Read berom Susumo 41 Bible Online

Susumo 41 - berom bible

Susumo 41

¹E bamâ neshey neba, Farawo a ranas negwi: a sé e tumal e kwogôm Gwɔrɔt Nil,

²ko di, berɔndɔng betaama berat vê mɔsɔ de ba sé biring-biring ba nusu, ba sé re sehwey e ji sere.

³Ko behak à berɔndɔng o betaama ba to nusu yi e ji gwɔrɔt o, ba sé gwɔshɔk, ngangajang, beves e bɛrɛng, ko ba tumal e hagat na vane de ba kana sé e tumal e kwogom.

⁴Ko di, berɔndɔng beves vane mo de ba sé gwɔshɔk ba re berat o mo de ba mɔsɔ. Ko Farawo a sene.

⁵Nevwa na to vo ɛ, a to ranas negwi ne neba: batô alkama bataama ba nusu e gbɛrɛng gwining, wa mara naka, wa sé gwim-gwim.

⁶E bamâ vɛ, bahak bataama ba nusu bagat na vere mo, ko neto mo na sé byaasas, na ga nɔshɔl yaga gul-rak de gwa pɛsɛl nɛ.

⁷Nè byaasas o na wɔlɔk batô alkama bataama de wa mara naka, de wa sé gwim-gwim. Ko Farawo a sene, ko sɛ̌ e negwi à nɛ.

⁸Nusu gasi, yey mɛ ya bɔrɔk hɛ, ko a tomo be wɔ̀ yishi mwa bevwoshon tanga bemât netsitsɛ̂ng Misra, a ha a yɛn negwi o, ko vit a hwak de a tɔk ha a yɛ cap-ha mo.

⁹Ko mwât nɔngɔs nshî sɔ a yâng Farawo, “À darwey, yunung ma rɔda kulu pyɛ́ vyes hom.

¹⁰Jeng de hwà kana tɛ̀ shom na me na mwât nuyêl bemât kyerês pyɛ́, ko hwà tɛ̀ ot e lɔ̂ ngyang de ha sé e lɔ̂ mwât nuyêl bemât gyeng lɔ mō.

¹¹Wot a ranas negwi e ji turuk hining o, kawɛ na nemɛ na yerê cap-ha nɛ.

¹²Wen BeIbrani hwak á sè tanga wot e hwomo, yɛ á sè sam mwât nuyêl bemât gyeng lɔ mō. Jeng de wot a ha a yɛ negwi mot, a misang a kawɛ cap-hâ negwi o nemɛ.

¹³Ko sede remo de a misang a wot cap-ha mo, ano de pyɛ́ mo ya ba tɛ́ ɛ. Me, ba toyo na me e fwom hom, ko gwining o ba wey na yɛ.”

¹⁴Yi ano, Farawo a tomo be wɔ̀ yila Yɔsɛf, ko ba pat ɛ ziri yi e duk ngyang. Ba hwon ɛ, a sege berugu mɛ, a vey e nuyêl Farawo.

¹⁵Ko Farawo a yâng Yɔsɛf, “Ma ranas negwi, ko vit a mwat de a tɔk ha a me cap-hâ negwi o. Ko ma wok ka sede hwà wok negwi, hwó tɔk misang cap-ha mo.”

¹⁶Yɔsɛf a toyo a yɛ, a ye, “À darwey, a sé e me wɛt, e Dagwi zɔng de a tɔk ra ano! E yɛ wɛ e dura a hwo nerat mɛ.”

¹⁷Ano kwong, Farawo a yâng Yɔsɛf, “E ji negwi hom, ma sé e tumal e kwogôm Gwɔrɔt Nil.

¹⁸Ko di, berɔndɔng betaama berat vê mɔsɔ de ba sé biring-biring ba nusu, bá sè re sehwey e ji sere.

¹⁹Ko behak à berɔndɔng o betaama ba to nusu arɔng de ba gyɔt, ba sé gwɔshɔk, ngangajang, beves e bɛrɛng, ma ga sang di yere mo ano e ji mwa sevwêl Misra wɛt.

²⁰Ko di, berɔndɔng beves vê gyɔt vane mo ba re betaama vê mɛsɛng o de ba mɔsɔ naka.

²¹Ko e bama de ba tala rê vɛ, mwat a ka tɔk, ba ga re pyɛ wɛt, yaga vit a sege hak na jeng de bá kana sè. Ko ma sene.

²²E negwi mo nehak, ma di batô alkama bataama ba nusu e gbɛrɛng gwining o, wa mara naka, wa sé gwim-gwim.

²³E bamâ vɛ bahak bataama ba nusu bagat na vere mo, ko neto mo na sé byaasas, na ga nɔshɔl yaga gul-rak de gwa pɛsɛl nɛ.

²⁴Nè byaasas o na wɔlɔk batô alkama bataama barat o mo. Ma ga há a bevwoshon negwi hom, ko vit a hwak e ji mɛn de a tɔk nɔng me cap-hâ nɛ.”

²⁵Yɔsɛf a yâng Farawo, “À darwey, negwi neba mō mo na sé pyɛ jining o. Dagwi a dura a hwo pyɛ de a sé kyè wɔ̀ ra.

²⁶Berɔndɔng betaama berat o ba sé neshey netaama; batô alkama bataama barat o arɔng ba sé neshey netaama, cap-ha mo ya sé pyɛ jining o.

²⁷Berɔndɔng betaama vê gyɔt, beves e bɛrɛng, de ba nusu e bama, ba sé neshey netaama; tyɛng ano na neto alkama de na sé byaasas, de na ga nɔshɔl yaga gul-rak: Mwa ba sé neshey netaama ne vyong.

²⁸A sé tyɛng sede remo de ma ga ha a hwo, à darwey: Dagwi a ga dura a hwo pyɛ́ de a sé kyè wɔ̀ yong ɛ́, na a ra.

²⁹Bê ra neshey netaama de pyɛ̂ re yê sè shɛrɛk sizɔng e yɛnɛ̂ sevwêl Misra mwa.

³⁰E bama mo, neshey netaama ne vyong nê raa, ba rɔda ye bam na neshey pyɛ́ shɛrɛk, vyong yê kyiri mwa sevwel o.

³¹Pyɛ̂ re de yá sè shɛrɛk bê to bare mɛ wɛt, yaga vyong de yê raa yê sè jɔgɔ wɛt.

³²Ko di, à darwey, sede remo de hwà ranas negwi nining o zang ba, hemo ha dura pyɛ de Dagwi a ga tɛ̀ e yey, na a ra, ko e jut jeng na a ra yɛ wɛt.

³³A remo, à darwey, tik na hwo kasa mwât netsitsɛng, womo de a vɔk tɔ́k na bɛ́rɛng nuyel, na hwo tɛ̀ ɛ wo nuyel e ji sevwêl Misra.

³⁴Ko hwo to tɛ̀ bemât bɛrɛng vwel o, na hwo gas sevwêl Misra zang tungun[62] e ji neshey netaama ne pyɛ́ shɛrɛk.

³⁵Tik na yɛn a tula pyɛ́ yê neshey nerat nemo de ne kyè vey mwa, na hwo nɔng ɛn reto, na be shusha, na be bang yɛ̄ e begban de ba sé e bapomo.

³⁶Pyɛ́ mo yê sè e begban yaga neshey netaama ne vyong de ne kyè vey e ra sevwêl Misra, yaga na vyong o ye kwon wey na vwel o wɛt.”

³⁷Redu de Yɔsɛf a vo a Farawo ra jam a yɛ tanga mwa bemât badu mɛ.

³⁸Farawo a yang ɛn, “Wot e to sɛ̀ mwat sede womo a? Dagwi a tɛ̀ gabik mɛ e ji yɛ!”

³⁹Ano kwong a yâng Yɔsɛf, “Dagwi a ga dura a hwo pyɛ́ yemo mwa: Yi ano, ma di, vit a mwat hwak de a vɔk netsitsɛng kɛ tɔk sede hwo.

⁴⁰Ma rɔda tik lɔ hom mwa e vwɔ mō, ko pyɛ́ de hwô nɔng nu, e yɛ̄ de bemat hom mwa ba rɔda ra, sɛ̌ yaga negwɔm zɔng de mê sè e nuyel mō.”

⁴¹A re nuyel, a ye, “Ma ga tɛ̀ o wo nuyel e mwa neyɛnɛ̂ sevwêl Misra.”

⁴²Ko a pat yɔbɔ̂ negwɔm yi e vwɔ mɛ, a tɛ̀ a Yɔsɛf e vwɔ, a tɛ̀, be tɛ̀ a yɛ yɔ̀m de ya pɛngɛ pes, ko a tɛ̀ lwɛlɛ̂ dyam shinang e fwɔ mɛ.

⁴³Ko a nɔng ɛ kyɛkyɛ̂ bedwa wo mwât sɛlɛ hɛ, na a yel ɛ, ko bemât gyeng mɛ ba kyè e yêl Yɔsɛf, ba mok, ba tē, “Nɔng in gwong!”[63] Ano de Farawo a tɛ̀ Yɔsɛf mwât sɛlɛ hɛ e ra mwa sevwêl Misra.

⁴⁴A yang ɛ, “Mwa ano de ma sé e gwofwa negwɔm, vit a mwat e ji mwa sevwêl Misra de e tɔk ra pyɛ cak wɛt sɛ̌ hwà nɔng ɛ nu.”

⁴⁵Ko a vo a Yɔsɛf rezâ Zafena-Paneya[64] a to ra a yɛ wenêng Asenat, hwông Pɔtifɛra, gwɔ̀m sekwit wo repomô On. Yi ano de ba tɔk, sevwêl Misra sa sé e vwɔ̂ Yɔsɛf.

⁴⁶Yɔsɛf a vɔk neshey kuru batat (30) jeng de a kaba fwom na Farawo, gbɔng gwɔ̀m Misra. Yɔsɛf a nusu, a wɔ̀ gwɔrɔ mwa sevwêl Misra, a bɛrɛng sɛ.

⁴⁷E jeng neshey netaama ne sirik, vwel ha nɔngɔs pyɛ́ polos.

⁴⁸Yɔsɛf a kyě tula yɛ̄ mwa, a bang yɛ̄ e begban bapomo; e ji begban karɛ repomo a bang ɛ̀ pyɛ́ de ya sé yê hiri de bà gwɔrɔ pomo mo.

⁴⁹Ano Yɔsɛf a tula pyɛ̂ yéneng polos sede bazɛ̂k rep, a tik nà masa yaga nepyak yɛ.

⁵⁰Gyam na neshey vyong ne vey, Yɔsɛf a vɔk nèy bewen neba na hwā mɛ Asenat, hwông Pɔtifɛra, gwɔ̀m sekwit wo repomô On.

⁵¹A ye, “Dagwi a ga tɛ̀, ma ga ye bam na mwa yɔ́m hom, ma ga ye bam na lɔ da hom arɔng”, ko a vo a hwêy negel o rezâ Manase.[65]

⁵²A to ye, “Dagwi a ga nɔng me nèy e ji sevwel de ba tak a me ɛ”, ko a vo a hwey o hê neba rezâ Ɛfrayim.[66]

⁵³Neshey netaama ne pyɛ́ polos e sevwêl Misra nà vey kwey,

⁵⁴ko neshey netaama ne vyong nà yel, tyɛng sede remo de Yɔsɛf a kana ha. Vyong ya sé e ra bwâng bavwel mwa, ko e ji sevwêl Misra pyɛ̂ re yá sɛ̀.

⁵⁵Jeng de BeMisra ba hwo wok vyong, ba wɔ̂ tosho a Farawo, ko a yang ɛn, “Ci in na Yɔsɛf, ko kayɛ pyɛ de e ha a yin, ko yin ra.”

⁵⁶Jeng de vyong o ya ga mɔrɔ mwa vwel, Yɔsɛf a wuma mwa begban, a tɛ̀ be paa pyɛ́ mo, na be rɛsɛl a BeMisra, yaga vyong yá sɛ̀ ding-ding.

⁵⁷Ko bemât jey mwa arɔng ba vɛ̀sɛ e Misra na Yɔsɛf, na be seres pyɛ̂ yéneng yaga vyong de ya ye pɔk à jey.