Read berom Susumo 8 Bible Online

Susumo 8 - berom bible

Susumo 8

¹Ko Dagwi a bare na Nowa, na mwa ngyāma na yas de ya sé tanga yɛ e ji gwokundung o. A tɛ̀ gul gwa pɛl e ra jey, ko nshi na hwo tɛrɛs hɛn.

²A bang jɔ̂t nshî gwogbɔng gworep gwociwil de gwa sé e nɛn vwel, na bapɔk larwak, ko rwak wa ye wang.

³Nshi na tɛrɛs hɛn hywɛ-hywɛ yi e jey. E bamâ nepɔlɔ naga na kuru batungun (150) nshi na tɛt ɛn.

⁴Ano, e ji pɔlɔ hê kuru na hɛ taama, e ji pwɛl gwô netaama, gwokundung o gwa tumal e ra gwining e ji berakû Ararat.

⁵Ko nshi na raa ne tɛrɛs hɛn. E tuk pɛrɛ̂ pwɛl gwô kuru, rarak beraku ba nunus.

⁶E bamâ nepɔlɔ kuru banaas (40), Nowa a wunta repɔk de a kana tɛ̀ e gwokundung o,

⁷ko a hàla gwohwǎk. Gwɛ kwong gwa kyesem, gwa raa toros hɛ vɔk e jeng de vwel ha hworok.

⁸Nowa kwong a tomo gwobɔp, a simo a tɔk kɛ nshi na ga gyirik.

⁹Ko gwobɔp gwa tɔk sɛ̀ kwɔ̂n gyirik wɛt, gwa tó to ɛ vey na Nowa, yaga nshi na rɔngɔl e dyɛngɛ e mwa vwel. Nowa kwong a nára vwɔ mɛ, ko a yel na gwobɔp o e ji gwokundung o.

¹⁰A gyeng pɔlɔ taama hak, ko a to tomo gwobɔp o.

¹¹Gwa toyo vey na Nowa e rwa nawiri, ko di, e nû gwɛ gwa vɔk ɛ̀ bwôk rwang bwot de gwa tùt e retîn pwat. Ano de Nowa a tɔk, nshi na ga gyirik e vwel.

¹²Ko a to ra nepɔlɔ netaama nehak, a to tomo gwobɔp o. Gwɛ kwong gwa pere nàra, gwa to toyo vey na yɛ wɛt.

¹³E tuk hê mɛsɛng o, e pwɛl gwô pɛrɛ̂ shey, jeng de Nowa a vɔk neshey naga betyiimin na hɛ hining (601), nshi na ga ye jɔng. Nowa a pat pyɛ-bâng gwokundung o, a bɛrɛng, ko a di vwel ha ga hwo hworok.

¹⁴E ji nepɔlɔ kuru baba na nɛ netaama, e pwɛl gwo neba, vwel ha ga tɛ́ ɛ hwɔ́k-hwɔk.

¹⁵Dagwi kwong a ha a Nowa, a yang ɛ,

¹⁶“Nusu hwo yi e ji gwokundung o, hwo na hwā mō, na nèy mō, na behâ nèy mō.

¹⁷Pat kayɛ pyɛ cen tanga hwo: benon, na ngyāma mwa, na pyɛ̂ gabaga, yaga na ye bin tɔs nèy, na ye karak, na ye ye ship à jey.”

¹⁸Ko Nowa a nusu na nèy mɛ, na hwā mɛ, tanga behâ nèy mɛ,

¹⁹na kayɛ yerê ngyama, na kayɛ pyɛ gabaga, na kayɛ yerê benon, kayɛ pyɛ́ de ye kyě kyè e jey, mwa yɛ ya nusu yi e ji gwokundung o e yere mɛn.

²⁰E bamâ pyɛ́ yemo mwa, Nowa a yong gàgbang rangâs yas vɔk na Dagwi Darwey, a vɛ́ yi e ji kayɛ yerê ngyama de ya sé ryat, na yi e ji kayɛ yerê benon de ba sé berat, a yɛt, ko a nára mɛ̀ nɔrɔ.

²¹Jeng de Dagwi Darwey a wok nesang nerat o mo, ko a yâng tó mɛ, “Ma rɔda to me kyini vwel yaga bemasi wɛt, mwa ano de bare na tomong mɛn ba sé ves, yey mɛn ya sé vyes yimo yɛn nèy. Ko ma rɔda to me wey na kayɛ pyɛ cen sede remo de ma ga kana ra wɛt.

²²“Gbak de jey ya sé, jeng bere na jeng bwal, fes na neceere, hwos na zɛng, nagwi na naturuk, bê yɛnɛ hɛn wɛt.”