Read berom Susumo 33 Bible Online

Susumo 33 - berom bible

Susumo 33

¹Yakɔp a ye ganga, ko a di Esau tanga bemat mɛ naga benaas (400). Ko a gas a beha mɛ Leya, na Rahɛl, na jɛn-beha mɛ beba nèy o mwa.

²A tɛ̀ jɛn-beha mo na nèy mɛn e yel, ko a raa mɛ na Leya na nèy mɛ, tanga Rahɛl na hwey mɛ Yɔsɛf e tala mo.

³Ko yɛ pyɛ mɛ a kwey e yel mɛn, a raa na té guduruk e vwel zang taama jeng de a vey bagat wɔ man na gwa mɛ mo.

⁴Ko Esau a tele, na a wɔ̀ tang ɛ show, a kula hɛ e gey, a man rwanang na yɛ, ko mwa hɛn ba hwo tosho yaga yey pyɛng.

⁵Jeng de Esau a ye ganga, a di beha na nèy, ko a ye, “E beva a vemo de ba sé tanga hwo arɛt?” Yakɔp a toyo a yɛ, a ye, “À darwey hom, a sé e nèy hom a nemo de Dagwi, yi na nerat mɛ, a ga nɔng me.”

⁶Ano kwong, jɛn-beha na nèy mɛn ba gwɛ̌ sek bagat, ba ye guduruk.

⁷Leya, na nèy mɛ, ba sek bagat, ba ye guduruk arɔng, ko e yɛnɛ mo, Yɔsɛf na Rahɛl ba sek bagat, ba ye guduruk.

⁸Ko Esau a ye, “Bagyɛng vemo de ma tanga manas na vɛ, ba sé vê sɛ́ arɛt?” Yakɔp a ye, “A sé yaga na me bin sɛ̀ mɛ nerat yi na hwo, à darwey hom.”

⁹Ko Esau a yang ɛ, “Ma vɔk pyɛ de ya vey a me, à gwa hom. Vɔk pyɛ́ de ya sé myo.”

¹⁰Yakɔp a ye, “Wey, me ra won na hwo: ka sede ma ga sɛ̀ nerat na hwo, ko tik na hwo sey nɔrɔ hom! Mwin, dî bayis mō zɔng a sé sede dî bayîs Dagwi, a remo de hwà ga sey me na yey pyɛng.

¹¹Gabɔk wɛt, sey nɔrɔ de ma vey a hwo mɛ! Dagwi a ga dura a me nerat mɛ vit à yere mo. Ma vɔk pyɛ de ya vey a me.” Yakɔp a shonong mɛ Esau e ngyen, na a de sey nɔrɔ mo.

¹²Esau a yang ɛ, “Tik na wot vo gwong. Mê dop na hwo.”

¹³Ko Yakɔp a ye, “À darwey, hwà tɔk nèy nà rɔngɔl nebot o. Ko mê tē naka na vyēl tanga yas de ye ngas nèy. Ka sede ba ro ɛn na yol tuk hining zɔng, ko mwa kara mo bê wey.

¹⁴Ka sede hwà simo, à darwey, hwo sey yel. Me, mê de raa hywɛ e bama, tyɛng na kwɛngɛl yas na nèy, vɔk e jeng de mê ba wul kwɔn mō e Seyir.”

¹⁵Ko Esau a ye, “Tik na me nɔng o behak e ji bemat de ba sé tanga me.” Ko Yakɔp a yang ɛ, “Yaga sɛ́ de hwô ka to ra ano ɛ? Tik na me sɛ̀ nerat na hwo zɔng.”

¹⁶E tuk hane mo, Esau a hwo vo gwông to ɛ vɔk e Seyir.

¹⁷Ko Yakɔp a kyè vɔk e Sukɔt. A lɔk a tó mɛ lɔ e hwomo, a tɛ̀ buk yaga yas mɛ arɔng. Yaga ano de ba yila zâ kwɔn o, à Sukɔt.[55]

¹⁸Ano de Yakɔp a toyo yi e Mɛsɔpɔtamya-Bato, a wɔ̀ wul tyang e repomô Shɛkɛm de ra sé e ji sevwêl Kanaan. A yong kwɔ̂n ye ngyɔk wɔ̂ sɛ̀ repomo mo.

¹⁹A sey bak hey o yi e vwɔ̂ nèy Hamor, dâ Shɛkɛm, e nû dyām pyɛng naga (100).

²⁰E kwɔn hane mo a lɔk ɛ gàgbang rangâs yas vɔk na Dagwi, ko a vo a hɛ rezâ Ɛl, yɛ a Dagwi Israyɛl.