Read berom Susumo 4 Bible Online

Susumo 4 - berom bible

Susumo 4

¹Adam a dyɛng na hwā mɛ, Hawa, ko hwā mo a sey jim, a tɔ hwey wen, a ye, “Yi na sɛ́lɛ Dagwi Darwey ma ga sɛ̀ hwey.” Ko a vo a hɛ rezâ, Kayin.[9]

²Hawa a to vɔk jim, a to tɔ hwey hak, yɛ à Hɛvɛl. Hɛvɛl á tɛ́ ɛ mwat de a vɔk yas, vyēl pyɛng na shi mo, ko Kayin á sè mwât cap.

³E bamâ jeng, Kayin a vɛ e ji pyɛ̂ cap mɛ, a nára yɛ nɔrɔ vɔk na Dagwi Darwey.

⁴Ano arɔng Hɛvɛl a jut yi e ji vyel mɛ yemo de ba mɛsɛng tɔ, a yɛrɛ, ko a nára cɛ́k o yê sebwep nɔrɔ vɔk na yɛ. Dagwi Darwey a sey Hɛvɛl na nɔrɔ mɛ,

⁵ko a kyɛ́ ɛ Kayin na nɔrɔ mɛ. Yaga ano, Kayin a pu ɛ, a rɔgɔs bayis mɛ.

⁶Ko Dagwi Darwey a yang ɛ, “Hwà pu o sɛ́ arɛt? Hwà rɔgɔs bayis yaga sɛ́ ɛ?

⁷Ka hwà ra pyɛ de ya sé tyɛng, ko hwô kyè na to mō e gwi. Ko ka sede hwà ra tyɛng wɛt, nɛn ha sé sede cwey de ya sé gyeng, na ye hwo e ra hwo. Nɛn o ha simo na he vɔk reto e ra hwo, ko hwo, tik na hwo vɔk reto e ra hɛ.”

⁸Kayin a yâng gwa mɛ Hɛvɛl, “Wot wɔ́ e hey.”[10] Jeng de yɛn a sé e hwomo hey, Kayin a hwo e ra gwa mɛ Hɛvɛl, ko a mɔrɔ hɛ.

⁹Dagwi Darwey a yâng Kayin, “Gwà mō Hɛvɛl a sé e gwa arɛt?” Kayin a toyo a yɛ, “Ma tɔk wɛt. Ma sé lwêk gwa hom arɛt?”

¹⁰Ko Dagwi Darwey a yang ɛ, “E sɛ́ de hwà ra ɛ? Wok, nemî gwa mō de hwà mɔrɔ na sé tɛ̀ kun mō yi e vwel vey na me!

¹¹Yaga ano vwel hê kyini hwo: E ngamo nuyel hwô tɔk to how vwel o wɛt, yaga vwel o ha ga sɔ nemî gwa mō de hwà mɔrɔ.

¹²Ka hwà ka ye ngyɛ́k, na hwo how pyɛ́, ko vwel o hê nɔng o pyɛ cak wɛt. Hwô kyě rìni, vit a lɔ̂ sangal tɛk e jey.”

¹³Kayin a yâng Dagwi Darwey, “Tábak hom ha dal gap hom!

¹⁴Yunung hwà sé ro me yi e vwel o, ko mê to di bayis mō wɛt. Mê kyě rìni, vit a lɔ̂ sangal tɛk e jey, ko kawɛ mwat de a man na me, e mɔrɔ me zɔng.”

¹⁵Ko Dagwi Darwey a yang ɛ, “A sé ano wɛt. Ka sede mwat hwak a mɔrɔ hwo, ko bê tala hɛ na pyɛ de ya dal myo zang taama.” A to tɛ̀ a Kayin jɔt, yaga na ye sè pyɛ dura na kawɛ mwat de a man na yɛ, ko a mɔrɔ hɛ wɛt.

¹⁶Kayin a kyè yi e nuyêl Dagwi Darwey, ko a sangal e bak vwêl Nɔt,[11] e rwa rak e yɛnɛ̂ vwêl Ɛdɛn.

¹⁷Kayin a dyɛng na hwā mɛ, ko hwā mo a sey jim, a tɔ hwey wen de ba tang hɛ, à Ɛnɔk. E jeng o Kayin á sè lɔk repomo, ko a nɔng rɛ rezâ hwey o.

¹⁸Ɛnɔk a vɔk sɔ̄ mɛ Irat, ko Irat a sé dâ Mɛhuyayɛl, Mɛhuyayɛl a sé dâ Mɛtushayɛl, Mɛtushayɛl a sé dâ Lamɛk.

¹⁹Lamɛk a vɔk beha beba: wo mɛsɛng o, à Ada, ko wo neba, à Zila.

²⁰Ada a tɔ Yabal; Yabal o a sé dâ yére bemat de ba vɔk yas, de be to sangsal e buk.

²¹Yabal a vɔk gwa mɛ de ba tang ɛ, à Yubal. Yubal o a sé dâ yére bemat de be ra lɛlɛ na yōm kwo tanga jū.

²²Ko Zila arɔng a tɔ hwey de ba tâng hɛ, à Tubal-Kayin. Tubal-Kayin o a sé zu, ko a turu nekyɔrɔ̂k pyɛ́ na dyam pama tanga dyam. A vɔk gwà mɛ hwong o de ba tang ɛ, à Naama.

²³Lamɛk a ha a beha mɛ, a ye, “À dê Yabal, à dê Tubal-Kayin,[12] wet in betong, à beha hom, wok in pyɛ de mê ha a yin. Ma ga mɔrɔ mwat, yaga a ga tɛ̀ a me ram, ma ga wey na nekên wen, yaga a ga zére me.

²⁴Ka sede bê tala pyɛ de ba ra a Kayin zang taama, ko bê tala pyɛ de ba ra a me, Lamɛk, zang kuru bataama na hɛ taama.”

²⁵Adam a to dyɛng na hwā mɛ, ko a sey jim. A tɔ hwey wen, a ye, “Dagwi a ga nɔng me hwey e tô Hɛvɛl, yɛ wane de Kayin a kana mɔrɔ”, ko a vo a hɛ rezâ Shɛt.[13]

²⁶Shɛt arɔng a vɔk hwey wen, ko a vo a hɛ rezâ Ɛnɔsh. Jeng a yane de bemat ba hwo yila rezâ Dagwi Darwey e ji rê fongol mɛn.