Read berom Susumo 32 Bible Online

Susumo 32 - berom bible

Susumo 32

¹Yakɔp a kaba gwong mɛ, ko betom-lagwî Dagwi behak ba man na yɛ.

²Sede a di ɛn, a ye, “E dúra Dagwi à gwōmo!” Yaga ano, a vo a kwɔn o rezâ Mahanayim.[52]

³Yakɔp a hwo tomo betom mɛ, ba tānga kwey e yel vɔk na gwà mɛ Esau e vwêl bahwôl Seyir, e sevwêl Ɛdɔm.

⁴A nɔng ɛn nu, a yang ɛn, “Ano de yin a rɔda ha a da hom Esau, wɔgɔ, me, mwât fwom mɛ, má sè e sangal e lɔ Laban vey e remo.

⁵Ma vɔk berɔndɔng, na bemadung, na vyēl, tanga bemât fwom beras na beha. Ma sé tomo na be ha a yɛ, yaga na me bin sɛ̀ nerat yi na yɛ.”

⁶Betom o ba wɔ́; jeng de ba toyo na Yakɔp, yɛn a ye, “Wot a wɔ́ na gwà mō Esau, ko a sé e gwong vey man na hwo. A vɔk bemat naga benaas tanga yɛ.”

⁷Yakɔp a tɛ̀ bengyip sizɔng, yey mɛ ya beseng hɛ, ko a gas bemat de ba sé na yɛ, na karâ vyēl, na berɔndɔng, tanga bemaryat zap ba.

⁸A bare, “Ka Esau a vey, a wey na zap o hining, ko zap hemo de ha tɛt ɛ hê dal.”

⁹E bama mo, a ra won, a ye, “À Dagwi wo da hom Abraham, Dagwi wo da hom Yishak, hwo Dagwi Darwey! Hwà yang me, me toyo wɔ e sevwel hom, e kwɔ̂n cáng hom, ko hwô tɛ̀ a me nerat.

¹⁰Ma vey na me sɛ̀ mwa nerat mō, nemo de hwà ga dura a me wɛt, ko hwà ga sila ha mō vey na me, mwât fwom mō. A sè na gwele hom zɔng de má ye dɔ a Rɔt Yɔrdan, ko a remo ma ga tɛ́ me bagyɛng baba.

¹¹Ma sé ra won, na hwo sey me yi e vwɔ̂ gwa hom Esau. Ma wok bengyip mɛ, me tele me, e hwo e ra me, na a wey na wot, mwa na beha tanga nèy mɛn.

¹²Ko hwo, hwà ga kana ye, hwà rɔda nɔng me nerat, ko hwô tɛ̀ yere hom ye se pyak sede bazɛk e vwarâ gworep, vemo de mwat e tɔk bara wɛt yaga nepyak.”

¹³Yakɔp a pɔl e hwomo, ko a kasa yi e yas mɛ, na a bin nɔ̂ng gwa mɛ Esau mɛ nɔrɔ.

¹⁴Pyɛ́ mo a yet ngan: shêp vyel shi naga beba (200) tanga begam kuru baba (20), na shêp vyēl pyɛng naga beba (200) tanga beturuk kuru baba (20),

¹⁵na bedê bemaryat kuru batat (30) na nèy mɛn de ne rɔ̌ ngas, na berɔndɔng kuru banaas (40) tanga bemus kuru (10), mwa na bedê madung kuru baba (20) tanga beras o kuru rining (10).

¹⁶Mwa yas yemo a tɛ̀ yɛ e vɔ bemât fwom mɛ bazík o bazik o e yerê yɛ̄. Ko a ha a yɛn, a yang ɛn, “Kwéy in e yel hom, ko yin raa yin tikis pyol e tê karɛ rezik o.”

¹⁷Ko a nɔ̂ng yɛ̀ wane de a sé e yel nu, a ye, “Jeng de gwa hom Esau e man na hwo, na a rangal hwo, ‘Hwà sé mwât wa arɛt? Hwó kyè vɔk e gwa arɛt? E wa a mwât yas yemo arɛt?’

¹⁸Ko hwà rɔda ye, ‘Ya sé yê mwât fwom mō Yakɔp. A tomo a mwât nuyel mɛ Esau yɛ̄ e nɔrɔ. Yɛ̀ pyɛ mɛ a sé raa hot e bama.’ ”

¹⁹Ano de Yakɔp a nɔ̂ng mwat o wo neba, na wo netat, na mwa bwang o de ba sé ro bazîk yas o, nu tyɛng na wo mɛsɛng o. A yang ɛn, “Pyɛ ma yemo de yin e ha a Esau jeng de yin a man na yɛ.

²⁰Ko yin to yang ɛ arɔng, ‘Di, mwât fwom mō Yakɔp a womo a sé raa hot e bama.’ ” Yakɔp a bare, yi na nɔrɔ de a tomo, a rɔda hwɔtɔ mɛ nehywɛ gwà mɛ Esau, ko jeng de e man bayis na yɛ, gyeng a rɔda hala a yɛ, ko a to sey ɛ́.

²¹Ano de a tanga tomo na nenɔrɔ mo, ko yɛ a to ka pɔl e dem de a ka ye ɛ ngyɔk.

²²E ji turuk hane mo, Yakɔp a hwo sogo, a jut beha mɛ beba, na jɛn-beha mɛ beba, tanga nèy mɛ kuru na hɛ hining, a ye dɔ a rɔt Yabɔk e kwɔn de be tē ɛ dɔ.

²³E bama de a ga ye dɔ na yɛn, a to ye dɔ na mwa pyɛ́ de a vɔk.

²⁴Ba tik ɛ̀ Yakɔp nju mɛ zɔng. Ko mwat hwak a vey, a kaba hɛ na sekyisa sɛ̌ vɔk e rwa hwol gasi.

²⁵Jeng de mwat o a di, a tɔk kyira Yakɔp wɛt, ko a mǎ hɛ e tô gwóng, ko kup o gwa lut ɛ.

²⁶A yâng Yakɔp, “Hàla me, na me kyè; gasi he kyè wɔ̀ ye gbey.” Ko Yakɔp a toyo a yɛ, a ye, “Mê hàla hwo wɛt, sɛ̌ hwà tɛ̀ a me nerat e ngyen.”

²⁷Mwat o a rangal hɛ, a ye, “Za mō a wa arɛt?” Ko a ye, “Za hom, à Yakɔp.”

²⁸Mwat o a ye, “E ngamo nuyel ba rɔda to yila hwo, à Yakɔp wɛt. Hwà ga ra sekyisa na Dagwi tanga bemat, ko hwà ga di wɛng. Yaga ano, bê yila hwo, à Israyɛl.”[53]

²⁹Yakɔp a rangâl mwat o, “Gabɔk wɛt, ha a me za mō.” Ko a ye, “Hwo simo hwo tɔk za hom yaga sɛ́ ɛ?” Ko a tɛ̀ a yɛ netyang, a kyè.

³⁰Yakɔp a ye, “Ma ga di Dagwi bayis na bayis, ko mwa ano ma nàra kwen!” Yaga ano a vo a kwɔn o rezâ Pɛniyɛl.[54]

³¹Gwi gwa sè ta jeng de Yakɔp a tik Pɛniyɛl. A kyě yɔmɔng yaga tô gwóng mɛ.

³²Vey e remo yére BeIsrayɛl ye re renama de ra wuna kup tô gwóng na gwafwa wɛt, yaga a sé e ra renama mo de ba mǎ ɛ Yakɔp.