Read berom Susumo 26 Bible Online

Susumo 26 - berom bible

Susumo 26

¹Jeng cak vyong ya to hwo, sede remo de yá kana té e jeng Abraham. Ko Yishak a kyè vɔk na Abimɛlɛk, gwɔ̀m BeFilisti e Gerar.

²Ko Dagwi Darwey a ga kana dura to mɛ na Yishak, a ye, “Hwo kyè vɔk e sevwêl Misra wɛt, ko hwo sangal e kwɔn de ma rɔda ha a hwo.

³Sangal sangâl rekyɛn e ji sevwel o, ko ma rɔda se tanga hwo, na me tɛ̀ a hwo nerat. Ma sé kyè wɔ̀ nɔng o tanga yére mō neyɛnɛ̂ sevwel semo mwa. Ma rɔda sila sira hom de ma kana sira a da mō Abraham.

⁴Mê tɛ̀ yére mō ye gwɛ̌ hɛ pyak sede netangacɛ̂n lagwi, ko ma rɔda nɔ̂ng yɛ̄ mwa neyɛnɛ̂ sevwel semo. Mwa yerê bemasi e jey yê ra won, na me tɛ̀ nerat e ra yɛ̄, sede remo de ma tɛ̀ nerat e ra yére mō.

⁵Ma rɔda tɛ̀ nerat e ra hwo, yaga Abraham a wok fwɔ hom, ko a ga gyeng badu hom tanga basa hom.”

⁶Ano de Yishak a sangal e Gerar.

⁷Jeng de berâs kwɔn o ba rangal hɛ hâ hwā mɛ Rɛbɛka, a ye, “A sé e gwà hom.” A simo na a ye, a sé hwā mɛ wɛt, yaga a tele hɛ, bemat o bê mɔrɔ hɛ yaga yɛ, remo de a sé zɛrɛ mo.

⁸Jeng de a ga kyê ros na sangal e hwomo, ko tuhak, Abimɛlɛk, gwɔ̀m BeFilisti, a bɛrɛng yi e repɔk duk mɛ, a di Yishak a sé ra fin na Rɛbɛka.

⁹Ko a tomo, be yila Yishak, a yang ɛ, “A sé e hwā mō à wɛ! Ko e rɛ̌ de hwà ye, a sé gwa mō arɛt?” Yishak a toyo a yɛ, a yang ɛ, “Ma bare, ma rɔda bidɛ neken hom yaga yɛ.”

¹⁰Abimɛlɛk a ye, “E sɛ́ a yemo de hwà ra a wot ɛ? Ká hwak e ji bemat hom a yâng kana dyɛng na yɛ, ka hwà yâng hwɔtɔ a wot renɛn e ra to mot.”

¹¹Ko a hwɔtɔ a bemat mɛ mwa betong, a ye, “Mwat a kwon ra vwɔ e ra mwat womo kɛ hwā mɛ wɛt, ko bê mɔrɔ hɛ.”

¹²Yishak a bere yere e vwel o, ko e shey o, a yɛt bwal, a sɛ̀ pyɛ́ de ya dal pyɛ de a kana bere zang naga (100), yaga Dagwi Darwey a tɛ̀ a yɛ nerat.

¹³A re nuyel na sɛsɛ̂m yas, ko a ba tɛ́ ɛ gbɔng darwey.

¹⁴A vɔk karâ vyēl, na berɔndɔng, tanga bemât fwom pyak, ko BeFilisti ba bɛɛ hɛ ves.

¹⁵Ano de yɛn a hwo bangas mwa hes de bemât fwôm da mɛ Abraham bà kana cing e jeng de á rɔngɔl kwen.

¹⁶Ko Abimɛlɛk a yâng Yishak, “Kyè yi e ngamo na wot! Hwà ga ye ship à hot.”

¹⁷Yishak a hala kwɔn o, a tɛ̀ kwɔ̂n ye ngyɔk e nɛk Gerar, a ka sangal ɛ e hwomo.

¹⁸A to cing hes de bá kana cing e jeng da mɛ Abraham, vane de BeFilisti ba ga kana bangas vɛ e bamâ rekû da mɛ. A to vos a hes o baza de da mɛ á kana vos a vɛ.

¹⁹Jeng de bemât fwôm Yishak ba cing hwes e nɛk o, ba sɛ̀ lwêl nshi.

²⁰Ko bemât gyeng yas Gerar ba tó ɛ cuna na vê Yishak, yɛn a tē, “Nshi mo na sé nemot.” Yaga ano Yishak a vo a hwes o rezâ Ɛsɛk, wɔgɔ, nenan.

²¹Bemât Yishak ba sek, ba to cing hwes o hwak, ko ba to tó cuna e ra gwɛ gbak, ko Yishak a vo a gwɛ rezâ Sitna wɔgɔ, repugu.

²²A hàla kwɔn o, a to cing hwes o hwak. Ko ba to tó cuna e ra gwane mo wɛt. Yaga ano a ye, “A remo Dagwi Darwey a ga nɔng ot vwel de ha vey a wot, yas mot yê gwɛsɛ hɛ.” Ko a vo a hwes o rezâ Rɛhɔbɔt, wɔgɔ vwel ha vey a wot.

²³Yishak a hala nɛk o, a kyè vɔk e Bɛɛr-Sheba.

²⁴E ji turuk hane, Dagwi Darwey a dura to mɛ na yɛ, a ye, “Ma sé Dagwî da mō Abraham. Hwo wok bengyip wɛt, yaga ma sé tanga hwo. Ma rɔda tɛ̀ a hwo nerat, ko ma rɔda nɔng o yére pyak, sede remo de ma kana sira a mwât fwom hom Abraham.”

²⁵Yishak a lɔk gàgbang nenɔrɔ vɔk na Dagwi e hwomo, a re a Dagwi Darwey ɛ fongol. A tɛ̀ kwɔ̂n ye ngyɔk mɛ e hwomo, ko bemât fwom mɛ ba hwo kas ɛ hwes.

²⁶A vane ano, Abimɛlɛk a vey na Yishak yi e Gerar, yɛ tanga Ahuzat, mwât badu mɛ, na Pikɔl, gwɔ̀m bemât como mɛ.

²⁷Yishak a rangal hɛn, “E sɛ́ ya tɛ̀, yin a vey na me a remo ɛ? Yin a kana bɛɛ me ves, ko yin a ga ro me!”

²⁸Yɛn a hanat, ba ye, “Wot a ga di kyɛrɛng a remo, Dagwi Darwey a sé tanga hwo. Ko wot a bare, wot a ye, a jam na wot sira e tē mot na hwo, wot wuna hot na sira na hwo.

²⁹Sira a wot, hwà rɔda mǎ hot wɛt, sede remo de wot a ga tak a hwo arɔng wɛt. Wot a dopse dura a hwo nerat, ko wot a tik o, hwo kyè tyang! A sé dɛdɛrɛng, Dagwi Darwey a ga tɛ̀ nerat e ra hwo.”

³⁰Yishak a ra a yɛn nzem, ba re, ba sɔ.

³¹Nagasi bop kawɛ a wuna sira na mumwɛ. Yishak a tɛ̀ ɛn e gwong, ko ba gasang hɛn tyang.

³²Tuk hane mo, bemât fwôm Yishak ba vey ha a yɛ rehâ hwes de ba kas. Yɛn a ye, “Wot a sɛ̀ nshi e gwɛ!”

³³Yishak a vo a gwɛ rezâ Shiba wɔgɔ, sirâ mwin. Yi ano de repomô Bɛɛr-Sheba ra sɛ̀ rezâ rɛ.[42]

³⁴Jeng de Esau a wul neshey kuru banaas (40), a ra wenêng behwông BeHiti beba, hwak à Yudit, hwông Beri, ko hwak, à Basemat, hwông Ɛlɔn.

³⁵Yɛn a tɛ̀ Yishak na Rɛbɛka be vɔk yey sit.