Read berom Susumo 39 Bible Online

Susumo 39 - berom bible

Susumo 39

¹BeIshmayɛl ba ga kyè na Yɔsɛf vɔk e sevwêl Misra, ba row a Pɔtifar hɛ. Pɔtifar o á sè gwining e ji bemât badu gbɔng gwɔ̀m Farawo, yɛ à mwât nuyêl vê gyeng lɔ gbɔng gwɔ̀m o.

²Yɔsɛf a sé sangal e ji lɔ dalɔ mɛ WoMisra mo, e rá fwom. Dagwi Darwey a sɛlɛ hɛ, ko yaga ano, a di wɛng e ji kayɛ pyɛ de a ra. Dalɔ mɛ a di pyɛ́ yane mo,

⁴ko yey mɛ ya pɛngɛ na Yɔsɛf. A jut ɛ, a tik ɛ jaram yaga fwom de gwa sé mwɛ, a tɛ̀ ɛ mwât nuyêl lɔ mɛ na pyɛ̂ mwa de a vɔk.

⁵Yi e jeng yane, Dagwi Darwey a tɛ̀ nerat e ra lɔ̂ WoMisra mo na mwa pyɛ̂ nedanerey mɛ de a vɔk, yê lɔ tanga yê hey; a ra ano yaga Yɔsɛf.

⁶A tik pyɛ́ mɛ mwa e vwɔ̂ Yɔsɛf. Pyɛ mɛ ya to sé na râ pyɛ cak wɛt, sɛ̌ pyɛ́ de e re zɔng. Yɔsɛf á sè mwat o hwɔf, zɛrɛ mo.

⁷Ba sé sangal ano, ko hwâ dalɔ̂ Yɔsɛf a tɛ̀ bayis e ra yɛ, a dura a yɛ simo, ko tuhak a yang ɛ, “Dyɛng na me!”

⁸Ko a kyɛ́ ɛ, a yang ɛ, “Di, a remo de ma sé sangal e ngamo, vit a pyɛ de dalɔ hom e sap e ra yɛ, a ga nɔ́ng me kayɛ pyɛ de a vɔk e ji vwɔ hom.

⁹A vɔk reto e lɔ mo de ha dal nang wɛt. A ro na pyɛ cak e me wɛt sɛ̌ hwo zɔng, yaga hwà sé hwā mɛ. Yi e rɛ̌ de mê ra gbɔng pyɛ vyes yemo ano, na me ra a Dagwi renɛn arɛt?”

¹⁰Ko hwā mo a dopse rangsâl Yɔsɛf kahɛ tuk, ko Yɔsɛf a simo, na a dyɛng na yɛ, kɛ a sangal bagat na yɛ wɛt.

¹¹Ko tuhak Yɔsɛf a yel, na a ra fwom mɛ e ji lɔ. Vit a mwât fwom hwak de a sé e ji lɔ,

¹²ko hwā mo a kaba rugu mɛ, a ye, “Dyɛng na me!” Ko Yɔsɛf a hàla a yɛ rugu mo e vwɔ mɛ, a tele vɔk e majey.

¹³Sede hwā mo a di, de a ga hàla a yɛ rugu mo, a ga nusu hɛ,

¹⁴ko a yila bemât fwôm lɔ mo, a yang ɛn, “Di in, rwas hom a vey a wot na WoIbrani womo de a sé byɛs ot! A yel e ngamo, na a dyɛng na me, ko ma dak sekun.

¹⁵Sede a wok, ma dak sekun na gbɔng fwɔ, a vɛ̌ hàla rugu mɛ na me, a hywit ɛ, ko a tele vɔk e majey.”

¹⁶A vɔ̀k rugû Yɔsɛf o, sɛ̌ jeng de rwas mɛ a vɛ̄ hɛ e lɔ.

¹⁷Ko a jɛt a rwas mɛ ha mo, a ye, “Sam WoIbrani, womo de hwà vey mɛ e ngamo e lɔ mot, a yel e ji duk hom, a simo na a byɛs me.

¹⁸Ko jeng de ma dak sekun na gbɔng fwɔ, a tele vɔk e majey, a hàla rugu mɛ na me.”

¹⁹Jeng de dalɔ̂ Yɔsɛf a wok pyɛ́ mwa de hwā mɛ a ha a yɛ, yemo de sam mɛ a ra a yɛ, ko yey mɛ ya fus na Yɔsɛf.

²⁰A tɛ̀, be rɔgɔs hɛ e lɔ̂ ngyang, e kwɔn de gbɔng gwɔ̀m e rɔgɔs ɛ bemat mɛ. Ko mwa ano de Yɔsɛf a sé e lɔ̂ ngyang,

²¹Dagwi Darwey á sè tanga yɛ, a dura a yɛ nerat mɛ. Yi ano, yêy gbɔng mwât bɛrɛ̂ng lɔ̂ ngyang ya pɛngɛ na yɛ,

²²ko a tɛ̀ ɛ mwât nuyêl mwâ bemat de ba sé re ngyang, na mwa fwom de be ra e hwomo.

²³Yɛ pyɛ mɛ a to sé ra fwom hwak gwomo de a ga kana tik a Yɔsɛf wɛt, yaga a di, Dagwi Darwey a sé tanga Yɔsɛf, ko a tɛ̀, a di wɛng e râ kayɛ pyɛ.