Read berom Susumo 7 Bible Online

Susumo 7 - berom bible

Susumo 7

¹Dagwi Darwey kwong a yâng Nowa, “Yel e ji gwokundung, hwo na belɔ mō mwa, yaga ma di e ji bemât jeng yemo hwo wɛ njumo zɔng hwà sé cik e bayis hom.

²Jut yi e ji mwa ngyāma de ya sé ryat kuru na yɛ nyaas, beras o betaama na beha mo betaama; ko yi e ji yinde ya sé kyiri jut ɛ̀ bibya, rwas o na hwā mo.

³Ano de hwà rɔda ra na benon kuru na vɛ benaas, beras o betaama na beha mo betaama, yaga na be vɛ mɛ̀ yere e jey.

⁴A tɛt ɛ̀ pɔlɔ taama, ko ma rɔda tɛ̀ rwak wo rop e ra jey nagwi na naturuk nepɔlɔ kuru banaas, na me bin wey na kayɛ pyɛ de ya vɔk neken, yemo de ma kana yong.”

⁵Nowa kwong a ra pyɛ̂ mwa de Dagwi Darwey a nɔng ɛ nu e ra yɛ.

⁶A vɔk neshey naga betyiimin (600) jeng de tɛmɛ-nshi wa hwo e ra jey.

⁷Nowa, na nèy mɛ, na hwā mɛ, tanga behâ nèy mɛ yɛn a yel e ji gwokundung o, na be sey neken mɛn yi e tɛmɛ-nshi.

⁸Yi e ji ngyāma na yas de ya sé ryat, na yinde ya sé kyiri, na yi e ji yére benon tanga mwa pyɛ́ gabaga,

⁹yɛ̄ bibya, rwas o na hwā mo, ba yel e ji gwokundung o tanga Nowa, sede remo de Dagwi a ga nɔng ɛ nu.

¹⁰E bamâ pɔlɔ taama tɛmɛ-nshi wa hwo e ra jey.

¹¹Jeng de Nowa a vɔk neshey naga betyiimin, e pɔlɔ hê kuru na hɛ taama e pwɛl gwo neba, mwa jɔ̂t nshî gwogbɔng gworep gwociwil de gwa sé e nɛn vwel ya gbuksal, ko bapɔk larwak ba wuma hɛn.

¹²Rwak wa jɛ̀rɛk e ra jey wosho kuru banaas na turuk kuru banaas.

¹³Ko e tuk hining hane mo, Nowa tanga nèy mɛ Shɛm, na Ham, na Yafɛt, na hwâ Nowa, tanga behâ nèy mɛ, mwa yɛn ba yel e ji gwokundung o.

¹⁴Ko kayɛ yerê ngyāma na kayɛ yerê yas, na kayɛ yerê pyɛ̂ gabaga, na kayɛ yerê benon hey na ve lɔ ya yel tanga yɛn.

¹⁵Rwas na hwā mo yi e kayɛ pyɛ cen ba yel e ji gwokundung o bibya, sede remo de Dagwi a ga kana nɔ̂ng Nowa nu. Bama de yɛn a ga yel mwa, ko Dagwi Darwey a bang rwi gwokundung o e bamâ Nowa.

¹⁷Tɛmɛ-nshi wa re nuyel e ra jey nepɔlɔ kuru banaas. Nshi mo na tula hɛn, ko gwokundung o gwa hala vwel, gwa sogo tǎlu e ra nshi.

¹⁸Nshi na gwɛ̌ re nuyel na gwɛsɛ hɛn ding-ding, ko gwokundung o gwa kyě rini e ra nshi.

¹⁹Ko nshi na re gâp jey, na turus, ko na kyiri begbɔng beraku mwa.

²⁰Ko nshi na tút, na kwey beraku, na dal sede mita betaama vɔk e rak o.

²¹Ko kayiyɛ pyɛ de ya sé cen, de ye kyě kyè, ya ku: benon, na yas, na ngyāma na mwa pyɛ̂ gabaga tanga mwa bemasi arɔng.

²²Kayɛ pyɛ de ye pɔng e jey, ya ku.

²³Dagwi Darwey a wey na pyɛ́ cen mwa de ya sé e jey, bemasi, na ngyāma mwa, na pyɛ̂ gabaga, na benon. E Nowa zɔng de ba tik ɛ tanga vemo de ba sé e gwokundung tanga yɛ.

²⁴Nshi na nàra e ra jey nepɔlɔ naga na kuru batungun (150), vit nà tɛt ɛn.