Read berom Susumo 25 Bible Online

Susumo 25 - berom bible

Susumo 25

¹Abraham a vo hwā hwak, reza mɛ à Kɛtura.

²Hwā mo a tɔ̀ a yɛ Zimra, na Yɔkshan, na Medan, na Midyan, na Ishbak tanga Shuwa.

³Yɔkshan, yɛ a dâ Sheba tanga Dedan, ko yére Dedan yɛn vɛ a BeAshur, na BeLetush tanga BeLeyumi.

⁴Ko nèy Midyan, nɛ a Ɛfa, na Ɛfɛr, na Hanɔk, na Abida tanga Ɛldaga. Mwa yɛn vemo ba sé yére Kɛtura.

⁵Abraham a nɔ̂ng Yishak mwa pyɛ̂ nedanelɔ mɛ.

⁶Ko nèy jɛn-beha mɛ, a gas a yɛn nenɔrɔ. A tɛ̀ ɛn e gwong gyam a sè rɔngɔl kwen, a gas ɛn na sɔ mɛ Yishak vɔk e rwa sevwêl rak.

⁷Neshey Abraham mwa e jey nà sè naga na kuru bataama na nɛ netungun (175).

⁸Ko a ku e ji kwopa rat, mwakuk de a ga vɛ bèshey pyak, ko ba wɔ̂ tik ɛ na beda mɛ de ba ga kana kyesem.

⁹Yishak tanga Ishmayɛl, nèy mɛ, na lɛrɛ hɛ e fwarâ Makpɛla bagat na Mamrɛ e cwɛ̂l Ɛfrɔn, hwêy Zohar, WoHiti.

¹⁰A sé e cwɛl a gwane de Abraham a kana sey yi na BeHiti. E hwomo de ba lɛrɛ ɛ Abraham, e kwɔn de ba kana lɛrɛ ɛ hwā mɛ Sara.

¹¹E bamâ rekû Abraham, Dagwi a tɛ̀ a Yishak, hwey mɛ, nerat. Yishak a sangal bagat na hwes de ba tang gwɛ, à Lahai-Rowi.

¹²Ishmayɛl, hwêy Abraham, de Hagar, WoMisra, sam Sara, a tɔ̀ a Abraham, a vɔk nèy.

¹³Bazâ nɛ à vemo e ra nemakuk mɛn: Nɛbayɔt, wen negel mɛ, na Kɛdar, na Adbeel, na Mipsam,

¹⁴na Mishma, na Duma, na Masa,

¹⁵na Hadat, na Tema, na Yɛtur, na Nafish tanga Kɛdɛma.

¹⁶Yɛn vɛ à bedanelɔ yére kuru na yɛ bya, ko ba nɔng baza mɛn e ra nebapomo na buk mɛn.

¹⁷Neshey Ishmayɛl e jey nà sè naga na kuru batat na nɛ netaama (137). Jeng mɛ ya sila, a ku, ba wɔ̀ tik ɛ na beda mɛ de ba ga kana kyesem.

¹⁸Yére mɛ ya sangal e neyɛnɛ̂ sevwel de sa sé e tê Havila tanga Shur de ba sé e rwa rak na Misra, e gwong vɔk e Asirya. Yɛn a sangal gakang na bwang yére Abraham.

¹⁹Reha e ra Yishak, hwêy Abraham, à remo.

²⁰Yishak á vɔk shey kuru banaas jeng de a ra wenêng Rɛbɛka, hwông Bɛtuwɛl, WoAram, gwa Laban, yi e Mɛsɔpɔtamya-Bato.

²¹Rɛbɛka á sè sang-gwon, ko Yishak a ra won na Dagwi Darwey yaga yɛ. Dagwi o a wok won mɛ, ko Rɛbɛka a sey jim.

²²Jim o ya sé yê beshambya, ko nèy o na hwo diris e ji jim mɛ, ko a ye, “Ka sede a sé ano, ko yaga sɛ́ de pyɛ yemo yê té e ra me ɛ?” A wɔ́ na rangal na Dagwi Darwey.

²³Ko Dagwi a yang ɛ, “E yére bemât jey bya e jim mō, hwà rɔda tɔ yére bya de ya rɔda se detu na bemɛn. Jining o ya rɔda dal mumwɛ na gap, kunat a rɔda ra a swɛl fwom.”

²⁴Sede jeng tɔ mɛ ya sila, ko a tɔ beshambya.

²⁵Wo mɛsɛng a nusu zwey, ko mwa bek mɛ ha se sede rugû setot, ko ba vo a yɛ rezâ Esau.

²⁶E bama mo, gwa mɛ a raa, ko a kaba tô bwôl Esau, ko ba vo a yɛ rezâ Yakɔp.[40] Yishak á vɔk neshey kuru batyiimin (60) jeng de ba tɔs ɛn.

²⁷Jeng de nèy o na ga tɛ́ ɛn nerey o, Esau á tɛ́ ɛ mwat de a tɔk jàma, á sè e hey kayɛ jeng, ko Yakɔp á sè hywɛ, gâp sangal mɛ e lɔ.

²⁸Yishak a tɛ̀ yey na Esau yaga pyɛ̂ jàma de a wok netâ re mo, ko Rɛbɛka a tɛ̀ yey na Yakɔp.

²⁹Tuhak, Yakɔp a se kyé leng, ko Esau a toyo yî jàma, vyong ya ga vo ɛ sizɔng.

³⁰A yâng Yakɔp, “Vyong ya ga wey na me! Vɛ́ a me pyɛ́ mō shinang yane, na me re.” A sé yaga ano de ba yila hɛ, à Ɛdɔm.[41]

³¹Ko Yakɔp a toyo a yɛ, a yang ɛ, “Sɛ̌ hwà tānga nɔng me nedanelɔ ne hwêy negel.”

³²Ko Esau a ye, “Ma sé e nû reku, ko e nerât sɛ́ de nedanelɔ nê ra a me ɛ?”

³³Yakɔp a yang ɛ, “Tānga sira a me e ngyen!” Ko a sira a yɛ. Ano de a nɔ̂ng Yakɔp nedanelɔ mɛ ne hwêy negel.

³⁴Yakɔp kwong a nɔ̂ng Esau kpam-tuk na lêng shila, a re, a sɔ, ko a sogo, a kyè. Ano de Esau a ra yapyi na nedanelɔ mɛ ne hwêy negel.