Read berom Susumo 38 Bible Online

Susumo 38 - berom bible

Susumo 38

¹E rwa jeng yane mo, Yuda a hàla begwa mɛ, a wɔ tɛ̀ kwɔ̂n ye ngyɔk e Adulam, bagat na mwat hwak de ba tang ɛ, à Hira.

²E hwomo, a man na hwông BeKanaan hwak de da mɛ à Shuwa. A ra wenêng hwong o,

³ko hwong o a sey jim, a tɔ hwey wen. Yuda a vo a hɛ rezâ Ɛr.

⁴Hwā mo a to vɔk jim o cak gbak, ko a tɔ hwey wen, a vo a hɛ rezâ Onan.

⁵A to tɔ hwey wen gbak, ko a vo a hɛ rezâ Shela. Yuda á sè e pomô Kezip e jeng o.

⁶Jeng de Ɛr, hwêy negel mɛ, a ga ras, ko Yuda a vo a hɛ hwā; rezâ hwā mo a Tamar.

⁷Ko Ɛr o a vɔk negwɔn neves e bayîs Dagwi Darwey. Yaga ano a wey na yɛ.

⁸E bamâ pyɛ́ yane, Yuda a yâng Onan, “Yel na hwâ gwà mo, na hwo ra a yɛ pyɛ de ya sé gbing-gbing hwo ra na shin mō, yaga na hwo sɛ̀ a gwà mō yere.”

⁹Ko Onan a tɔk wɔgɔ, nèy o nê sè nemɛ wɛt. Yaga ano, jeng de e dyɛng na hwâ gwà mɛ mo, ko a lusha nshî jwat o e vwel, yaga na gwà mɛ a bidɛ yere.

¹⁰Ko pyɛ de a ra ya jam a Dagwi Darwey wɛt, a wey na yɛ arɔng.

¹¹Ano kwong, Yuda a yâng gwel mɛ Tamar, “Hwo wɔ̀ sangal sangâl nekuma e ji lɔ da mō vɔk e jeng de hwey hom Shela e tɛ́ ɛ rwey o.” A ha ano, yaga a bare, kɛ gyeng Shela e ku tyɛng sede begwa mɛ. Ano de Tamar a kyè a wɔ̀ sangal e lɔ da mɛ.

¹²Ba jut jeng pyak, ko hwâ Yuda, hwêy Shuwa, a ku. Jeng de yêy Yuda ya dyɛng, a kyè vɔk e Timna, e kwɔ̂n bemat de ba sé yɛt a yɛ setôt vyēl pyɛng mɛ, ko sā mɛ Hira, WoAdulam, a wɔ́ tanga yɛ.

¹³Ba ha a Tamar wɔgɔ, dakwop mɛ a sé kyè ba pom e Timna e de yɛ̂t setôt vyēl pyɛng mɛ.

¹⁴Ko Tamar a pat berugû nekuma mɛ, a tɛ̀ behak, a bang rato mɛ na rugu, ko a wɔ̀ sangal e rwi yel vɔk e Ɛnayim, pomo hak e gwông Timna. A ra ano, yaga a di, Shela a ga vey mwat, ko ba ga ka nɔng ɛ hɛ, na a tɛ́ ɛ hwā mɛ wɛt.

¹⁵Jeng de Yuda a di ɛ, a tē kɛ gyeng e devwes, yaga Tamar a kana bang bayis mɛ.

¹⁶A ye rɛng vɔk na Tamar e vwarâ gwong, a yang ɛ, “Mê yel na hwo.” Ko yɛ a tɔk, a sé e gwel mɛ wɛt. Ko Tamar a rangal hɛ, “Hwô tala me ala?”

¹⁷Yuda a toyo a yɛ, “Ma rɔda tomo a hwo na kekwey vyel shi yi e kwara hom.” Tamar a ye, “Ko hwô tik pyɛ cak yaga nuha vɔk e jeng de hwô de tomo na kɛ.”

¹⁸Yuda a rangal hɛ, “E sɛ́ de mê nɔng o ɛ?” Tamar a ye, “Tô gwɔ̀m mō, na rwik de hwà hála mɛ hɛ e ra fwɔ mō, tanga gwele de hwà vɔk.” Ko Yuda a nɔng ɛ pyɛ́ yane, ko a dyɛng na Tamar. Tamar a sey jim.

¹⁹E bama mo, Tamar a to ɛ vɔk e lɔ, a pat rugu de a kana bang mɛ bayis mɛ, ko a to tɛ̀ berugû nekuma mɛ.

²⁰Yuda a tomo sa mɛ WoAdulam, na a wɔ̀ nɔng kekwey vyel shi mo, na a bin sey ɛ pyɛ́ yane yi na hwā mo, ko a tɔk sɛ̀ hwā mo wɛt.

²¹A hwo rangâl bemât repomo mo, a ye, “Devwes womo de a sé e Ɛnayim, e nû gwong, a sé e gwa ɛ?” Yɛn a yang ɛ, “Vit a devwes hwak de a kana sangal e ngamo.”

²²Yaga ano, a toyo vɔk na Yuda, a ye, “Vit, ma sɛ̀ ɛ wɛt. Bemât pomo mo ba ye, devwes hwak a ga sangal e ngamo wɛt.”

²³Yuda a ye, “Tík ɛ, na a vɔk pyɛ́ mo ye tɛ́ ɛ myɛ, yaga bê kwon shɛgɛsh hot. Ma ga ye ngyɛ́k, ma tomo na kekwey vyel o, ko vit, ba tɔk sɛ̀ ɛ wɛt.”

²⁴E bamâ pɛl sede tat ba ha a Yuda wɔgɔ, gwel mɛ Tamar a ga ra nekpat, ko a remo a vɔk jim. Ko Yuda a ye, “Be pat ɛ e majey, na be rangas hɛ!”

²⁵Sede ba sé kyè wɔ̀ pat Tamar o, ko a tomo a dakwop mɛ na pyɛ́ yane mo, a ye, “Ma tɛ̀ jim na mwat de pyɛ́ mɛ à yemo. Bɛrɛng, kɛ hwô tɔk yɛ bɛ? Tô gwɔ̀m, na rwîk hɛ, tanga gwele, ya sé yê wa arɛt?”

²⁶Yuda a pere wɔ̀ tɔk pyɛ́ mo, a ye, “A dal me na tsak o, yaga ma tik nà nɔ̂ng hwey hom Shela hɛ́ e weneng.” Yi e jeng o, Yuda a to dyɛng na Tamar wɛt.

²⁷Sede jeng tɔ̂ Tamar ya vey, ko sɛ̌ e beshambya de a vɔk.

²⁸Jeng de hwey o ha shɛ́rɛk hɛ, ko hwey o hak ha nára vwɔ̂ hɛ e majey, ko hwâ sêy tɔ mo a rɔgɔs shwey zoyong e vwɔ̂ hɛ, a ye, “Womo wɛ a tānga nusu.”

²⁹Ras be sè yɛnsɛ, ko a to hwɔtɔ vwɔ mɛ, ko di, gwà mɛ a nusu. Hwâ sêy tɔ mo a ye, “Kɛ́ɛ wey-oo! Hwà ra e rɛ̌ de hwà tānga ta ɛ?” Yaga ano de ba vo a yɛ mɛ rezâ Pɛrɛs.[60]

³⁰Ano arɔng, gwà mɛ a nusu, yɛ wane de ba ga kana rɔgɔs a yɛ shwey zoyong e vwɔ, ko ba vo a yɛ rezâ Zɛra.[61]