Read berom Susumo 27 Bible Online

Susumo 27 - berom bible

Susumo 27

¹Yishak a ga kwop, bayis mɛ ba ga tɛ́ ɛn mwangalang, a tɔk to bɛrɛng jey yɛt wɛt. Tuhak, a yila Esau, hwey mɛ kinat o, a yang ɛ, “À hwey hom.” Ko a ye, “Me à womo.”

²Yishak a ye, “Di, ma ga kwop; ma tɔk tûk reku hom wɛt.

³Remo, jut gbang na zing mō, na hwo kyè wɔ e hey, na hwo wɔ̀ vo a me ngyama.

⁴Hwo ba yong a me mɛ pyɛ̂ re ryat de me simo, hwo vey mɛ, na me re, yaga na me bin tɛ̀ nerat e ra hwo gyam reku hom.”

⁵Rɛbɛka á sè wokos, jeng de Yishak á sè ha na Esau. E bama de Esau a ga kyè vɔk e de jàma,

⁶Rɛbɛka a yâng Yakɔp, “Ma ga wok da mō á ga sè tâng gwà mō Esau,

⁷a wɔ̀ vo a yɛ ngyama, na a vey yong mɛ pyɛ̂ re de ya tá, na a re, na a bin tɛ̀ nerat e ra yɛ e nuyêl Dagwi Darwey gyam reku mɛ.

⁸Yaga ano, à hwey hom, wok pyɛ de mê ha a hwo.

⁹Kyè vɔk e ji kwara, na hwo kasa a me vyēl shi byot o ryat o bya. Mê yong a da mō mɛ pyɛ̂ re de ya tá yerê yinde e simo.

¹⁰Hwo kwong, hwà rɔda wɔ̀ nɔ̂ng da mō yɛ̄, na a re, yaga na a bin tɛ̀ a hwo nerat gyam a ku.”

¹¹Ko Yakɔp a toyo a neng-gwɔ mɛ, “Di, gwà hom Esau a sé mwât tot e rebek, ko me, rebek hom ra sé hyuulul.

¹²Sɛ́ yê tɛ́ ɛ, sede da hom a mɔgɔm me, ko e de sɛ̀ sede ma kwɛlɛng hɛ ɛ? A rɔda tɛ̀ a me gawey e tô nerat!”

¹³Neng-gwɔ mɛ a yang ɛ, “Tik na gawey o he toyo e ra me, à hwey hom! Ra pyɛ de ma ha a hwo zɔng, ci wɔ̀ vey a me na vyēl o.”

¹⁴Ano kwong Yakɔp a kyè, a wɔ̀ vey a neng-gwɔ mɛ na yɛ̄, ko neng-gwɔ mɛ a yong mɛ pyɛ̂ re ryat de da mɛ e simo.

¹⁵E bama mo, a jut berugû Esau, hwey kinat mɛ, de ba dal na nerat, de bà se na yɛ e ji lɔ, ko a tɛ̀ a Yakɔp ɛ vɛ.

¹⁶A tɛ̀ a yɛ bahwô vyēl o e vɔ tanga bak rafwɔ de vit a setot.

¹⁷Ko a nɔ̂ng Yakɔp pyɛ̂ neta mo, a wuna a yɛ na kpam-tuk de a ga kana yong.

¹⁸Yakɔp a wɔ́ mɛ na da mɛ, a yang ɛ, “À da.” Ko da mɛ a ye, “Ey, à hwey hom, hwo a wa ɛ?”

¹⁹Yakɔp a yang ɛ, “E me wɛ, hwey kinat mō Esau. Ma ga ra tyɛng pyɛ de hwà ha a me. Sede hwà simo, sogo, na hwo re namâ ngyama mo, na hwo tɛ̀ a me nerat.”

²⁰Ko Yishak a yang ɛ, “Hwà ga pe ra e rɛ̌ ano ziri, à hwey hom ɛ?” Ko Yakɔp a ye, “Dagwi Darwey, Dagwi mō, a nɔng me wɛng.”

²¹Yishak a yang ɛ, “Sek bagat vey sɛ̀ me, na me mɔgɔm hwo, yaga na me tɔk, kɛ a sé e hwo wɛ à Esau arɛt?”

²²Yakɔp a gwɛ̌ sek bagat na da mɛ. Da mɛ mo a mɔgɔm hɛ, a ye, “Fwɔ mó gwa sé gwô Yakɔp, ko vɔ mó ba sé vɛ̀ Esau.”

²³A tɔk ɛ wɛt, yaga vɔ mɛ ba vɔk tot sede ve gwà mɛ Esau. Ko a simo a tɛ̀ a yɛ nerat.

²⁴Ko a to gwɛ̌ rangal hɛ, a ye, “A sé e hwo wɛ à hwey hom Esau mwin arɛt?” Yakɔp a ye, “E me.”

²⁵Ano kwong, Yishak a yang ɛ, “Vey a me na namâ ngyama mo, na me re, na me tɛ̀ a hwo nerat.” A vey a yɛ mɛ, ko a re; a vey a yɛ na nshi anap, a sɔ́.

²⁶E bama mo, Yishak a yang ɛ, “Gwɛ̌ sek bagat, na hwo kula me e gey, à hwey hom.”

²⁷Yakɔp a vey bagat, ko a kula hɛ e gey. Ko da mɛ a wok nesang berugu mɛ, ko a tɛ̀ a yɛ nerat, a ye, “Ey yàa! Nesang hwey hom na sé sede nesang hey, de Dagwi Darwey a ga tɛ̀ a hɛ nerat mɛ.

²⁸Tik na Dagwi a tomo a hwo na mwɛngɛ yi e larwak, na a tɛ̀ hiri mō be se rat! Tik na a nɔng o pyɛ̂ yéneng tanga nshî anap pyak.

²⁹Tik na yére bemât jey ye ra a hwo fwom, yére detidetu ye tē a hwo guduruk. Hwô se wo nuyêl begwa mō, yɛn e tē a hwo guduruk. Gawey e ra vemo de ba mok a hwo gawey, ko nerat e ra vemo de ba mok a hwo nerat!”

³⁰Sede Yishak a yɛnɛ tɛ̀ a Yakɔp nerat, ko ras de Yakɔp a sè nunus yi na da mɛ, ko Esau, gwà mɛ, a sè pomos yi e de jàma.

³¹Esau arɔng a yong pyɛ́ ryat, a vey a da mɛ mɛ, a yang ɛ, “Ka hwà simo, hwo sogo, na hwo re namâ ngyama mo, yaga na hwo tɛ̀ a me nerat.”

³²Ko da mɛ a yang ɛ, “Hwà sé wa arɛt?” Esau a hanat, a ye, “Me wɛ à Esau, hwey kinat mō.”

³³Yishak a hwo vow; rebek mɛ mwa ra digis yɔ̀kyɔk, ko a ye, “E wa a wane de a ga wɔ̂ jàma, a ga vey a me na nama ɛ? Ma ga kana re gyam hwo de vey. Ma ga tɛ̀ a yɛ nerat, ko nerat o nê nàra a yɛ.”

³⁴Sede Esau a wok ano, a tɛ̀ sekun, a gbɔ na sesin, a yâng da mɛ, “Tɛ̀ a me nerat arɔng, à da!”

³⁵Ko da mo a ye, “Gwà mō a vey na kwɛlɛng, a ga sey ɛ nerat mō.”

³⁶Esau a ye, “Hê neba a hemo de a ga mɔt me: E susu mo a sey ɛ nedanelɔ hom ne hwêy negel, ko a remo a ga to sey ɛ nerat de na sé yaga me! A sé yaga ano de ba vo a yɛ rezâ Yakɔp.”[43] A to ye, “Ko sɛ̌ vit a bwâng nerat de nà tɛt ɛ yaga me, à da a?”

³⁷Yishak a hanat, a ye, “Di, ma ga kana tɛ̀ ɛ mwât nuyel mō, ko bwâng begwa mɛ bê ra a yɛ fwom. Ma ga nɔng ɛ pyɛ́ na nshi anap. A remo, vit a pyɛ cak de mê tɔk to ra a hwo, à hwey hom!”

³⁸Ko Esau a shonong a da mɛ, a yang ɛ, “E yɛnɛ̂ nerat a nane de hwà vɔk zɔng, à da a? Me arɔng, à da, tɛ̀ a me nerat!” Ko a tosho na gbɔng fwɔ.

³⁹Ko Yishak a toyo a yɛ, a yang ɛ, “Hwô sangal e kwɔn de vit a hɛ na nerât sevwel, vit a mwɛngɛ de gwô hwo yi e larwak.

⁴⁰A sé yi na jugu de hwô sɛ̀ pyɛ̂ sangal mō, hwô ra a gwà mō fwom. Ko jeng de pyɛ́ mó yê dal gap mō, hwô gas o, hwô to se e nɛn mɛ wɛt.”

⁴¹Ko Esau a ra repugû gwà mɛ Yakɔp, yaga nerat de da mɛ a kana tɛ̀ a yɛ. A yong e yey mɛ, a ye, “Jeng ya ba vey de da mot e ba ku, ko mê ba mɔrɔ Yakɔp.”

⁴²Sede Rɛbɛka a wok pyɛ de hwey kinat mɛ a sé yong, ko a tomo be yila a yɛ hwey mɛ sɛl o, a yang hɛ, “Gwà mō Esau a sé yong ɛ, na a mɔrɔ hwo, na a bin tala pyɛ de hwà ra a yɛ.

⁴³A remo, à hwey hom, wok pyɛ de mê ha a hwo: tele ziri, na hwo vɔk e lɔ gwà hom Laban e Haran.

⁴⁴Hwô sangal e hwomo na yɛ yaga jeng, sɛ̌ shôm gwà mō ya ye ros.

⁴⁵Jeng de a to wok shom na hwo wɛt, ko a ga ye bam na pyɛ de hwà ra a yɛ, ko ma rɔda de ba tomo, be vey jut o yi e hwomo. Di, me simo me bidɛ hin mwa beba tuk hining o wɛt.”

⁴⁶Rɛbɛka a yâng Yishak, “Yey hom ya sé gádirik na behâ Esau BeHiti. Ka sede Yakɔp e ra weneng e ji behâ sevwel o arɔng, e yɛ̂ pyɛ ryat de ma sɛ̀ e ji sangal hom arɛt?”