Read berom Susumo 6 Bible Online

Susumo 6 - berom bible

Susumo 6

¹Bemat ba hwo gwɛ̌ hɛn pyak e jey. E jeng yane mo, nèy lagwi na di behwong de ba tɔs a bemat o ba sé bezɛrɛ mo, ko na kasa a bato nɛ vinde na tɛ̀ yey na yɛn, na ne ra weneng mɛn.

³Ko Dagwi Darwey a ye, “Ma rɔda to tik mwasi, na a nàra kwen nesheneshey wɛt, yaga yɛ a sé wo reku. Ma rɔda tik ɛ a ros, na a dal neshey naga na kuru baba (120) wɛt.”

⁴E jeng yane mo, ko vɔk e jeng cak arɔng, ba sɛ̀ bemat de ba sé hwɔk e jey. Yɛn vɛ, à yere de behâ bemat ba tɔs a nèy lagwi. Yɛn vɛ, à beras vê raane de ba vɔk gbɔng za.

⁵Dagwi Darwey a di pyɛ́ vyês bemasi ya kat, mwa bare na tomong mɛn ba sé ves zɔng kayɛ jeng.

⁶Ko a lashe yey, a ye tɔk ano de a yong mwasi. Pyɛ mo ya shɔk a yɛ yey ding-ding,

⁷ko a ye, “Ma rɔda wey na bemasi e jey, bemasi mwa na ngyāma, na benon, yaga yey hom ye lashe hɛ de ma yong ɛn.”

⁸Ko Nowa a sɛ̀ nerat e bayîs Dagwi Darwey.

⁹Rehâ Nowa a remo: Nowa á sè cik, á sila gyat e sangal na bemât jeng mɛ, ko á sè sangal e ji nesa na Dagwi.

¹⁰A vɔk nèy bewen netat: Shɛm, na Ham tanga Yafɛt.

¹¹Ko bwang bemât mwa ba sé beves e bayis Dagwi, ba ragas neves kagwa, ko ba kyɛ́ ɛn gyeng badu.

¹²Dagwi a di jey, ko ya ga lashe hɛ, yaga mwa bemat bá sè sangal e ji neves zɔng.

¹³A yâng Nowa, “Ma ga tɛ̀ e yey hom, na me yɛnɛ na bemasi mwa. Ma sé kyè wɔ̀ wey na yɛn, mwa na jey, yaga tomong ves mɛn ba kat e jey.

¹⁴Yong a to mō gwokundung na cɔ́gɔt yê gbarak, de gwô sè a hwo sede dwa-nshi. Tɛ̀ bezɔrɔk e ji gwɛ, ko hwo lolom ji mo na bama mo na kwolta.

¹⁵Yong gwɛ nelis o mita naga na kuru batungun (150), netes o mita kuru baba na vɛ betungun (25), ko nelis o vɔk e rak o mita kuru na vɛ betungun (15).

¹⁶Jeng de hwô yong pyɛ banga gwokundung o, gwɛ̌ rebit mita e tē mo, na ye se garang. Yong gwɛ na gwo vɔk lɔ̂ vwel o, na hê tē, ko hê netat he sè hê yɛnɛ mo, ko hwo tɛ̀ rwi mo e hagât gwɛ.

¹⁷Yaga di, ma sé kyè wɔ tomo na gbɔng tɛmɛ-nshi e ra jey, na ne wey na kayɛ pyɛ cen. Kayɛ pyɛ e jey yê ku.

¹⁸Ko ma rɔda wuna sira e tē hom na hwo; hwà rɔda yel e ji gwokundung o, hwo, na nèy mō, na hwā mō, tanga behâ nèy mō bê wuna hɛn na hwo.

¹⁹Jut e ji kayɛ pyɛ́ cen, na hwo yel na bibya e ji gwokundung o, tik na ye sè rwas na hwā mó, na ye sangal cen tanga hwo.

²⁰Kavɛ benon e yerê vɛ, kayɛ ngyāma na yas e yerê yɛ, na mwa pyɛ́ gabaga e yerê yɛ bibya, yê vey e ji mo na hwo, yaga na yɛ̄ bin nàra cen.

²¹Ko hwo, hwô jut yerê pyɛ́ de bê re yaga hwo tanga yɛn, yaga na hwo tanga belɔ mō tanga yɛ̄, yin a bin sɛ̀ pyɛ̂ re min.”

²²Nowa a ra yɛnɛ̂ pyɛ̂ mwa de Dagwi a nɔng ɛ nu, na a ra.