Read berom Susumo 49 Bible Online

Susumo 49 - berom bible

Susumo 49

¹A vane ano, Yakɔp a yila nèy mɛ bewen o, a ye, “Tula hin, na me bin ha a yin pyɛ́ de yê sɛ̀ in e jeng de ye kyè vey.[72]

²“Tula hin, na yin wok, a nèy hom, wet in betong na ha hom.

³À Rubɛn, hwêy negel hom, negak hom, tɔ̂ mɛsɛng e ji newen hom, hwà dal na nerey, hwà to dal na gap arɔng.

⁴Ko hwà rɔda to sè wo nuyel wɛt, hwo de hwó ra dedɛngɛ sede nshi, yaga hwà dyɛng e ra gwat hom, ko hwà tɛ̀ gwɛ ligis.

⁵À Simɛyɔn na Levi, yin a sé pyɛ jining, bewâl como min ba sé pyɛ̂ sogô nehywɛ.

⁶Ma rɔda wuna badu tanga yin wɛt, be kwon bara me e ji tula min wɛt, yaga yin a mɔbɔs bemat e ji shom, na garen yin a tow berinîs behywarak.

⁷Gawey e ra yin, yaga shôm lolong min, shom de vit à toshô reyɔm. Ma rɔda gas in yi na bemin, ko mê shara hin e ji sevwêl Israyɛl.

⁸À Yuda, hwo wɛ de begwa mō bê somo, bê tē guduruk e nuyel mō. Hwô kaba bemât repugu mō e ra fwɔ, hwo ngyɔklɔ hɛn e vwel.

⁹Hwà sé sede hwêy gukum, de ha to hɛ́ na ngyama vɔk e fwara. Hwó dyɛng wulum e vwel sede gukum, gwɔ̀m ngyāma, wà de e kyɛm, a ra ɛ arɛt?

¹⁰Kpin tanga gwelê negwɔm bê nàra na hwo, yi e yere mō de bê kasa ɛ̀ begwɔ̀m. Yére bemât jey yê dyɛng to mɛn na hwo, yê tala a hwo pyɛ́ de ba tɛ̀ a yɛn.[73]

¹¹E jeng negwɔm mō pyɛ́ yê sè shɛrɛk: e ka sè a hwo pyɛ cak wɛt, na hwo rɔgɔs hwêy madung mō e tîn anap, kɛ ha ka sé rat o, ow. Ka hwà simo, hwô tɔk kus rugu mō e nshî anap, yaga nà sé a hwo bɛs.

¹²Yéneng bayis mō ya sé wɛng-wɛng na nshî anap, yìn mō be pɛngɛ pes yi na sɔ̂ nevasâl rɔndɔng.

¹³À Zɛbulun, hwô sangal e kwogôm gbɔng rep; e hwomo bedwa-nshi ba rɔda sɛ̀ kwɔ̂n pɔngɔ rat, ko sevwel mō sê yɛnɛ hɛ e Sidɔn.

¹⁴À Isakar, hwo à madung de wó kyè kwɛngɛl rekyɛn, hwó sangsal e hêy-bedwa.

¹⁵Sede hwà di, hwà ga sɛ̀ kwɔ̂n sangal tyang, vwel o arɔng ha jam a hwo sizɔng, hwà ye kwot, ko hwà simo râ fwôm retek.

¹⁶À Dan, hwà rɔda re negwɔm e ra bemat mō, sede hwak e ji yerê Israyɛl.

¹⁷Hwà rɔda sè gwɔ̄m e vwâ gwong, gàbak e gwông bol, wo roros batô bol dwa, yaga na wo werek mwât laga wɛ na bama.

¹⁸À Dagwi Darwey, ma sé gyeng, na hwo sey me!

¹⁹À Gat, bemât jugu bê hwo e ra hwo, ko hwà rɔda hywit o, hwô ro ɛn.

²⁰Hirî Ashɛr bê nɔngɔs pyɛ́ shɛrɛk, e ji mo bê sɛ̀ pyɛ̂ re ryat yerê ye lɔ gwɔ̀m.

²¹À Naftali, hwà sé vow de ba hàla wɛ, womo de wo tɔs nèy nerat.

²²À Yɔsɛf, hwà sé madûng hey, madûng hey e lwel nshi, e hagât rahwol.

²³Bemât gbang ba sogo e ra hwo na shom, ba tabas hwo, ba shɔk a hwo jim vɛt.

²⁴Ko Mwât gap a kwɔrɔs begbang mɛn o; berinîs vɔ mɛn ba tuyu hɛn, yi na Dagwi wo Yakɔp de a Vɔk Reto, yɛ Mwât gyeng na gyêp Israyɛl.

²⁵A sé e Dagwi wo da mō de e sɛlsɛ hwo, Dagwi Wo Retô Mwa de e tɛ̀sɛ a hwo nerat. E nɔngɔs hwo rwak yi e larwak, nshî lel yi e vwel ciwil, hiri mō bê sɛ̀ pyɛ́ pyak, e tɛ̀sɛ beha min na yas min, be sɛ̀ nèy pyak arɔng.

²⁶Nerat de me, da mō, ma sé tɛ̀ e ra hwo na dal nerat ne bedabeda hom: yɛn a sé a me sede beraku de ba sé e tɛt o, be nàra gbak-gbak, nerat mō na dal vɛ mwa. Tik na nerat nemo ne raa hwo, tik na ne sǎ e ra hwo, hwo de ba tik detu yi na begwa mō.

²⁷À Bɛnyamin, hwà sé bwá de vit à jɔgɔ: bop nagasi hwó re bemât repugu mō e como, nawiri hwó gas pyɛ́ de hwà hashe.”

²⁸Mwa vemo ba sé yére kuru na yɛ bya yê BeIsrayɛl, ko pyɛ́ ma yane de da mɛn a ha a yɛn, jeng de a sé tɛ̀ a kawɛ nerat, a nɔ̂ng kawɛ mo nerat de na jam yaga yɛ.

²⁹E bama mo, Yakɔp a nɔ̂ng nèy mɛ nu, a yang ɛn, “Di in, ma sé kyè wɔ̀ sɛ̀ beda hom. Lɛrɛ me hin tanga beda hom e fwara gwomo de gwa sé e cwɛ̂l Makpɛla, e rwa rak na Mamrɛ e sevwêl Kanaan, gwomo de Abraham á kana sey yi na Ɛfrɔn, WoHiti, yaga kwɔ̂n besak.

³¹A sé e hwomo de ba lɛrɛ ɛ̀ Abraham na hwā mɛ Sara; e kwɔn a hane de ba to lɛrɛ ɛ̀ Yishak na hwā mɛ Rɛbɛka; ko e hwomo de ma lɛrɛ ɛ̀ Leya arɔng.

³²Cwɛl o na fwara mo de gwa sé e ji gwɛ, ba sey yi na BeHiti.”

³³Jeng de a yɛnɛ ha a nèy mɛ, ko a dyɛng e ra gwat, a vo nesong yɛnɛ mo, ko a wɔ̀ sɛ̀ beda mɛ.