Read berom Susumo 45 Bible Online

Susumo 45 - berom bible

Susumo 45

¹Yɔsɛf a tɔk to niri wɛt. A nɔng nu, na mwa BeMisra be nusu. Yi ano, mwat duk hwak á sɛ̀ wɛt, jeng de a ha a begwa mɛ mwat de yɛ a sé.

²A hwo tosho na gbɔng fwɔ, ko BeMisra ba tɔk wok, ko ha mo ha wɔ̀ wul lɔ Farawo.

³Yɔsɛf a yâng begwa mɛ, “Me wɛ a Yɔsɛf! Da hom a rɔngɔl kwen arɛt?” Ko begwa mɛ ba ye lot, yɛn a tɔk toyo a yɛ na ha wɛt.

⁴Yɔsɛf a yang ɛn, “Gwɛ̌ sek in bagat vey na me.” Ko jeng de ba gwɛ̌ sek, a to ye, “Ma sé gwà min Yɔsɛf, de yin a kana row vɔk e Misra!

⁵A remo, yin kwon beseng neyey min wɛt, yin tɛ̀ a bato min ɛ nɛ̂n row me vey e ngamo wɛt. A sé e Dagwi de a ga tomo me e nuyel min vey e ngamo e Misra, na a sey mɛ̀ nekên bemat.

⁶Shey hê neba a hemo de vyong ya sé e vwel o, ko bwâng neshey netungun de vit a how cap, vit a bwal.

⁷Dagwi a tomo me e nuyel min, yaga na a sey neken min e gwong gwô langat gwomo, yaga na yére min ye re nuyel na sangal e jey.

⁸Ko di, mwin a sé e yin de yin a tomo me vey e ngamo wɛt, ko e Dagwi wɛ. A ga tɛ̀ me da na Farawo, a tik lɔ mɛ e vwɔ hom, ko a tɛ̀, ma sé re negwɔm e ra mwa sevwêl Misra.

⁹To in ziri vɔk na da hom, na yin yang ɛ, a wok pyɛ de hwey mɛ Yɔsɛf ha ha a yɛ: ‘Dagwi a ga tɛ̀, ma sé re negwɔm mwâ sevwêl Misra. Vèy na me, hwo lashe jeng wɛt!

¹⁰Hwo vɔk ɛ nèy mō, na nèy nèy mō, na karâ vyēl tanga berɔndɔng mō, tanga pyɛ̂ mwa de ya sé myo. Hwà rɔda sangal e bak vwêl Gɔshɛn, kwɔn de hwô sè bagat na me.

¹¹E hwomo de ma rɔda nɔngɔs hin pyɛ́ yaga bwâng neshey netungun ne vyong de na rɔngɔl. Yi ano, hwo, na belɔ mō mwa, tanga yas min, yin a rɔda bidɛ pyɛ cak wɛt.’ ”

¹²Yɔsɛf a re nuyel, a yâng begwa mɛ, “A remo yin a ga di na bayis min, Bɛnyamin arɔng a ga di, a sé e me de ma sé ha na yin.

¹³Há in a da hom e ra gbɔng nerey de ma vɔk e Misra, na pyɛ̂ mwa de yin a ga di. Ko ra in ziri, na yin vey na da hom e ngamo!”

¹⁴Ko a kula gwà mɛ Bɛnyamin e gey, ko a tosho, Bɛnyamin arɔng a tosho.

¹⁵A man ranang na begwa mɛ mwa, a sè tosho. Jeng a yane zɔng de begwa mɛ ba tɔk ha na yɛ.

¹⁶Reha mo ra wɔ̀ wul e lɔ Farawo wɔgɔ, begwa Yɔsɛf ba ga vey. Yey Farawo tanga bemât badu mɛ ya pɛngɛ sizɔng.

¹⁷Ko Farawo a tomo, be wɔ yila Yɔsɛf, a yang ɛ, “Há a begwa mō, be tɛ̀ a bemadung mɛn pyɛ́, na yɛn a kyè a remo vɔk e sevwêl Kanaan.

¹⁸Tik na yɛn a jut da mɛn tanga belɔ mɛn mwa, yɛn kyè vey na me, ma rɔda nɔ́ng ɛn bak vwel de wa dal na nerat e Misra, yɛn a rɔda re netâ vwel o.

¹⁹To ha a yɛn, be jut bekyɛkyɛ̂ behywarak yi e ngamo yaga jût nèy tanga beha mɛn, yɛn a vey na yɛn e ngamo tanga da mɛn.

²⁰Yɛn a re yɔ̂m vey na pyɛ́ mɛn wɛt, yaga pyɛ́ de ya dal na nerat mwa e vwêl Misra yê tɛ́ ɛ myɛn.”

²¹Nèy Yakɔp na ra tyɛng ano. Yɔsɛf a nɔng ɛn bekyɛkyɛ, sede remo de Farawo a nɔng ɛ nu, ko a nɔng ɛn pyɛ̂ re yaga gwong.

²²A nɔ̂ng kawɛ e ji mɛn gworugu de e tɔrɔ hɛ mɛ, ko a nɔ̂ng Bɛnyamin dyām pyɛng naga betat (300) tanga berugû tɔrɔ hɛ betungun.

²³Ko a tomo a da mɛ na pyɛ́ yet ngan: Bemadung kuru de ba tɛ̀ a vɛ pyɛ́ ryat yê Misra, tanga shêp madung kuru de ba tɛ̀ a yɛ ɛ̀ pyɛ̂ yéneng, na kpam-tuk, na pyɛ̂ re cak yaga gwong.

²⁴Sede a tɛ̀ begwa mɛ e gwong, a yang ɛn, “Yin tow nu na bemin e gwong wɛt.”

²⁵Yɛn a sogo yi e Misra, ba kyè, ba wɔ̀ wul na da mɛn Yakɔp e sevwêl Kanaan.

²⁶Ko ba ha a yɛ, “Yɔsɛf a sé kwen! E yɛ de a sé re negwɔm mwâ sevwêl Misra!” Nemi na ga a yɛ e yey, ko a sey tsak o wɛt.

²⁷E bama de ba misang a yɛ mwa pyɛ́ de Yɔsɛf a ha a yɛn, ko a di bekyɛkyɛ de Yɔsɛf a tomo na be jut ɛ mɛ vɔk na yɛ, a yang ɛ hagalak.

²⁸A ye, “Hwey hom Yɔsɛf ha sé na neken! Ma rɔda kyè, na me wɔ̀ di ɛ gyam na me de ku!”