Read berom 2 Samwɛl 1 Bible Online

2 Samwɛl 1 - berom bible

2 Samwɛl 1

¹Saul a ga ku e de como na BeFilisti. E jeng yane arɔng, Davit a ga re BeAmalɛk na como, ko a ga to vɛ hɛ e Ziklak. E bamâ pɔlɔ ba, wen hwak a vey yi e durâ comô BeSaul, a ga hama berugu mɛ, ko a vɔk nefongol e rato mɛ arɔng, a hwo gaba e nuyel mɛ, a sé nɔng ɛ nerey.

³Davit a hwo rangal hɛ, a ye, “Hwà yi e gwa ɛ?” Wen o a ye, “Ma hywit me yi e durâ comô BeIsrayɛl.”

⁴Davit a yang ɛ, “Sɛ́ ya té arɛt? Ha a me.” Wen o a yang ɛ, “Bemat mot ba tele yi e de como mo, ba mɔbɔs bemat mot pyak, ko Saul tanga sɔ mɛ Yɔnatan ba ga kushu arɔng.”

⁵Ko Davit a yang ɛ, “Hwà tɔk ala, Saul tanga sɔ mɛ Yɔnatan ba ga kushu ɛ?”

⁶Wen o a toyo a yɛ, a ye, “Ma vɔk ma pom ɛ e rakû Gilbowa”, ko ma di Saul a ye yɛndɛng e ra bare mɛ, ko bemât como e ra bekyɛkyɛ bedwa na besuga e ra bedwa mɛn ba ga vey bagat e ra yɛ.

⁷Sede a doyo a di me, a hwo yila me, ko ma yang ɛ, “Ey, à Da, me à womo.”

⁸A rangal me, “Hwà sé wa ɛ?” Ma toyo a yɛ, ma ye, “Ma sé WoAmalɛk.”

⁹Ko a yang me, “Vey, tala me! Ma sé e ji rezôt reku, mwa ano de ma rɔngɔl kwen.”

¹⁰“Yaga ano, ma wɔ́ na yɛ, ko ma tala hɛ, yaga ma tɔk a rɔda to dal wɛt. Ko ma pat kpîn negwɔm yi e rato mɛ, ma to pat rwêy vwɔ mɛ arɔng, a yemo ma vɔk a hwo, à Darwey hom.”

¹¹Davit kwong a vɛ̌ vo gworugu mɛ, a hanta yaga lashê yey, ko mwa bemat de ba sé na yɛ ba hama bemɛn arɔng.

¹²Yɛn a tosho, ba ra lwɛlɛ̂ sesin, ba tik rê pyɛ́ vɔk e nahywegelek yaga Saul na sɔ mɛ Yɔnatan, tanga mwa BeIsrayɛl, bemât Dagwi Darwey, de ba ga mɔbɔs vɛ pyak e de como.

¹³Davit a rangâl wen de a vey a yɛ na ha mo, “Hwà yi e gwa a hwo ɛ?” Wen o a toyo a yɛ, a ye, “Ma sé WoAmalɛk de wot a sé sangâl nekɛnɛt e ngamo.”

¹⁴Davit a to yang ɛ, “Hwà yi e rɛ̌ de hwà wok bengyip jût vwɔ mō, na hwo mɔrɔ mɛ womo de Dagwi Darwey a ga kasa wɛt ɛ?”

¹⁵Davit a yila hwak e ji bemât como mɛ, a yang ɛ, “Vey, mɔrɔ hɛ!” Ko a wɔ̀ tara hɛ, a pere mɔrɔ.

¹⁶Davit a yang ɛ, “Nemi mō nè sè e ra to mō pyɛ mo, sede remo de hwà ga ha na nu mo wɔgɔ, hwà mɔrɔ mwat de Dagwi Darwey a ga kasa.”

¹⁷Davit a tosho lwɛlɛ̂ sesin yaga Saul tanga sɔ mɛ Yɔnatan.

¹⁸A nɔng nu be masa a BeYuda lwɛlɛ̂ sesin o de ba tâng gwɛ à Lwɛlɛ̂ Gbàng, ko ba jɛk gwɛ e Bwok-basa Yashar ngan:

¹⁹“À BeIsrayɛl, ba ga wey na begbɔng o min, ba sé dyɛng dɔɔlɔl e ra berahwol. Káa, besuga de ba ga gabsa!

²⁰Be kwon ha há mo e ji Gat wɛt, be kwon mok hɛ e nehyok Ashkɛlɔn wɛt. Yaga behwông BeFilisti bê wok, ko bê vɔk yey pyɛng, behwông bedulus bê ra pee.

²¹À yin berakû Gilbowa, rwak wo kwon rop, kɛ mwɛngɛ gwo kwon dyɛng e ra yin wɛt, cāp min ye mara pyɛ́ wɛt. Yaga e hwomo de ba pɔrɔk ɛ ruga comô begbɔng o, bê tɔk to shushu ruga Saul na něy wɛt.

²²Gbàng Yɔnatan wa bidɛ mɔbɔs bemat wɛt, wâl Saul arɔng wa vɔk nemwishish wɛt, wa tow bemât gap, ko wa mɔbɔs vê repugu.

²³Saul tanga Yɔnatan bá sè vê tɛ̂ yey, bá simo bemɛn sizɔng. Bá sè pang jeng de bá sè beken na jeng de ba kushu arɔng! Bá dal bekim na neziri, Bá dal begukum na gap arɔng!

²⁴À yin behâ BeIsrayɛl, tosho hin Saul, womo de a nɔngɔs hin berugu berat ve begwɔ̀m, womo de a tɔrɔ yɔ̀m min na lɛlɛ̂ dyam shinang.

²⁵Káa, besuga de ba ga gabsa! Ba mɔbɔs hɛn e como. Yɔnatan a sé dyɛng dɔɔlɔl e berahwol.

²⁶À Yɔnatan, gwà hom, yey hom ye lashe hɛ yaga hwo. Ma tɛ̀ yey hom na hwo sizɔng. Nesa mo vey na me na dal tɛ̂ yey e ra beha!

²⁷Káa, besuga de ba ga gabsa! Pyɛ̂ como ya ga wey hywiri!”