Read berom Susumo 34 Bible Online

Susumo 34 - berom bible

Susumo 34

¹Tuhak, Dina Yakɔp, hwong de a tɔ na hwā mɛ Leya, a wɔ́, na a bin tē show a behwông BeKanaan.

²Ko Shɛkɛm, de da mɛ à Hamor, WoHivi, á sè gwɔ̀m sevwel o, a di hwong o. A jut ɛ, a wɔ̀ dyɛng na yɛ na retek.

³Ko yey mɛ ya wɛrɛ na yɛ, a tɛ̀ yey na yɛ, ko a ye ngyɛ́k, na a hwɔtɔ nehywɛ mɛ vey na yɛ.

⁴A ha a da mɛ Hamor, a yang ɛ, “Me simo hwo vo a me hwong womo, na a se hwā hom.”

⁵Yakɔp a wok, ba ga lashe hwóng mɛ Dina. Ko remo de besɔ mɛ ba kana rɔngɔl e hey na yas, a sǎ yuu vɔk e jeng de ba toyo.

⁶Ko Hamor, dâ Shɛkɛm, a vey, na a bin ha na Yakɔp.

⁷Tyɛng e jeng o, nèy Yakɔp nè sè pomos yi e hey. Sede yɛn a wok pyɛ de ya ga té, yey mɛn ya beseng hɛ, ko yɛn a tɛ̀ shom sizɔng. Yaga pyɛ de Shɛkɛm a ra, ya sé pyɛ rekyen tyɔng wɛt e ji BeIsrayɛl, a dyɛng na hwông Yakɔp, pyɛ de ya jam na be ra wɛt.

⁸Ko Hamor a ha na yɛn, a ye, “Hwey hom Shɛkɛm ha ga tɛ̀ yey na hwóng min. Ka yin a simo a yɛ, ko yin a nɔng ɛ hɛ e weneng.

⁹Tik na wot ragas weneng e tē mot: yin e nɔng ot behwóng min, ko yin e vos bemot à behwong o arɔng.

¹⁰Yin e sangal tanga wot e ji sevwel o, yin e tɔk kasa kwɔn de yin e simo. Sangal hin ɛ, na yin kyě kyè washak, na yin sɛ̀ pyɛ̂ nedanelɔ e ji hɛ.”

¹¹Shɛkɛm a yâng dâ Dina na begwa mɛ, “Tik na me sɛ̀ nerat e bayis min, ko mwa neyɛnɛ̂ pyɛ de yin a ha, ma rɔda tala hin yɛ.

¹²Ha a me hin nepyak yas, ka na ka sé ala ayi, tanga nenɔrɔ detidetu, ko ma rɔda tala tyɛng na pyɛ de yin a ha a me. Me zɔng, yin nɔng me hwong o, na a tɛ́ ɛ hwā hom.”

¹³Ko nèy Yakɔp na gwɔrɔ Shɛkɛm tanga da mɛ Hamor na ha, yaga a ga lashe gwà mɛn Dina.

¹⁴Yɛn a yang ɛn, “Wot e tɔk ra pyɛ yemo wɛt. Wot e nɔng gwà mot e weneng na mwat de ba ga yosom hɛ wɛt, yaga a sé pyɛ rekyen na wot.

¹⁵Pyɛ jining zɔng de yê tɛ̀, na wot simo a yin, yɛ à, yin simo, yin tɛ́ in sede wot, be wɔ a kawɛ rwas e ji min e cwɛl.

¹⁶Yi ano de wot e nɔngɔs hin behwong mot, ko wot e vos bemin arɔng. Ko wot e sangal e tē min, na wot tɛ́ ot yere jining na yin.

¹⁷Ko ka sede yin a sey pyɛ de wot a ha wɛt, na be wɔ a yin e cwɛl, ko wot e jut hwóng mot, wot kyè mɛ.”

¹⁸Neha mɛn o na pɛngɛ a Hamor tanga hwey mɛ yey.

¹⁹Wen o a lashe jeng na râ pyɛ de ba ha mo wɛt, yaga e simo hwông Yakɔp o. Shɛkɛm o yɛ wɛ de ba dal na nɔng ɛ nerey e ji belɔ mo.

²⁰Ano de Hamor na hwey mɛ Shɛkɛm ba wɔ e dura e rwi yel e ji repomo, ba ha na bemât pomo mɛn, ba ye,

²¹“Bemat vemo ba wuna nesa na wot. Tik na yɛn a sangal e sevwel o, na yɛn a kyě kyè washak, yaga vwel o ha sé rey o, ha vey a wot tanga yɛn. Wot e vos behwóng mɛn, ko wot e nɔngɔs hɛn bemot e weneng arɔng.

²²Ko pyɛ jining zɔng de bemat o bê simo yi na wot, yaga na be sangal e tē mot, na wot tɛ́ ot yere jining na yɛn: wot wɔ a kawɛ rwas e ji mot e cwɛl sede yɛn.

²³Ano de wot e sɛ̀ berɔndɔng mɛn, na nerey mɛn, na mwa yas mɛn. Tik na wot simo a yɛn zɔng, na be sangal tanga wot.”

²⁴Mwa bemât repomo mo ba sey pyɛ de Hamor na hwey mɛ Shɛkɛm ba ha, ko ba wɔ a kawɛ rwas e cwɛl.

²⁵E pɔlɔ hê tat, jeng de bemat o ba sè rɔ̌ wokos nepêp beram o, nèy Yakɔp neba, nɛ à Simɛyɔn tanga Levi, begwa jîm Dina, ba jut bewal mɛn, ba hwo e ra repomo mo vit a tɔk, ko ba mɔbɔs beras o mwa.

²⁶Hamor na hwey mɛ Shɛkɛm ba sè e ji mo. Ba jut gwà mɛn Dina yi e lɔ Shɛkɛm, ba pere kyè.

²⁷Ko bwâng nèy Yakɔp na pom, nà sɛ̀ bevin shaam de ba ga mɔbɔs, yɛn a hashe pyɛ́ e ji repomo mo, yaga na be tala mɛ pyɛ rekyen de ba ra a gwa mɛn Dina.

²⁸Yɛn a hashe karâ vyēl shi, na vyēl pyɛng, na berɔndɔng, na bemadung, na mwa pyɛ́ de ya sé e ji repomo tanga e hey.

²⁹Mwa nerey mɛn, na beha mɛn tanga nèy mɛn, na kayɛ pyɛ de ya sé e nelɔ mɛn ba hashe e jugu.

³⁰Yakɔp a yâng Simɛyɔn na Levi, “Yin a ga tɛ̀ me e ji yɔ́m! A remo mê vɔk nemi nesit e bayîs bedâvwel hemo! Vit a me na bemat hyɔt. Ka sede BeKanaan na BePɛrizi mo yɛn a wuna hɛn e ra me, na be hwo me na como, ko bê wey na me tanga belɔ hom.”

³¹Ko ba toyo a yɛ, ba yang ɛ, “Sɛ̌ be teshe na gwà mot sede devwes, kɛk a!”