Read berom Susumo 50 Bible Online

Susumo 50 - berom bible

Susumo 50

¹Ko Yɔsɛf a gaba e ra da mɛ, a sè tosho, a sè suyu a yɛ nu.

²E bama mo, a nɔ̂ng bevwoshon de be ragas a yɛ fwom nu, na yɛn a tɛ̀ á revîn da mɛ hwâl dûl bɔsɔ, ko ba ra ano.

³Ba sila nepɔlɔ kuru banaas e de ra mo, sede remo de be ragas. BeMisra ba tosho hɛ nepɔlɔ kuru bataama (70).

⁴Jeng de nepɔlɔ mo na ga kwey, ko Yɔsɛf a ha na bemât badu Farawo, a ye, “Ka sede yin a simo, yin wɔ̀ ha a Farawo. Yang in hɛ,

⁵gyam na da hom a ku, á kana tɛ̀, me sira a yɛ, ma rɔda lɛrɛ hɛ e ji sak de a kana yong yaga tó mɛ e sevwêl Kanaan. A remo, sede a simo a me, ko a tik, na me kyè wɔ̀ lɛrɛ da hom, na me to toyo.”

⁶Jeng de Farawo a wok, a tomo be ha a yɛ, a kyè, na a wɔ̀ lɛrɛ da mɛ, sede remo de a ga kana sira.

⁷Ano, Yɔsɛf a kyè wɔ̀ lɛrɛ da mɛ, ko bemât badu Farawo na bemakuk mɛ, tanga bwâng bemakuk mwa vê sevwêl Misra, ba kyè tanga yɛ.

⁸Mwa belɔ mɛ, na begwa mɛ tanga belɔ mɛn ba kyè arɔng, sɛ̌ nèy na yas de ba tik ɛn e bak vwêl Gɔshɛn.

⁹Bemât bekyɛkyɛ̂ bedwa na bemât bedwa ba raa hɛn arɔng, gwaku mɛn.

¹⁰Jeng de yɛn a wul gazû Atat de wa sé e rwa rak na Yɔrdan, ko yɛn a tosho ding-ding e hwomo, ba ra lwɛlɛ̂ sesin yaga da mɛn, ko Yɔsɛf a gyeng nepɔlɔ netaama ne sesîn da mɛ e hwomo.

¹¹Sede BeKanaan de ba sé sangal e sevwel o ba di sesin de ba tosho e kwɔ̂n gazû Atat, ko ba ye, “Mwin, reku remo rà rá a BeMisra yey ding-ding!” Yaga ano, ba yâng rezâ kwɔn o à Sesîn BeMisra. Kwɔn o ha sé e rwa rak na Yɔrdan.

¹²Ano de nèy Yakɔp na ra a yɛ tyɛng na pyɛ de a kana nɔng ɛn nu.

¹³Nà kyè na yɛ vɔk e sevwêl Kanaan, ko ba lɛrɛ hɛ e hwomo e fwara, e cwɛ̂l Makpɛla de gwa sé e rwa rak na Mamrɛ, gwomo de Abraham à kana sey yaga kwɔ̂n besak yi na Ɛfrɔn, WoHiti.

¹⁴E bama de Yɔsɛf a lɛrɛ da mɛ, a toyo vɔk e Misra, yɛ na begwa mɛ, na vemo mwa de ba kana kyè tanga yɛ wɔ e de lɛrɛ̂ da mɛ.

¹⁵A remo de da mɛn a ga ku, begwa Yɔsɛf ba tɛ̀ bengyip, ba ye, “Gyeng Yɔsɛf e rɔ̌ ra repugu na wot, ko e tala hot pyɛ́ vyes de wot a kana ra a yɛ!”

¹⁶Yaga ano, yɛn a tomo vɔk na Yɔsɛf, ba ye, “Gyam na mwakuk mō a ku, a nɔng ot nu, a ye,

¹⁷wot ra won na hwo, na hwo hàla a begwa mō renɛn de ba ra a hwo, ves o. Yaga ano, wot a sé dak gabɔk na hwo e ji rezâ Dagwi wo da mō, de wot arɔng wot e re a yɛ fongol, hàla a wot renɛn mot!” Ko Yɔsɛf a hwo tosho, jeng de a sey ha mɛn o.

¹⁸Begwa mɛ kwong ba vey, ba gaba gup e vwel e nuyel mɛ, ba ye, “Di, wot a sé besam mō.”

¹⁹Ko Yɔsɛf a yang ɛn, “Yin wok bengyip wɛt, me ma sé e tô Dagwi wɛt.

²⁰Ko di, yin a yong gwong nengyas yaga me, ko Dagwi a tɛ̀, gwa tɛ́ ɛ nerat, na a bin sey nekên bemat pyak, sede remo de wot a ga di.

²¹Yaga ano, yin wok bengyip wɛt. Ma rɔda nɔng in tanga nèy min pyɛ́.” Ano de a wɔrɔk hɛn na neha dyɛ̂ng yey.

²²Yɔsɛf a sangal e Misra tanga belɔ da mɛ, a wul neshey naga na nɛ kuru (110) e jey.

²³A di nèy nèy nèy hwey mɛ Ɛfrayim; a vɔk nèy Makir, hwêy Manase, e vwɔ mɛ arɔng, ko lɔ ha gwɛ̌ hɛ.

²⁴E bamâ jeng, Yɔsɛf a hwo yâng begwa mɛ, “Ma sé e nû reku. Ko ma tɔk mwin, Dagwi a rɔda vey sɛlɛ hin. Ê toyo na yin vɔk e sevwel de á kana sira a Abraham, Yishak tanga Yakɔp.

²⁵Jeng de Dagwi a rɔda ba ra ano, tik na yin ba hashe bekup hom yi e ngamo.” Ko a tɛ̀ ɛn, be sira ano mwin.

²⁶Yɔsɛf a ku, a vɔk neshey naga na nɛ kuru (110). Ba tɛ̀ a revin mɛ hwâl dûl bɔsɔ, ko ba lasha hɛ e kundung bavin e Misra.