Read berom Susumo 9 Bible Online

Susumo 9 - berom bible

Susumo 9

¹Dagwi a tɛ̀ a Nowa tanga nèy mɛ nerat, a yang ɛn, “Tɔs in nèy, karak hin, na yin ye ship à jey.

²Mwa ngyāma, na benon, na betɔk yê wok bengyip min, yê sap in. Ma ga tik yɛ̄ mwa e nɛn min.

³Yi a remo ma simo a yin, yin tɔk re nama yɛ̄ ko pyɛ̂ yeneng, na nèy cɔ́gɔt, na hwonong zɔng wɛt.

⁴Ko pyɛ jining zɔng de yin a rɔda re wɛt, yɛ à nama de ba shushu nemi mo wɛt, yaga neken na sé e ji nemi.

⁵Be shushu nemî mwasi ko tyɔng wɛt. Gbing-gbing ma rɔda jāma neken yi na kayɛ ngyama kɛ yi na kawɛ mwat de a mɔrɔ mwat.

⁶Mwa mwat de a mɔrɔ mwat, ba rɔda mɔrɔ hɛ arɔng, yaga Dagwi a yong mwat sede yɛ.

⁷Ko yin, tɔs in nèy, na yin karak hin, na yere min ye ye ship à jey.”

⁸Ko Dagwi a yâng Nowa tanga nèy mɛ,

⁹“Di, ma sé wuna me na sira tanga yin, na yére bama min,

¹⁰na kayɛ pyɛ cen: benon, na yas, tanga ngyāma, mwa pyɛ́ de ya nusu yi e ji gwokundung tanga yin.

¹¹Pyɛ ma yemo de ma sé sira a yin: Ma rɔda to ba wey na pyɛ̂ mwa de ya vɔk neken na tɛmɛ-nshi ko tyɔng wɛt, ko tɛmɛ-nshi wa rɔda to wey na jey arɔng wɛt.”

¹²Dagwi a to ye, “Di, pyɛ durâ sira de ma sé wuna na yin na kayɛ pyɛ cen de ya sé tanga yin a yet ngan, yɛ à shatong de ma ga tɛ̀ e larwak. Wô sè pyɛ durâ wuna-na-sira hom e tē hom na jey nesheneshey.

¹⁴Kayɛ jeng de mê vey na balê rwak e jey, ka sede shatong wa nusu,

¹⁵ko ma rɔda bare na sira hom na yin tanga kayɛ pyɛ cen, nesheneshey, tɛmɛ-nshi wô to wey na mwa neken ko tyɔng wɛt.

¹⁶Kayɛ jeng de mê di shatong e bale, ko wô tɛ̀, me bare na sira hom gbak-gbak de ma wuna na kayɛ pyɛ de ya vɔk neken e ji jey.”

¹⁷Ko Dagwi a to yâng Nowa, “Pyɛ durâ wuna-na-sira ma yane de ma ga wuna na yin tanga mwa pyɛ́ de ya vɔk neken e ji jey.”

¹⁸Nèy Nowa de na nusu yi e gwokundung, nɛ̀ à Shɛm, na Ham tanga Yafɛt. Ko Ham, yɛ à dâ Kanaan.

¹⁹Yi na nèy netat Nowa mo jey mwa ya sila na bemat.

²⁰Nowa á sè mwât cap, ko yɛ wɛ a tānga pɛrɛ how bwî anap.

²¹E bama de a sɔ nshî anap o, a feng, ko a dyɛng warap e ji buk mɛ.

²²Jeng de Ham, dâ Kanaan, a di da mɛ ferem, a nusu wɔ e majey, a ha a begwa mɛ.

²³Ko Shɛm tanga Yafɛt ba jut rugû banga, ba gana e ra batô sanat mɛn, ba kyè mɛ̀ rè bama wɔ yel mɛ̀ e ji buk o, ko ba bang da mɛn; yɛn a doyo bayis mɛn wɛt, yaga na be kwon di da mɛn ferem.

²⁴E bama de sefeng sa ga hala Nowa, ko ba ha a yɛ pyɛ de wen mɛ swɛl o a ra a yɛ.

²⁵Ko a ye, “Tik na gawey he hwo e ra Kanaan. Ê tɛ́ ɛ sam besam begwa mɛ.”

²⁶A to ye, “Tik na be nɔ̂ng Dagwi Darwey, yɛ Dagwi wo Shɛm nerey, ko tik na Kanaan e ra a Shɛm fwôm sesam.

²⁷Tik na Dagwi a tɛ̀ Yafɛt a gwɛ̌ hɛ, na yere mɛ ye vɛ́ wuna sangal tanga ye Shɛm, ko Kanaan e ra a Yafɛt fwôm sesam.”

²⁸E bamâ tɛmɛ-nshi, Nowa a to ra neshey naga betat na kuru batungun (350),

²⁹ko a ku; yɛ na neshey naga shabetat na kuru batungun (950).