Read berom Susumo 35 Bible Online

Susumo 35 - berom bible

Susumo 35

¹Dagwi a yâng Yakɔp, “Sogo, tut vɔk e Bet-Ɛl, na hwo sangal e hwomo. E hwomo hwà rɔda yong gàgbang rangâs yas vɔk na me, me Dagwi de a dura reto mɛ na hwo jeng de hwá sè tele yi na gwa mō Esau.”

²Ano kwong, Yakɔp a yâng belɔ mɛ tanga mwa bemat de ba sé na yɛ, “Gas in na mwa pyɛ̂ sekwit yê bedagwi yére dyuk de ya sé na yin! Tɛ̀ in bato min jɛrɛ, ko yin sege berugu min.

³Wot e sogo, na wot kyè vɔk e Bet-Ɛl. E hwomo, mê lɔk gàgbang rangâs yas vɔk na Dagwi de á sɛlɛ me e jeng de má sè sɔ reyɔm, yɛ de á sè tanga me kahɛ kwɔn de ma vɔk ɛ.”

⁴Ano de belɔ mɛ ba nɔ̂ng Yakɔp mwa pyɛ̂ sekwit de yɛn a vɔk, na yɔ̄bɔ betong mɛn de ba tɛ̀sɛ sede balow. Ko Yakɔp a lɛrɛ yɛ̄ e nɛ̂n cɔgɔ̂t ouk de ya sé bagat na Shɛkɛm.

⁵Sede yɛn a vo gwong, ko Dagwi a tɛ̀ bemât bapomo de ba gwɔrɔ hɛn ba vo bengyip ding-ding. Yaga ano, yɛn a tɔk ro ɛn wɛt.

⁶Yakɔp na bemat mɛ mwa ba pom e Lus, yɛ wɛ a Bet-Ɛl a remo, e ji sevwêl Kanaan.

⁷E hwomo a lɔk gàgbang rangâs yas vɔk na Dagwi, ko a vo a kwɔn o rezâ Ɛl-Bet-Ɛl.[56] Yaga e hwomo de Dagwi a dura to mɛ na yɛ, jeng de á sè tele yi na gwà mɛ Esau.

⁸Dɛbɔra, hwā de a pege Rɛbɛka, a ku, ko ba lɛrɛ hɛ e vwâ tîn cɔgɔ̂t ouk e rwa batin na Bet-Ɛl. Yaga ano ba vo a kwɔn o rezâ Ouk Sesin.

⁹Dagwi a to dura to mɛ na Yakɔp, jeng de a pom yi e Mɛsɔpɔtamya-Bato, ko a tɛ̀ a yɛ nerat.

¹⁰A yang ɛ, “Reza mō à Yakɔp, ko e ngamo nuyel rê se Israyɛl.” Ano de Dagwi a vo a yɛ rezâ Israyɛl.

¹¹Ko Dagwi a yang ɛ, “Ma sé Dagwi Wo Retô Mwa. Ma sé tɛ̀ a hwo nerat, na hwo tɔs nèy, na ne karak hɛn, yére mō yê tɛ́ ɛ yerê bemat jey, ey, regyɛng yére bemât jey, ko hwô to tɛ́ o dâ begwɔ̀m.

¹²Sevwel de ma kana nɔ̂ng Abraham na Yishak, mê nɔng o mwa na yére mō sɛ̄.”

¹³Dagwi a gas ɛ na yɛ, yi e dem de a ga ha na yɛ.

¹⁴Ko Yakɔp a jut gwofwa, a tɛ̀ gwɛ cik, na a se pyɛ dura e kwɔn o. A shusha ɛ nɔrɔ̂ nshî anap e ra gwɛ, ko a to shushu ɛ něy pwat arɔng.

¹⁵Ko a vo a kwɔn de Dagwi a ga kana ha ɛ na yɛ rezâ Bet-Ɛl.

¹⁶Yakɔp ba sogo yi e Bet-Ɛl. Lyosho ya sé e tē mɛn gyam be wul Ɛfrat, ko jeng tɔ̂ Rahɛl ya vey, a sɔ yɔ́m na tɔ mo.

¹⁷Jeng de nepêp tɔ mo na kyiri hɛ, ko hwâ sêy hwey o a yang ɛ, “À dê hwey, tɛ̀ yey ting! Hwà ga to sɛ̀ hwey wen.”

¹⁸E jeng o Rahɛl a sé kushu, ko a vo a hwey o rezâ Bɛn-Oni; ko da mɛ Yakɔp a vo a hɛ rezâ Bɛnyamin.[57]

¹⁹Ano de Rahɛl a ku. Ba lɛrɛ hɛ e vwarâ gwong vɔk e Ɛfrat, hɛ à Bet-Lɛhɛm a remo.

²⁰Yakɔp a jut gwofwa, a tɛ̀ gwɛ cik, na a se pyɛ bare e ra sak o, gwofwa gwane gwa sé ɛ pere vey e yunung.

²¹A re nuyel na kwɛngɛl, a yong kwɔ̂n ye ngyɔk e bamâ tyɔ̌n Ɛdɛr.

²²E jeng de á sè e sangal e hwomo, Rubɛn a dyɛng na Bilha, jɛn-hwâ da mɛ. Yakɔp a wok ha mo, ko pyɛ mo ya re a yɛ yey.[58] Nèy Yakɔp bewen o na sè kuru na nɛ neba (12).

²³Nèy Leya, nɛ a Rubɛn, wen kunat, na Simɛyɔn, na Levi, na Yuda, na Isakar tanga Zɛbulun.

²⁴Nèy Rahɛl, nɛ a Yɔsɛf tanga Bɛnyamin.

²⁵Nèy Bilha, hwâ fwôm Rahɛl, nɛ a Dan tanga Naftali.

²⁶Nèy Zilpa, hwâ fwôm Leya, nɛ a Gat tanga Ashɛr. E yɛn a nèy bewen Yakɔp de ba tɔs a yɛ e Mɛsɔpɔtamya-Bato.

²⁷Yakɔp a wɔ wul na da mɛ Yishak e Mamrɛ, bagat na Kiriyat-Arba, hɛ à Hɛbrɔn a remo, kwɔn de Abraham na Yishak ba kana sangal ɛ.

²⁸Yishak a vɔk neshey naga na kuru rwit (180).

²⁹Ko a ku, mwakuk de a ga vɛ̂ bèshey pyak, ko ba wɔ̂ tik ɛ na beda mɛ de ba ga kana kyesem. Esau tanga Yakɔp, nèy mɛ, na lɛrɛ hɛ.