Read berom Susumo 44 Bible Online

Susumo 44 - berom bible

Susumo 44

¹Yɔsɛf a nɔ̂ng mwat de a vɔk nedirîk bɛrɛng lɔ mɛ nu, a yang ɛ, “Sila bèdap bemat o na pyɛ́ de bê tɔk jut, ko hwo tɛ̀ dyâm kawɛ mwat e ra pyɛ̂ gwodap mɛ.

²Tɛ̀ keshi sɔ hom kɛ dyam pyɛng e ra pyɛ̂ gwodap tashal mɛn, wuna kɛ tanga dyâm sêy pyɛ́ mɛ.” Sa mo a ra, sede remo de ba ha a yɛ.

³Sede gasi ha ye gbey, ba tɛ̀ ɛn e gwong na bemadung mɛn.

⁴Ba ga ka tik pomo yikyik wɛt, ko Yɔsɛf a yâng mwât bɛrɛng lɔ mɛ, “Sogo, raa bemat o, na hwo sɛ̀ ɛn!” Ko a ha a yɛ ha de e wɔ̀ ha a yɛn. Jeng de mwat o a sɛ̀ ɛn, a yang ɛn, “Yaga sɛ́ de yin a tala pyɛ́ ryat na vyes o arɛt? Yaga sɛ́ de yin a shigi keshi sɔ̂ dalɔ hom ke dyam pyɛng arɛt?[67] A sé e ji kɛ de dalɔ hom e sɔ ɛ; na kɛ kwong e rá mɛ vyoshon, yaga na a tɔk pyɛ́ de ye kyè vey. A sé pyɛ vyes, na yin ra ano!”

⁷Ko yɛn a ye, “À da, yaga sɛ́ de hwà ha yerê pyɛ sede yemo ɛ? Gwi gwo ro mɛ de wot e ra pyɛ sede yane!

⁸Hwà tɔk, wot á gà toyo yi e vwêl Kanaan na dyām de wot a sɛ̀ e ji bèdap mot. Yi e rɛ̌ de wot e shigi dyam pyɛng kɛ shinang yi e lɔ̂ darwey mō ɛ?

⁹Di, à da, mwat de ba sɛ̀ ɛ mɛ̀ e ji mot, bê mɔrɔ hɛ; bwang mot kwong, wot e tɛ́ ot besam mō.”

¹⁰Mwat o a toyo a yɛn, a ye, “Mwa ano de pyɛ́ de yin a sé ha yɛ̄ ya sé tyɛng, ko e mwat de ba sɛ̀ ɛ na pyɛ mo zɔng, yɛ wɛ de e tɛ́ ɛ sam hom, ko bwang min bê hàla hin washak.”

¹¹Ano, kawɛ e ji mɛn a ra dey-dey, a lol gwodap mɛ e vwel, a wunta gwɛ.

¹²Mwat o a pɛrɛ jáma mo yi e kunat mɛn, a yɛnɛ na tashal o, ko ba sɛ̀ keshi sɔ mo e ji dap Bɛnyamin.

¹³Yɛn a hama berugu mɛn, ko kawɛ a to tɛ̀ pyɛ́ mɛ e ra madung, ba to ɛn vɔk e ji repomo.

¹⁴Yɔsɛf á sè rɔngɔl e lɔ mɛ, jeng de Yuda tanga begwa mɛ ba wul. Yɛn a gaba gup e cât bol mɛ,

¹⁵ko Yɔsɛf a yang ɛn, “E sɛ̂ pyɛ ma yemo de yin a ra ano ɛ? Yin a tɔk wɛt a? Mwat sede me, bê tɔk lɛrɛ a me pyɛ cak wɛt, yaga me ra vyoshon.”

¹⁶Yuda a hanat, a ye, “Wot e yang o ala, à darwey mot ɛ? Wot a vɔk nuha hak a? Vit a gwong de wot e hywit ot. Dagwi a ga kulu pyɛ́ vyes mot. Di, wot a ga tɛ́ ot besam mō zɔng, à darwey, wot mwa na yɛ womo de ba sɛ̀ keshi sɔ mō na yɛ.”

¹⁷Ko Yɔsɛf a toyo a yɛ, a yang ɛ, “Tyɔng tyɔng wɛt, Dagwi a ro mɛ! Yɛ wane de ba sɛ̀ keshi sɔ mo na yɛ, e yɛ de e tɛ́ ɛ sam hom, bwang min yin kyè tyang vɔk na da min.”

¹⁸Yuda kwong a gwɛ̌ sek bagat na Yɔsɛf, a ye, “À darwey hom, simo a me, na me hanat na hwo. Hwo tɛ̀ shom na me wɛt, mwa ano de hwà sé tyɛng na Farawo.”

¹⁹À darwey, hwà kana rangal hot, wot a vɔk da kɛ gwà mot hwak arɛt?

²⁰Wot a ha a hwo, wot a vɔk da mot de a ga kwop, na hwêy kwopa mɛ tashal o, de gwà jim mɛ a ga ku. Yɛ nju mɛ de a sé e dē mɛ, ko yɛ̀ a yêy da mɛ.

²¹Hwà to yang ot, wot vey a hwo na yɛ, na hwo di ɛ.

²²Ko wot a ha a hwo, wen o e tɔk hàla da mɛ wɛt, yaga ka sede a hàla hɛ, da mo e kyè wɔ̀ ku.

²³Ko hwà ye, ka tashal mot a vey tanga wot wɛt, ko wot e to man bayis na hwo wɛt.

²⁴Jeng de wot a toyo na da mot, ko wot a ha a yɛ pyɛ̂ mwa de hwà ha.

²⁵E bamâ jeng, da mot a yang ot, wot kyè wɔ̀ sey a wot pyɛ̂ re.

²⁶Ko wot a yang ɛ, wot e tɔk wɔ wɛt, sɛ̌ tashal mot a sé tanga wot, yaga wot a rɔda tɔk di WoMisra mo wɛt sana tashal mot.

²⁷Ko da mot a yang ot, wot a tɔk, bewen beba zɔng de hwā mɛ Rahɛl a tɔ a yɛ.

²⁸Ko gwining a ga tik ɛ, e sè ngyama zɔng de ya ga wey na yɛ, yaga a to di ɛ wɛt.

²⁹Ko ka wot a to jut womo yi na yɛ kwong, gyeng gawey hak hê sɛ̀ ɛ, ko wot e tɛ̀ da mot, a ku vwen.

³⁰“A remo, à darwey, ka sede ma toyô wɔ na da hom sana wen o, ko da hom a di, vit a hwey o na me, a rɔda ku. Di, yey mɛ ya sé pang na yɛ̂ hwey o; sede remo de a ga kwop kpushuk, yêy lashe de wot e vey a yɛ mɛ̀, yê tɛ̀ ɛ, a ku.

³²Ko di, à darwey, me, sam mō, ma ga tumal yaga wen o e tē hom na da hom. Ma yang ɛ, ka sede ma toyo na hwey o na yɛ wɛt, ko renɛn o rê sè e ra me gbak-gbak.

³³Ká a remo, à darwey, tik na me tɛ́ me sam mō e retô wen o, ko hwo tik wen o, a toyo na begwa mɛ.

³⁴Di, yi e rɛ̌ de ma rɔda toyo vɔk na da hom sana hwey o ɛ? Mê kyɛm me niri na dî pyɛ vyes de yê té na da hom wɛt.”