Read berom Susumo 37 Bible Online

Susumo 37 - berom bible

Susumo 37

¹Yakɔp a sangal e sevwêl Kanaan, e kwɔn de da mɛ a kana sangal ɛ e rekyen.

²Rehâ yerê Yakɔp a remo. Yɔsɛf a vɔk neshey kuru na nɛ netaama (17), á sè gyeng vyēl tanga begwa mɛ bekinat, yɛn à nèy behâ da mɛ, Bilha na Zilpa. Ko Yɔsɛf a vɛsɛ a da mɛ na hâ pyɛ́ vyes de begwa mɛ be ragas.

³Yakɔp[59] a dal na tɛ̂ yey na yɛ e ra bwâng nèy mɛ, yaga á sè hwêy kwopa mɛ. A tɛ̀ ba lɔk a yɛ gworugu de begwɔ̀m be tɛ̀sɛ.

⁴Jeng de begwa mɛ ba di, da mɛn a tɛ̀ yey na Yɔsɛf a dal bwang mɛn, ko yɛn a ra repugu mɛ, yɛn a tɔk ha hâ netyang na yɛ wɛt.

⁵Tuhak, Yɔsɛf a ranas negwi, ko jeng de a ha a begwa mɛ, yɛn a to gwɛ̌ ra repugu mɛ.

⁶A yang ɛn, “Wok in yerê negwi de ma ranas nɛ:

⁷Wot á sè rɔgɔs bakûs alkama e cap. Ko di, kus o nang ha tumal cik, ko bakus o bamin ba gwɔrɔ hɛ, be tē a hɛ guduruk.”

⁸Begwa mɛ ba yang ɛ, “Ko sɛ̌ e hwo wɛ hwô re negwɔm e ra wot a? E hwo de hwô vɔk to na wot a?” Ko yɛn a gwɛ̌ ra repugu mɛ yaga neha negwi mɛ.

⁹Yɔsɛf o a to ranas negwi nehak, a ha a begwa mɛ, “Di, ma ga to ranas negwi nehak, ko e ji nɛ, ma di gwi, na pwɛl, tanga netangacɛn kuru na wɛ gwining ba sé tē a me guduruk.”

¹⁰Jeng de a ha a da mɛ na begwa mɛ negwi mo, ko da mɛ a gyong ɛ, a yang ɛ, “E sɛ̂ yerê negwi a nane de hwó ra arɛt? Ko sɛ̌ me, da mō, na neng mō, tanga begwa mō wot e ye a hwo guduruk a?”

¹¹Begwa Yɔsɛf ba bɛɛ hɛ ves, ko da mɛ a vɔk pyɛ́ yane mo e ji yey mɛ.

¹²E jeng cak begwa Yɔsɛf ba kyè vɔk e de gyêng yas da mɛn e Shɛkɛm.

¹³Ko Yakɔp a yâng Yɔsɛf, “Begwa mō ba sé gyeng kwara e Shɛkɛm. Vey, na me tomo hwo na yɛn.” Yɔsɛf a ye, “Ey, ma simo.”

¹⁴Da mɛ a ye, “Ci, na hwo wɔ̀ di netyâng begwa mō na kwara arɔng, na hwo ba ha a me.” Ano de da mɛ a tomo hɛ yi e nɛk Hɛbrɔn vɔk e Shɛkɛm.

¹⁵Jeng de a sé kyě rini e hey, ko mwat hwak a di ɛ, a rangal hɛ, a ye, “E sɛ́ de hwó jāma arɛt?”

¹⁶A ye, “Ma sé jāma begwa hom. Ka hwà tɔk kwɔn de yɛn a sé gyeng ɛ kwara mo, ko gabɔk wɛt, ha a me.”

¹⁷Sá mo a ye, “Yɛn a ga kyè yi e ngamo, yaga ma wok ɛn, ba tē, ‘yɛn e kyè vɔk e Dotan.’ ” Ano kwong, Yɔsɛf a raa begwa mɛ, a sɛ̀ ɛn e Dotan.

¹⁸Sede yɛn a kun ɛ, a sè rɔngɔl yikyik, ko yɛn a yong ɛ̀, na be mɔrɔ hɛ.

¹⁹Yɛn a yâng bemɛn, “Di, mwât negwi womo mo e kyè vey!

²⁰Vey in, na wot mɔrɔ hɛ, ko wot bomo vin o e hwak e ji hes de gwa ga ye jɔng. Ko wot a rɔda ye, a sé e ngyama cak vyes de ya ga re ɛ. Ko wot e de di a yɛ pyɛ negwi mɛ mo!”

²¹Jeng de Rubɛn a wok ɛn, ko a simo, na a bin sey nekên Yɔsɛf yi e vwɔ mɛn, a ye, “Wot kwon gas ɛ na neken mɛ wɛt.

²²Yin shushu nemi wɛt! Bomo hin hɛ e hwes gworo e hey, ko de yin tɛ̀ a yɛ ram wɛt.” A ha ano, yaga e simo, na a sey nekên Yɔsɛf, na a bin to toyo na yɛ vɔk na da mɛ.

²³Jeng de Yɔsɛf a pom na begwa mɛ, yɛn a pat gworugu yerê gwo begwɔ̀m de a tɛ̀ e bek mɛ.

²⁴Yɛn a jut ɛ, ba bomo hɛ e ji hwes. Hwes o gwa sé hwɔ́k-hwɔk.

²⁵Sede yɛn a sé sangal na be re pyɛ́, ko yɛn a ye ganga, ba di bejik BeIshmayɛl, ba ta rwāng yi e Gileyat e gwong mɛn vɔk e Misra. Ba tɛ̀ a bemaryat mɛn negang detidetu nehwogot o ne dyām pyak de bê yong mɛ̀ pyɛ̂ nesang hyɔɔlɔl tanga behal.

²⁶Yuda a hwo yâng begwa mɛ, “E yɛ̌ pyɛ de wot e sɛ̀, ka sede wot a mɔrɔ gwà mot, na wot bang hâ mɔrɔ mɛ arɛt?

²⁷Wot kwon ra vwɔ e ra yɛ wɛt, ko wot row ɛ na BeIshmayɛl e negya. Di, yɛ a sé gwà mot, nemi mot.” Begwa mɛ mo ba simo ha mɛ.

²⁸Jeng de bejik BeMidyan ba sé kwey, ko begwa Yɔsɛf ba hwɔlɔ hɛ yi e hwes o. Yɛn a row a BeIshmayɛl o hɛ e nû dyām pyɛng kuru baba, ko ba kyè na yɛ vɔk e sevwêl Misra.

²⁹Sede Rubɛn a toyo wɔ e hwes o, a di, vit a Yɔsɛf e ji gwɛ, ko a hama berugu mɛ yaga lashê yey.

³⁰A wɔ̀ sɛ̀ begwa mɛ, a ye, “Yaa kukuuk! Hwey o, vit a hɛ e hwomo! Mê lɛrɛ to hom e gwa arɛt?”

³¹Yɛn a vo gam, ba yɛrɛ wɛ, ko ba jut gworugû Yɔsɛf, ba gyira e ji nemi mo.

³²Yɛn a tomo na gworugu gwane mo wɔ na da mɛn Yakɔp, ba ye, “Di, pyɛ de wot a sɛ̀! Bɛrɛng, na hwo di, kɛ a sé gwo hwey mō a, kɛ e rɛ̌ rɛt?”

³³Yakɔp a pere tɔk gwɛ, a ye, “Káa-à! Káa-à! E rugû hwey hom! Ngyama cak vyes ya ga wey na yɛ! Ya ga hama hwey hom Yɔsɛf!”

³⁴Ko a hama berugu mɛ, a tɛ̀ berugû sesin, a tosho hwey mɛ nepɔlɔ pyak.

³⁵Nèy mɛ bewen o mwa tanga behwong o ba wɔrɔk hɛ, ko a tɔk sey wɔrɔk o wɛt, a tē, “Wey! Mê sè tosho hwey hom vɔk e jeng de mê wɔ sɛ̀ hɛ e kwɔ̂n beda hom.” Ano de Yakɔp a re nuyel na lashe yey yaga Yɔsɛf, hwey mɛ.

³⁶E jeng o, BeMidyan ba ga kana row ɛ na Pɔtifar, gwining e ji bemât badu gbɔng gwɔ̀m Farawo. A sé mwât nuyêl vê gyêng lɔ gbɔng gwɔ̀m o.