Read berom Susumo 3 Bible Online

Susumo 3 - berom bible

Susumo 3

¹Ko gwɔ̄m wa dal ngyāma mwa de Dagwi Darwey a yong na netsitsɛng. Wa yâng hwā mo, “A sé mwin de Dagwi a ye, yin kwon re yi e mwa yére nèy cɔ́gɔt de ya sé e ji bwi wɛt arɛt?”

²Hwā mo a toyo a wɛ, a ye, “Wot e tɔk re yi e nèy karɛ retîn cɔgɔt e ji bwi mo.

³Sɛ̌ e ra nèy retîn cɔgɔ̂t tê bwi de Dagwi a yang ot, wot kwon re wɛt kɛ wot ra nɛ wɛt. Ka wot a ra ano, ko wot e ku.”

⁴Gwɔ̄m wa toyo a yɛ, wa ye, “Yin a rɔda ku wɛt.

⁵Dagwi a tɔk, e jeng de yin e re nɛ̀, ko bayis min bê wunta hɛn. Yin e tɔk pyɛ́ de ya sé ryat na pyɛ́ de ya sé vyes tyɛng sede yɛ.”

⁶Hwā mo a di nèy cɔgɔt o na sé nerat yaga re, na to sé pyɛ̂ bɛrɛng, ko na sé pyɛ̂ cwey o arɔng, yaga ne nɔngɔs netsitsɛng. A vo yi e ji nèy o, a re, ko a nɔ̂ng rwas mɛ, yɛ arɔng a re.

⁷Ko bayis mɛn ba wunta hɛn, ko yɛn a tɔk, yɛn a sé warap. Yɛn a vos berang regwi, ko ba yong mɛ̀ pyɛ̂ banga.

⁸Jeng de gwi gwa ga ye cam, yɛn a wok bol Dagwi Darwey de a sé kyě kyè e ji bwi, ko mwat o na hwā mɛ ba lɛrɛ hɛn e ji batîn cɔ́gɔt.

⁹Dagwi Darwey a yila mwat o, a ye, “Hwà sé e gwa arɛt?”

¹⁰Mwat o a hanat, a ye, “Ma wok vey mō e bwi, ko ma tɛ̀ bengyip, yaga ma sé warap. Yaga ano ma lɛrɛ mɛ.”

¹¹Dagwi a yang ɛ, “Wa a yang o, hwà sé warap arɛt? Hwà ga re yi e ji nèy cɔgɔt de ma ga yang o, a sé kyiri, na hwo re arɛt?”

¹²Mwat o a ye, “E hwā de hwà nɔng me, na a sè na me, e yɛ de a nɔng me nèy cɔgɔt o, ko ma re.”

¹³Ko Dagwi Darwey a yâng hwā mo, “E sɛ́ a yemo de hwà ra arɛt?” Hwā mo a ye, “A sé e gwɔ̄m de wa kwɛlɛng me, ko ma re.”

¹⁴Ko Dagwi Darwey a yâng gwɔ̄m, “Yaga hwà ra pyɛ yemo, ma ga kyini hwo, hwo nju mō zɔng yi e ji ngyāma na yas. Vɔk e yɛnɛ̂ neken mō hwô hwɔlɔ jim e vwel, hwô re nefongol.

¹⁵Ko mê tɛ̀ repugu e tē mō na hwā mó, e tê yere mō na yere mɛ arɔng. Yɛ̀ e bunut to mō, ko hwô rɔt tô bwol mɛ.”

¹⁶Dagwi a doyo vɔk na hwā mó, a yang ɛ, “Mê gwɛ̌ a hwo yɔ̂m jeng vɔ̂k jim, na jeng tɔ arɔng. Ko mwa ano, hwà rɔda simo rwas mō sizɔng, ko yɛ e vɔk reto e ra hwo.”

¹⁷Dagwi a to doyo vɔk na rwas o, a yang ɛ, “Hwà wet betong na hâ hwā mō, ko hwà re yi e ji nèy cɔgɔt de ma kana nɔng o redu, hwo re wɛt. Yaga pyɛ de hwà ra, ma ga kyini vwel. Hê tabas serɔgɔ na shik, ko hwô fes o e fwom mwa neyɛnɛ̂ neshey mō, na hwo sɛ̀ pyɛ̂ re de yê vey a hwo.

¹⁹Hwô tɛrɛ long e de how cap, na hwo sɛ̀ mɛ pyɛ́ de hwô re. Hwô ra ano vɔk e jeng de hwô to toyo hwo fongol, yaga yi e fongol de ba yong o. Hwà sé fongol, ko e fongol de hwô toyo hwo ɛ̀.”

²⁰Mwat o a vo a hwā mɛ rezâ, Hawa,[8] yaga yɛ wɛ a rɔda tɛ́ ɛ dê bemasi mwa.

²¹Ko Dagwi Darwey a yong a mwat o tanga hwā mɛ berugu na bahwo, a tɛ̀ a yɛn ɛ.

²²E bama mo, a ye, “A remo mwat o a ga tɛ́ ɛ sede gwining e ji mot, a vɔk tɔ̂k pyɛ́ ryat na pyɛ́ vyes. Wot kwon tik ɛ, na a re yi e ji nèy cɔgɔt de ne nɔngɔs neken, na a to nàra kwen gbak-gbak wɛt.”

²³Yaga ano Dagwi Darwey a ro ɛ yi e bwi mo, na a wɔ̀ how vwel de ba yi ɛ na yɛ.

²⁴A gas ɛ na gwɛ, ko a tɛ̀ pyɛ́ cen yi e lagwi, na ye gyeng bwi mo na wal de wo lolo, ko wo nàra doysa. A tɛ̀ pyɛ́ mo e rwa rak bwi mo.