Read berom Susumo 40 Bible Online

Susumo 40 - berom bible

Susumo 40

¹E bamâ jeng cak, bekwos bemat beba e ji bemât fwôm Farawo ba ra pyɛ́ de ya jam a yɛ wɛt, yɛn à mwât nɔngɔs hɛ nshî sɔ na mwât nuyêl bemât kyerês pyɛ́. Farawo a tɛ̀ shom na yɛn,

³ko a tɛ̀, be bang ɛn e lɔ̂ mwât nuyêl bemât gyeng lɔ mɛ, e kwɔn hining de ba bang ɛ Yɔsɛf.

⁴Ko mwât nuyel o mo a gang ɛn e vwɔ̂ Yɔsɛf, na a ra a yɛn kayɛ pyɛ. E bama de yɛn a ga vɛ́ jeng e lɔ̂ ngyang,

⁵ko mwât nɔngɔs nshî sɔ tanga mwât nuyêl bemât kyerês pyɛ́ ba ranas negwi e turuk hining o, kawɛ na nemɛ, ko kanɛ mo na cap-hâ nɛ̀.

⁶Jeng de Yɔsɛf a wɔ́ na yɛn nagasi, ko a di ɛn, ba sáa yɔɔm.

⁷A rangal hɛn, a ye, “E sɛ́ ya tɛ̀, yin a rɔgɔs bayis min yunung ɛ?”

⁸Yɛn a yang ɛ, “E negwi de na ranas hot, ko vit a mwat de e nɔng ot cap-hâ nɛ.” Ko Yɔsɛf a yang ɛn, “E Dagwi zɔng de e tɔk nɔng cap-hâ negwi! Há a me hin negwi min o.”

⁹Ano kwong, mwât nɔngɔs nshî sɔ a hwo ha a Yɔsɛf negwi mɛ, a ye, “E ji negwi hom, ma di retîn anap e nuyel hom;

¹⁰tin o ha vɔk ɛ nelang netat. Ha kana ros na túruk wɛt, ko ha pe paa shugu, ha pe tɔs nèy anap nevele mo.

¹¹Ma sé vɔk keshi sɔ̂ Farawo e vwɔ hom, ko ma jut nèy anap, ma piri nɛ e ji keshi mo, ko ma nára a yɛ kɛ e vwɔ mɛ.”

¹²Yɔsɛf a yang ɛ, “Cap-ha ma het ngan, nelang netat nane na sé nepɔlɔ netat.

¹³E pɔlɔ tat, Farawo a rɔda hàla hwo, ko e to toyo na hwo e fwom mō. Hwô to nɔngɔs hɛ keshi mɛ e vwɔ, tyɛng de hwá ragas e jeng de hwá sè rɔ̌ ra a yɛ fwom.

¹⁴Ko di, jeng de pyɛ́ ya to ɛ gyat na hwo, bare na me, na hwo dura a me nerat, na hwo tɛ̀ a Farawo za hom e fwong, yaga na be viri me yi e kwɔn hemo.

¹⁵Tsak o mwin, ba shigi me yi e sevwêl BeIbrani, ko e ngamo arɔng ma ra pyɛ cak de ya vey, na be tɛ̀ me e ngyang wɛt.”

¹⁶Jeng de mwât nuyêl bemât kyerês pyɛ́ a wok cap-ha mo ha sé rat, ko a yâng Yɔsɛf, “Me, e ji negwi hom arɔng, ma di bekow betat e rato hom.

¹⁷E ji kow de wa sé e tɛt o, ba tɛ̀ pyɛ̂ halang detidetu de be kyeres a Farawo, ko benon bá sè re yɛ.”

¹⁸Yɔsɛf a toyo a yɛ, a ye, “Cap-ha ma het ngan, bekow betat vane ba sé nepɔlɔ netat.

¹⁹E pɔlɔ tat, Farawo e tɛ̀ be yɛrɛ fwɔ mō, bê tɛ̀ rebek mō e ra swesêk cɔgɔt, ko benon kwong bê re banama mō.”

²⁰E pɔlɔ hê tat, tuk tɔ̂ Farawo ha doyo, ko a ra gbɔng nzem yaga mwa bemât nuyêl fwom mɛ. Ko a tɛ̀, be vey na mwât nɔngɔs nshî sɔ tanga mwât nuyêl bemât kyerês pyɛ́ e nuyêl bemât fwom mɛ.

²¹A to toyo na mwât nɔngɔs nshî sɔ e fwom mɛ, na a re nuyel na nɔngɔs hɛ keshi nshî sɔ.

²²Ko a tɛ̀, be wey na mwât nuyêl bemât kyerês pyɛ́, tyɛng na cap-ha de Yɔsɛf a ha a yɛn.

²³Ko yɛ mwât nɔngɔs nshî sɔ mo a bare na Yɔsɛf wɛt, a ye bam a hɛ.