Read berom Susumo 24 Bible Online

Susumo 24 - berom bible

Susumo 24

¹Abraham a ga kwop, a ga vɛ́ neshey, Dagwi Darwey kwong a ga tɛ̀ a yɛ nerat e ji kayɛ pyɛ de a ra.

²Tuhak, Abraham a yila mwât fwom mɛ, womo de a dal na ros e ji lɔ mɛ, ko e yɛ wɛ de a vɔk nedirîk bɛrɛng lɔ mo mwa, a yang ɛ, “Tɛ̀ vwɔ mō e sɔ̂s tà hom,

³na hwo sira a me na rezâ Dagwi Darwey, yɛ Dagwi wo lagwi tanga jey. Sira a me wɔgɔ, hwà rɔda vo a hwey hom hwā e ji behwông BeKanaan vemo de ma sé sangal e ji mɛn wɛt.

⁴Ko hwà rɔda kyè vɔk e sevwel hom, na hwo vo a hwey hom Yishak hwā yi e ji cáng hom.”

⁵Ko mwât fwom o a toyo a yɛ, a ye, “Ka gyeng hwong o a simo, na a raa me vey e sevwel semo wɛt ɛ? Ko e tɛ́ ɛ gbing-gbing, na me toyo na hwey mō vɔk e sevwel de hwà yi ɛ a?”

⁶Ko Abraham a yang ɛ, “Kée kɛ́! Hwo toyo na hwey hom e hwomo ko tyɔng wɛt!

⁷Dagwi Darwey, Dagwî lagwi, a pat me yi e lɔ da hom, tanga yi e sevwêl cáng hom, ko a sira hɛ mwin, yɛ e nɔ̂ng yére hom sevwel semo. Yɛ a rɔda tomo tom-lagwi mɛ e nuyel mō, na hwo sɛ̀ hwā e hwomo yaga sɔ hom.

⁸Ko ka sede hwong o a simo na a raa hwo wɛt, ko hwà ga pat tó mō yi e sira hemo. Ko de hwo kwon toyo na sɔ hom vɔk e hwomo wɛt!”

⁹Ano kwong, mwât fwom o a tɛ̀ vwɔ mɛ e sɔ̂s tà Abraham, dalɔ mɛ, ko a sira a yɛ, e ra pyɛ de a ha.

¹⁰A vɛ̂ bemaryat kuru yi e ji vê dalɔ mɛ. A jut yi e ji pyɛ̂ dalɔ mɛ de ya dal na nerat, a vɔk yaga râ nɔrɔ. A kaba gwông Mɛsɔpɔtamya-Bato vɔk e repomo de belɔ Nahor ba sé na sangal.

¹¹Jeng de a wul, ko a tɛ̀ bemaryat be dyɛng e vwel e vwâ hwes de gwa sé e mâ repomo. À sè e rwa nawiri, jeng a yane de beha be nunus wɔ̀ vos nshi.

¹²A hwo ra won, a ye, “À Dagwi Darwey, Dagwî dalɔ hom Abraham, nɔng me wɛng yunung, na hwo dura nerat mō vɔk na dalɔ hom!”

¹³Di, me a womo e nû hwes, e kwɔn de behwông pomo be vɛ̀sɛ vos nshi.

¹⁴Mê yâng gwining e ji mɛn, “Ka hwà simo, lol tsung mō, na hwo nɔng me nshî sɔ. Ka sede e ye, ‘Sɔ, ko ma rɔda to nɔ̂ng bemaryat mō arɔng’, ko tik na a se e yɛ wɛ de hwà kasa yaga mwât fwom mō Yishak. Yi ano ma rɔda tɔk, hwà sila pyɛ de dalɔ hom e simo.”

¹⁵Gyam a rɔ̌ nà bang nu, ko hwong hwak de ba tang ɛ à Rɛbɛka a vɛ̌ yi na tsung mɛ e ra sanat. Da mɛ à Bɛtuwɛl, de neng-gwɔ mɛ à Milka, hwâ Nahor, gwà Abraham.

¹⁶A sé hwong o zɛrɛ mo e ryat wɛt, ko a kana man na rwas wɛt. A gyirik vɔk e kwɔ̂n vô nshi, a vɛ nshi mo, a sé to ɛ,

¹⁷ko mwât fwôm Abraham a tele wɔ̀ man na yɛ, a yang ɛ, “Ka hwà simo, nɔt me kenshi, na me sɔ.”

¹⁸Hwong o a ye, “Ey, nā sɔ, à da!” Ko a lol tsung o ziri, a kaba a yɛ wɛ na vo mɛ, ko a sɔ.

¹⁹Bama de a ga sɔ, ko hwong o a ye, “Ma rɔda wɔ vo nshi yaga bemaryat mō arɔng, na yɛn be sɔ pyɛ de yê vey a yɛn.”

²⁰Remo-remo a shusha bwâng nshi mo e revû sɔ̂ nshî yas, a nára hɛ vɔk e hwes, a to wɔ̀ vo nshi yaga bemaryât sa mó mwa.

²¹Mwat o a tɛ̀ bayis mɛ yuu e ra hwong o, e tɔrɔng e yey mɛ, kɛ Dagwi Darwey a ga nɔng ɛ wɛng e kwɛngɛl mɛ, kɛ wey arɛt?

²²Jeng de bemaryat ba ga yɛnɛ sɔ̂ nshi, mwat o a jut yɔbɔ̂ dyam shinang de ya vɔk dyām pyak, a tɛ̀ a hwong o e wol. A to jut nerwěy neba nedirik o de ba yong nɛ na wɔnɔ dyam shinang, a tɛ̀ a hwong o e vɔ mɛ.

²³A ye, “Hwà sé hwông lɔ wa arɛt? Kwɔ̂n pɔlɔ hê sɛ̀ e lɔ da mō, de me na bemat hom wot e pɔl ɛ bɛ?”

²⁴Hwong o a yang ɛ, “Da hom à Bɛtuwɛl, hwey de Milka a tɔ a Nahor.”

²⁵Ko a to ye, “Wot a vɔk pyɛ̂ rê yas pyak mwa na kwɔ̂n dyɛngɛ̂ yɛ. Kwɔ̂n pɔlɔ ha to sé yaga bekɛnɛt arɔng.”

²⁶Ko mwat o a ye guduruk, a re a Dagwi Darwey fongol.

²⁷A ye, “Ma feng à Dagwi Darwey, Dagwî dalɔ hom Abraham! Hwà sila sira mō vɔk na dalɔ hom, ko hwà nɔng ɛ pyɛ de a simo. Ko me, hwà ga kyè na me taltal e begwong pere vey e lɔ begwa dalɔ hom.”

²⁸Ko hwong o a dari vɔk e duk neng-gwɔ mɛ, a ha a yɛn pyɛ́ mwa.

²⁹Rɛbɛka mo a vɔk gwà mɛ de ba tang ɛ, à Laban. Jeng de Laban o a di yɔbɔ̂ wol tanga nerwěy e bègasɔ gwà mɛ, a to wok ha de mwat o a ha a Rɛbɛka, ko a vo gwong ziri, a kyè vɔk e hwes. E hwomo, a sɛ̀ mwat o e tumal e hagât bemaryat bagat na hwes o.

³⁰

³¹A yang ɛ, “Var, à sa hom, vɔk e lɔ, hwo de Dagwi Darwey a ga tɛ̀ a hwo nerat! Yaga sɛ́ de hwô nàra e majey arɛt? Ma ga kana yong duk yaga hwo e ji lɔ hom, ko kwɔn ha sé yaga bemaryat mō.”

³²Ano kwong, mwât fwom o a yel e ji lɔ mo, ko Laban a tɛ̀, be lol pyɛ̂ bemaryat, ba nɔ̂ng vɛ pyɛ́ na kwɔ̂n dyɛngɛ, na be vey a mwat o na nshi, na a kus mɛ bol, yɛ tanga vemo de ba sé na yɛ.

³³Ko jeng de ba vey a yɛ na pyɛ̂ re, a ye, “Ma rɔda re wɛt, sɛ̌ ma tānga ha pyɛ de ya vey na me e ngyen.” Laban a yang ɛ, “Ko, ci ha!”

³⁴Mwat o a hwo ha, a ye, “Ma sé mwât fwôm Abraham.

³⁵Dagwi Darwey a ga tɛ̀ a dalɔ hom nerat sizɔng, a ga tɛ́ ɛ gbɔng darwey. A ga nɔng ɛ karâ vyēl pyɛng na vyēl shi, na berɔndɔng, na dyam pyɛng, na dyam shinang, na besam beras na beha, tanga bemaryat, na bemadung.

³⁶Ko Sara, hwâ dalɔ hom, a tɔ a yɛ hwey wen e jeng de a ga kana kwop, ko a ga nɔ̂ng hwey o kayɛ pyɛ de a vɔk.

³⁷Ko di, dalɔ hom o a tɛ̀, me sira, ma rɔda ra a sɔ mɛ weneng e ji behwông BeKanaan, vemo de a sé sangal e sevwel mɛn, wɛt.

³⁸A tomo me vɔk e lɔ da mɛ na cáng mɛ, na me vɔ a sɔ mɛ hwā e hwomo.

³⁹Ko ma yang ɛ, ‘Ka gyeng hwong o e simo a raa me wɛt.’

⁴⁰Ko a toyo a me, a ye, ‘Dagwi Darwey, de me gyeng ha mɛ jojot, a rɔda tomo tom-lagwi mɛ tanga me, a rɔda nɔng me wɛng e kwɛngɛl o. Ko ma rɔda vo a sɔ me hwā e ji cáng mɛ, yi e lɔ da mɛ.

⁴¹Ano zɔng de mê hywit me yi e sira mɛ, ka sede yɛn a nɔng me hwā mo wɛt, ko sira mɛ hê kaba me wɛt.’

⁴²“Yunung de ma wul hwes, ma ra a Dagwi Darwey, Dagwî dalɔ hom Abraham, won, na a nɔng me wɛng e ji pyɛ́ de ma rɔda ra!

⁴³Ma ye, ‘Di, me à womo e nû hwes. Jeng de hwong hwak e vey vo nshi, mê rangal hɛ, ka a simo, a nɔt me kenshi, na me sɔ!

⁴⁴Ka sede a simo á me, na a to ye, e vɛ a bemaryat arɔng, tik na yɛ wɛ a tɛ́ ɛ hwā de hwà ga kasa yaga hwêy dalɔ hom.’

⁴⁵Gyam má sè rɔ̌ ra won o e yey hom, ko Rɛbɛka a vɛ̌ yi na tsung mɛ e ra sanat. A kyè wɔ̀ gyirik e kwɔ̂n vô nshi, ko a vo nshi. Ma rangal hɛ, ka a simo, a nɔt me nshi, na me sɔ.

⁴⁶Ko a lol tsung mɛ ziri, a ye, ‘Ey, nā sɔ, ko ma rɔda to nɔ̂ng bemaryat mō arɔng.’ Ano de ma sɔ, ko a nɔ̂ng bemaryat hom nshi arɔng.

⁴⁷Ma rangal hɛ, ‘Hwà sé hwông lɔ wa arɛt?’ ko a ye, da mɛ à Bɛtuwɛl, hwey de Milka a tɔ a Nahor. Ko ma tɛ̀ a yɛ yɔbɔ e wol, na nerwěy arɔng e vɔ mɛ.

⁴⁸Ano, ma re a Dagwi Darwey fongol. Ma feng a yɛ, yɛ Dagwî dalɔ hom Abraham, de a kyè na me taltal e begwong pere vey e lɔ gwà dalɔ hom. Ano de ma vey, na me vo a sɔ̂ dalɔ hom hwong yi e cáng mɛ.

⁴⁹Ko di, ka sede yin e simo, yin dura a dalɔ hom nerat, yin jut nedirik mɛ, ko yin ha a me yɛ́t. Kɛ ano wɛt ow, yin ha a me arɔng, ko mê tɔk pyɛ ra.”

⁵⁰Laban tanga Bɛtuwɛl ba toyo a yɛ, ba ye, “Pyɛ yemo ya yi na Dagwi Darwey. Vit a wot na gwong de wot e yang o ey kɛ wey.

⁵¹Di, Rɛbɛka a womo! Jut ɛ, na yin kyè. Tik na a tɛ́ ɛ hwâ hwêy dalɔ mō, sede remo de Dagwi Darwey a ga kana ha.”

⁵²Jeng de mwât fwôm Abraham a wok ano, a ye guduruk, a re a Dagwi Darwey fongol.

⁵³Ko a hwo paa pyɛ̂ toro yê dyam pyɛng na yê dyam shinang, tanga berugu, a nɔ̂ng Rɛbɛka. A to nɔ̂ng gwa mɛ tanga neng-gwɔ mɛ nenɔrɔ ne dyām pyak.

⁵⁴E bama mo, yɛ na bemat de ba sé tanga yɛ ba re, ba sɔ, ko ba pɔl ɛ. Jeng de ba sogo nagasi, ko a ye, “Be tɛ̀ me e gwong, na me toyo vɔk na dalɔ hom.”

⁵⁵Ko gwà Rɛbɛka na neng-gwɔ mɛ ba ye, “Kée, ka tik hwong o e ngamo, na wot vɔk ɛ jeng tyɔng, sede pɔlɔ kuru, ko e bama mo e de kyè!”

⁵⁶Ko a yang ɛn, “Yin kaba me wɛt, sede remo de Dagwi Darwey a ga nɔng me wɛng e ji kwɛngɛl hom. Tɛ̀ me hin e gwong, na me toyo vɔk na dalɔ hom.”

⁵⁷Yɛn a ye, “Tik, wot yila hwong o, na wot wok nu mɛ.”

⁵⁸Yɛn a yila Rɛbɛka, ba yang ɛ, “Hwô kyè na mwat womo arɛt?” Ko a ye, “Ey, mê kyè na yɛ.”

⁵⁹Yɛn kwong ba tɛ̀ gwa mɛn Rɛbɛka e gwong, yɛ na lwek mɛ, tanga mwât fwôm Abraham, na bemat mɛ.

⁶⁰Yɛn a tɛ̀ a Rɛbɛka nerat na neha nemo, yɛn a yang ɛ, “À gwà mot, tik na hwo gwɛ̌, na hwo tɛ́ o neng-gwɔ̂ yére zang gu kpɛɛ! Tik na yére mō ye re bemât repugû yɛ̄, na be sey ɛ̀ bapomo mɛn!”

⁶¹Ko Rɛbɛka tanga behwông fwom mɛ ba sogo, ba lagsa bemaryat o, ba raa mwat o. A sé ano de mwât fwôm Abraham a jut Rɛbɛka, a vo mɛ̀ gwong wɛrɛ.

⁶²E jeng o, Yishak a ga kana vey yi e hwes de ba tâng gwɛ, à Lahai-Rowi, ko a sé na sangal e rwa batîn sevwêl Kanaan.

⁶³E rwa nawiri a nusu, a wɔ̀ gwɔrɔ[39] e hey, ko a ye ganga, a di bemaryat be kyè ba pom.

⁶⁴Jeng de Rɛbɛka a kun Yishak o, ko a vɛ̌ gyirik yi e ra maryat,

⁶⁵a rangâl mwât fwôm Abraham, a ye, “E wɛ̌ mwat a woro de e kyè e hey vey na wot arɛt?” A yang ɛ, “A sé e dalɔ hom.” Ko Rɛbɛka a jut rugu, a kyiri mɛ bayis mɛ.

⁶⁶Mwât fwom o a misang a Yishak mwa pyɛ́ de a ra.

⁶⁷Yishak kwong a yel na Rɛbɛka e ji buk kwɔ̌ neng mɛ Sara, ko a tɛ́ ɛ hwā mɛ. Yishak a tɛ̀ yey na yɛ, ko yi ano a sɛ̀ yêy dyɛngɛ e bamâ rekû neng-gwɔ mɛ.