Read berom Susumo 31 Bible Online

Susumo 31 - berom bible

Susumo 31

¹Yakɔp a wok nèy Laban, na tē, “Yakɔp a ga sey ɛ kayɛ pyɛ de ya sé ye da mot. A sɛ̀ mwa nerey mɛ yi e pyɛ́ de da mot a vɔk.”

²Yakɔp a to di, negwɔn Laban vɔk na yɛ na to sé sede ne raane arɔng wɛt.

³Ko Dagwi Darwey a yâng Yakɔp, “Toyo hwo vɔk e sevwêl beda mō, e kwɔn de ba kana tɔ o ɛ̀, ko ma rɔda se tanga hwo.”

⁴Yakɔp a tomo a beha mɛ Rahɛl tanga Leya, na be wɔ̀ sɛ̀ ɛ e hey, e kwɔn de yas mɛ ya sé ɛ.

⁵A yang ɛn, “Ma di negwɔn da min vey na me na to sé sede ne raane wɛt, ko e Dagwi wo da hom de a sé tanga me, yɛ wɛ de a nɔng me nerey nemo.

⁶Yin pyɛ min yin a tɔk fwom de ma ga ra a da min na yɛnɛ̂ gap hom mwa.

⁷Mwa ano, da min a ga mɔt me, a ga kyě segsa sehwoyo hom zang kuru. Ko Dagwi a tik ɛ, na a mǎ me wɛt.

⁸Ka sede a ye, berit o vɛ à sehwoyo hom, ko mwa kara mo ba tɔs berit o. Ko ka a ye, yemo de ya ragas ɛ nepɛng yɛ̄ à sehwoyo hom, ko mwa kara mo ba tɔs yinde ya ragas ɛ nepɛng.

⁹Yi ano, Dagwi a ga sey ɛ yas da min, ko a ga nɔng me yɛ̄.

¹⁰“E jeng cak, jeng de vyēl ye turus e ra bemɛn, ma ranas negwi, ko ma di begam de ba sé turus e ra kwara mo ba sé berit o, na bebwat-bwat, tanga vinde ba ragas ɛ nepɛng.

¹¹Ko tom-lagwi wo Dagwi a yila me e ji negwi o, ko ma ye, ‘Me à womo.’

¹²A yang me, ‘Ye ganga, na hwo di mwa begam de ba sé turus e ra kwara ba sé berit o, na bebwat-bwat, tanga vinde ba ragas ɛ nepɛng; yaga ma ga di mwa pyɛ de Laban a ga sǎ e de ra a hwo.

¹³Me wɛ à Dagwi de ma dura to hom na hwo e Bet-Ɛl, kwɔn de hwà shushu něy e ra gwofwa, de hwà tɛ̀ gwɛ̀ pyɛ bare, ko hwà to sira hwo e hwomo. A remo, sogo, na hwo hala sevwel semo, na hwo toyo vɔk e sevwêl tɔ́ mō.’ ”

¹⁴Rahɛl na Leya ba toyo a yɛ, ba ye, “Di, wot a to vɔk numo mot hak e ji pyɛ̂ nedanelɔ lɔ da mot wɛt.

¹⁵Hwà di mwa de e jut ot sede bekɛnɛt da? A ga row ot, ko a ga re dyām de ba tala hɛ yaga wot!

¹⁶Mwa nedanerey nemo de Dagwi a ga sey ɛ yi na da mot, na sé nemot tanga nèy mot. Yaga ano, ra tyɛng pyɛ de Dagwi a ga ha a hwo.”

¹⁷Yakɔp a sogo, a jut nèy mɛ tanga beha mɛ, a tɛ̀ ɛn e ra bemaryat,

¹⁸ko a jut mwa yas mɛ na kayɛ pyɛ de a kana tula e Mɛsɔpɔtamya-Bato. A vo gwông kwɔ̂n da mɛ Yishak e sevwêl Kanaan.

¹⁹Ko di, Laban a ga kana vɔk e de yɛ̂t setôt tyīmit mɛ, ko e jeng o, Rahɛl a shigi a da mɛ pyɛ̂ sekwît lɔ mɛ.

²⁰Yakɔp a shigi hɛ yi e kwɔ̂n Laban,

²¹ko a tele na pyɛ̂ mwa de a vɔk. A ye dɔ a Gwɔrɔt Ɛifaratɛs, ko a kaba gwong vɔk e bahwôl Gileyat.

²²E tuk he netat ba há a Laban, Yakɔp a ga tele.

²³Yaga ano, Laban a jut cáng mɛ tanga yɛ, ko ba raa bol Yakɔp pɔlɔ taama, na be de sɛ̀ ɛ e vwêl bahwôl Gileyat.

²⁴Ko e ji turuk hane, Dagwi a vey a Laban, WoAram, e ji negwi, a yang ɛ, “Tē naka, hwo kwon shìra Yakɔp kɛ hwo ra a yɛ pyɛ cak vyes wɛt!”

²⁵Laban a wɔ̀ wul na Yakɔp, ko Yakɔp a kana tɛ̀ buk mɛ e vwêl bahwôl Gileyat, ko Laban tanga cáng mɛ ba tɛ̀ mɛn e bahwol o arɔng.

²⁶Laban a yâng Yakɔp, “E sɛ́ de hwà ra ɛ? Hwà shigi hwo, ko hwà tele na behwóng hom sede bemat de ba vos ɛn e como!

²⁷Yaga sɛ́ de hwà kyè e lɛrɛ ɛ? Hwà ra a me naka wɛt de hwà ka ha a me wɛt! Ka hwà yâng ha a me, ka ma yâng tɛ̀ in e gwong na bebing tanga yōm kwo, na wot ra jɔgɔ̂ yey pyɛng.

²⁸Hwà ka tik, na me kula begwal hom tanga behwóng hom e gey, na me yang ɛn kala wɛt. Káa, hwà ra fwôm netɔn!

²⁹Di, ma vɔk reto, na me lashe hin. Ko Dagwi wo da min a ha a me naturuk nayos wɔgɔ, me tē naka, me kwon shìra hwo kɛ me ra a hwo pyɛ cak vyes wɛt.

³⁰Ma tɔk, hwà tik me yaga cwey toyo vɔk e lɔ da mō. Ko di, yaga sɛ́ de hwà shigi pyɛ̂ sekwit hom ɛ?”

³¹Yakɔp a toyo a Laban, a ye, “Ma wok bengyip à wɛ̀, yaga ma bare, hwà rɔda sey ɛ behwóng mo na retek e me.

³²Ko e ra pyɛ̂ sekwit mō — jāma yɛ. Ko mwa mwat winde hwà sɛ̀ yɛ̄ na yɛ̄, bê mɔrɔ hɛ! A remo, e nuyêl cáng mot, hwo dura pyɛ de ma vɔk de ya sé myo, ko hwo jut yɛ.” — Ko di, Yakɔp a ka tɔk, hwā mɛ Rahɛl à wɛ de a ga shigi pyɛ̂ sekwit o wɛt.

³³Ano kwong, Laban a yel e bûk Yakɔp, na gwô hwā mɛ Leya, tanga vè behâ fwom beba vane, ko a sɛ̀ pyɛ wɛt. E bama mo, a yel e bûk Rahɛl.

³⁴Ko sɛ̌ Rahɛl a ga jut pyɛ̂ sekwit o, a bang yɛ̄ na wap mâ maryat, a sangal e ra rak o. Laban a ngyɛgɛt buk o mwa, ko a sɛ̀ pyɛ wɛt.

³⁵Rahɛl a yang ɛ, “À da hom, hwo kwon ra shom, yaga ma kyɛ́ me nà sogo e nuyel mō wɛt. Ma vɔk berang à wɛ.” Ano de Laban a jāma e kagwa, ko a tɔk sɛ̀ pyɛ̂ sekwît lɔ mɛ mo wɛt.

³⁶Ko Yakɔp a wok shom, a tē puu e ra Laban, a yang ɛ, “E sɛ́ yɛ à buru hom ɛ? E sɛ́ yɛ à nɛn hom de hwó ra jāma hom ɛ?

³⁷Hwà ga ngyɛgɛt pyɛ́ hom mwa! Sɛ́ de hwà sɛ̀ yê pyɛ̂ lɔ mō e ji mo ɛ? Pat yɛ̄ e ngamo e bayîs bemat mō tanga benang, na be di, na yɛn a yɛrɛ shɔt e tē mot beba.

³⁸Neshey kuru baba de ma sé ra a hwo fwom, ko e jeng yane mwa vyēl pyɛng tanga shit mō ya paa nèy wɛt, ko ma ga re hwak e ji bekuruk de bá sè e kara mō wɛt.

³⁹Yēmo de ngyāma hey ya wey mɛ, ma vey mɛ̀ na hwo wɛt, ko ma jut nedirik o e negya. Hwà tɛ̀, me tala pyɛ de ba shigi e vwɔ hom kɛ a sé nagwi kɛ naturuk ayi.

⁴⁰Nagwi, ma sé tē pot na terêng gwi, ko naturuk me tē pot na neyɔɔtɔ̂t jey, ko nevwa ne di bayis hom wɛt.

⁴¹A sé ano e ji neshey kuru baba de ma ra e ji lɔ mō: neshey kuru na nɛ nenaas ma ra fwom yaga behwóng mō beba, ko neshey netyiimin yaga kara mō, ko hwà rigim na sehwoyo hom zang kuru.

⁴²Ka Dagwî dâ da hom Abraham, yɛ Dagwi de da hom Yishak a wok bengyip mɛ, a yâng sé tanga me wɛt, ka hwà yâng tik me vɔ sǎn. Ko Dagwi a di fwôm dirik de ma ga ra, tanga reyɔm de ma sɔ. Yaga ano de á gyong o naturuk nayos.”

⁴³Ano arɔng, Laban a toyo a Yakɔp, a yang ɛ, “Nèy behwong na sé nenang, nèy mɛn arɔng na sé nenang, kara vemo ba sé nang, ko kayɛ pyɛ de hwà di e ngamo ya sé nyang arɔng. Ko sede remo de mê tɔk to vɔk behwóng hom na nèy mɛn wɛt,

⁴⁴tik na wot wuna hot na sira, me tanga hwo, ko tik na wot sɛ̀ pyɛ nuha e tē mot.”

⁴⁵Ano kwong, Yakɔp a jut gwofwa, a tɛ̀ gwɛ cik, na gwo tɛ́ ɛ pyɛ bare.

⁴⁶Ko a yâng bemat mɛ, “Tula hin beta.” Yɛn a tula hwôl beta, ko yɛn a re ɛ̀ pyɛ́ e hwomo.

⁴⁷Laban a vo a kwɔn o rezâ Yegar-Sahadut[48] ko Yakɔp a yila hɛ à Gal-Et.[49]

⁴⁸Laban a ye, “À Yakɔp, hwôl beta hemo ha sé nuha e tê hom na hwo yunung.” Yaga ano de ba vo a kwɔn o rezâ Gal-Et.

⁴⁹Ba to yila kwɔn o, à Mizpa,[50] yaga Laban a to ye, “Tik na Dagwi Darwey a tɛ̀ bayis mɛ e ra wot, jeng de wot a ga gasang hot!

⁵⁰Ko ka hwà tak a behwóng hom, kɛ hwà gwɛ̌ beha behak e ra yɛn ayi — mwa ano de mê tɔk wɛt, ko Dagwi pyɛ mɛ e se mwât nuha e te hom na hwo.”

⁵¹Laban a to yâng Yakɔp, “Di, hwôl beta hemo tanga gwofwa gacik gwomo de ma tɛ̀ e te hom na hwo.

⁵²Mwa vɛ bê sè nuha vey na hwo, na me kwey hwol o, na me vey ra a hwo pyɛ cak vyes wɛt. Ko hwo arɔng, hwo kwey hwol o na gwofwa mo, na hwo vey ra a me pyɛ cak vyes arɔng wɛt.

⁵³Tik na Dagwî Abraham na dagwi wo Nahor[51] be gas badu e tē mot.” Yakɔp a sira hɛ e ji rezâ Dagwi de da mɛ Yishak a wok bengyip mɛ.

⁵⁴Ko a nára nɔrɔ̂ yas vɔk na Dagwi e hwomo vwêl bahwol o. A yila bemat mɛ, na yɛn a re pyɛ́, ko e bamâ rê pyɛ́ mo, ba pɔl e hwomo.

⁵⁵Bop nagasi, Laban a kula begwal mɛ tanga nèy mɛ behwong o e gey, ko a tɛ̀ a yɛn netyang; e bama mo, a toyo vɔk e lɔ mɛ.