Read berom Susumo 47 Bible Online

Susumo 47 - berom bible

Susumo 47

¹Ano kwong, Yɔsɛf a kasa betungun e ji begwa mɛ, a wɔ́ na Farawo, a ye, “À da, da hom, na begwa hom, na kara mɛn ve vyēl na berɔndɔng, tanga mwa pyɛ́ de ya sé myɛn, ba ga vey yi e sevwêl Kanaan, ko a remo ba sé e bak vwêl Gɔshɛn.” Ko a dura a Farawo begwa mo.

³Farawo a rangal hɛn, a ye, “Fwom min a sɛ́ arɛt?” Yɛn a toyo a yɛ, ba ye, “À darwey, wot a sé bemât gyeng yas, sede remo de bedabeda mot bá sè.”

⁴Yɛn a re nuyel, ba ye, “Wot a vêy sangâl rekyɛn e ji sevwel semo, yaga vyong de ya sé ding-ding e ji sevwêl Kanaan; vit a kwɔ̂n gyeng yas mot. Yaga ano, à darwey, ka sede hwà simo, ko tik ot, wot sangal e bak vwêl Gɔshɛn.”

⁵Ko Farawo a yâng Yɔsɛf, “A remo de da mō tanga begwa mō ba ga vey na hwo,

⁶di, sevwêl Misra sa sé semo, tik da mō na begwa mō be sangal e bak vwel de ha dal na nerat, tik na be sangal e bak vwêl Gɔshɛn. Ko ka sede e ji mɛn behak ba sɛ́ de yɛn a tɔk fwom o naka, tik ɛn, na yɛn a bɛrɛng berɔndɔng hom arɔng.”

⁷Yɔsɛf kwong a vey na da mɛ Yakɔp, na a dura a Farawo hɛ. A yel na yɛ e nuyêl Farawo, ko Yakɔp a kyul ɛ.

⁸Farawo a rangal hɛ, a ye, “Neshey tɔ́ mo e jey na sé ala?”

⁹Yakɔp a yang ɛ, “Neshey rekyɛn hom na sé naga na kuru batat (130). Na sé pyak wɛt, nà sila na yɔ́m, ko na ka wul neshey kwɛngɛl rekyɛn de bedabeda hom bá ra e jeng mɛn wɛt.”

¹⁰Ko a tɛ̀ a Farawo netyang, a nusu yi e nuyel mɛ.

¹¹Ano kwong, Yɔsɛf a nɔ̂ng da mɛ tanga begwa mɛ kwɔ̂n sangal e sevwêl Misra, na he sè nap mɛn. Kwɔn o ha sé bak vwel de ha dal mwa na nerat e bak repomô Ramɛsɛs, sede remo de Farawo a nɔng ɛ nu.

¹²Ko Yɔsɛf a nɔ̂ng da mɛ, na begwa mɛ, tanga mwa lɔ̂ da mɛ pyɛ̂ re tyɛng na nepyak nèy mɛn.

¹³Vyong o ya gwɛ̌ hɛ ding-ding, vit a pyɛ̂ re e jey, ko bemât Misra na Kanaan ba sé sangal yɔɔm yaga yɛ.

¹⁴Ko ba tɔk sey pyɛ́ na dyām yi na Yɔsɛf. Ano de Yɔsɛf a tula mwa dyām de ba sɛ̀ e bavwêl Misra na Kanaan, a wɔ́ mɛ̀ e lɔ Farawo.

¹⁵Jeng de ba ga wey na dyām mɛn mwa, ko mwa BeMisra ba vey na Yɔsɛf, ba ye, “Nɔng ot pyɛ̂ re! Kɛ hwó simo, wot weres e bayis mo a? Dyām mot ya ga tala hɛ!”

¹⁶Ko Yɔsɛf a yang ɛn, “Ka sede vit a hin na dyām, vey in na yas min, ko ma rɔda row a yin pyɛ̂ re e tô yas o.”

¹⁷Ano de yɛn a vey á Yɔsɛf na yas mɛn, ko yɛ a nɔng ɛn pyɛ̂ re e tô bedwa, na karâ vyēl na berɔndɔng, tanga bemadung o; ano de a nɔng ɛn pyɛ̂ re e tô yas mɛn e shey hane mo.

¹⁸Jeng de shey o ha tala hɛ, bemat o ba to vey na Yɔsɛf, ba yang ɛ, “À darwey, wot e tono a hwo wɛt, vit a hot na dyām, ko yas mot ya ga tɛ́ ɛ myo. A remo, à darwey, wot na cāp mot zɔng de wot a tɛt ɛ.

¹⁹Yaga sɛ́ de hwô tik, na wot wey e bayis mō, na cāp mot ye wey arɔng ɛ? Jut ot na cāp mot e tô pyɛ̂ re, ko wot e tɛ́ ot besam Farawo, cāp mot arɔng yê tɛ́ ɛ myɛ. Nɔng ot yére, na wot nàra beken, ko cāp mot arɔng ya rɔda wey wɛt.”

²⁰Yaga vyong de ya sé e ra BeMisra ding-ding, yɛn a rɛsɛl a Yɔsɛf hiri mɛn mwa. Yi ano de Yɔsɛf a sey a Farawo hiri mo, ko ano de mwa sevwêl Misra sa tɛ́ ɛ sê Farawo.

²¹Ko Yɔsɛf a tɛ̀ bemât neyɛnɛ̂ sevwel o mwa e ji fwôm sesam.[70]

²²Sɛ̌ câp bemât sekwit zɔng de a sey yɛ̄ wɛt. A sè a yɛn gbing-gbing na be row cāp mɛn wɛt, yaga Farawo a kana yɛrɛ a yɛn pyɛ́ de a nɔngɔs hɛn, ko e yɛ̄ de yɛn e reres.

²³Yɔsɛf a yâng BeMisra, “Di in, yunung ma ga séy a Farawo hin tanga cāp min. A remo, ná in yére, na yin bere.

²⁴Ko nahywɛp, yin a rɔda nɔ̂ng Farawo pyɛ jining e ji pyɛ́ tyungun. Bwâng nyaas yê sè myin yaga yére na pyɛ̂ re yaga yin tanga mwa belɔ min arɔng.”

²⁵Bemat o ba ye, “Hwà ga sey neken mot! Ka sede a jam a hwo, à darwey, ko wot e tɛ́ ot besam Farawo.”

²⁶Ano kwong, Yɔsɛf a tɛ̀ redu wɔgɔ, e ji mwa sevwêl Misra pyɛ jining e ji pyɛ́ tyungun yê cāp yê sè yê Farawo. Redu mo ra rɔngɔl ɛ vey e yunung. Ko sɛ̌ câp bemât sekwit zɔng de ya tɛ́ ɛ yê Farawo wɛt.

²⁷A sé ano de BeIsrayɛl, yerê Yakɔp, ba sangal e sevwêl Misra, e bak vwêl Gɔshɛn, ko yɛn a sey vwel de ha tɛ́ ɛ benap mɛn; yɛn a tɔs nèy, ko ba gwɛsɛ hɛn ding-ding.

²⁸Yakɔp a sangal e Misra neshey kuru na nɛ netaama; neshey mɛ mwa na tɛ́ ɛn naga gwining na kuru banaas na nɛ netaama (147).

²⁹Jeng de Yakɔp a vey bagât ku, a yila hwey mɛ Yɔsɛf, ko a yang ɛ, “Ka sede hwó simo, ko tɛ̀ vwɔ mō e sɔ̂s tà hom, na hwo sira, hwô dura nerat vey na me. Hwo lɛrɛ me e Misra wɛt.

³⁰Jeng de mê wɔ̀ sɛ̀ beda hom, jut me yi e ngamo, na hwo wɔ̀ lɛrɛ me e kwɔn mɛn.” Yɔsɛf a toyo a yɛ, a ye, “Ma rɔda ra sede remo de hwà ga ha.”

³¹Yakɔp a yang ɛ, “Sira a me mwin”, ko Yɔsɛf a sira a yɛ. Ko Yakɔp a ye det à to mɛ e ra gwat mɛ.[71]