanga fwara de gwa sé e ji gwɛ. E nuyêl bemat hom, ma nɔng o gwɛ, na hwo lɛrɛ ɛ hwā mō.”

¹²Abraham a to ye guduruk e nuyêl bedâ vwel o,

¹³a yâng Ɛfrɔn e wok mɛn mwa, “Ka hwà yâng simo hwo wok me, mê tala dyām yaga cwɛl o. Hwo sey yɛ̄ yi e vwɔ hom, yaga na me bin lɛrɛ ɛ̀ hwā hom e hwomo.”

¹⁴Ɛfrɔn a toyo a Abraham, a ye,

¹⁵“À darwey hom, wok me! Yaga kekwɔn de ka sé e ra shɛkɛl dyam pyɛng[38] naga benaas (400) zɔng, ko ka vey sɛ́ e tē hom na hwo arɛt? Lɛrɛ ɛ̀ hwā mō zɔng.”

¹⁶Abraham a simo, ko a masa a Ɛfrɔn dyam pyɛng tyɛng na pyɛ de a ha e betong BeHiti: shɛkɛl naga benaas (400) tyɛng na masa de bejik bá ra e jeng o.

¹⁷Ano de cwɛl de gwa kana sé gwô Ɛfrɔn e Makpɛla, e rwa rak na Mamrɛ, gwa tɛ́ ɛ gwô Abraham. Gwa wuna na fwara de gwa sé e ji gwɛ, na mwa batîn cɔ́gɔt de ya sé vɔk e yɛnɛ̂ nerêy cwɛl o mwa.

¹⁸Ba nɔ̂ng Abraham, na gwo tɛ́ ɛ mwɛ. Ba ra pyɛ́ yane mo e nuyêl mwa BeHiti de ba sé e kwɔ̂n tula mo.

¹⁹Ano kwong, Abraham a lɛrɛ hwā mɛ Sara e fwara de gwa sé e cwɛ̂l Makpɛla, e rwa rak na Mamrɛ — hɛ à Hɛbrɔn a remo — e ji sevwêl Kanaan.

²⁰Ano de cwɛl o, na fwara de gwa sé e ji gwɛ, de gwa kana sé gwô BeHiti, gwa tɛ́ ɛ nap Abraham yaga kwɔ̂n besak mɛ.