Read berom 2 Samwɛl 10 Bible Online

2 Samwɛl 10 - berom bible

2 Samwɛl 10

¹A vane ano, Nakash, gbɔng gwɔ̀m BeAmɔn a ku, ko hwey mɛ Hanun ha re negwɔm e to mɛ.

²Davit kwong a ye, “Ma rɔda dura a Hanun, Nahash nerat, sede remo de da mɛ á dura a me nerat arɔng.” Ko a hwo tomo betom mɛ wɔ̀ nára a Hanun vɔ e rekû da mɛ mo. Jeng de betom Davit ba wɔ̀ wul vwêl BeAmɔn o,

³ko bemât nuyêl BeAmɔn ba yâng darwey mɛn, “Hwó tē kɛ gyeng Davit a sé nɔ̂ng da mo nerey de a tomo bemat vey nára a hwo vɔ arɛt? Davit a sé tomo hɛn sede bemât wɛlɛ, na be ba wɛrɛm gbɔng repomo mo, yaga na a bin re ot na como wɛt a?”

⁴Hanun kwong a tɛ̀, be vos betom Davit o, be hwon a yɛn negyɛk e bak gwining, be to yɛt berugu mɛn tyɛng e balus, e bama mo, a tɛ̀ ɛn e gwong be kyè.

⁵A sè a betom o rekyen tyɔng wɛt, ko yɛn a tɔk wɔ e Yɛrusalɛm wɛt. Yɛn a tomo na ha mo vɔk na Davit. Jeng de a wok ano, a hwo tomo a yɛn be ka sangal e Yeriko e ngyen, sɛ̌ negyɛk mɛn o na ras gyam na yɛn a de toyo.

⁶Jeng de BeAmɔn ba tɔk, yɛn a ga tɛ́ ɛn pyɛ vyes e nuyêl Davit, yɛn a wɔ̀ jut bemât comô bol vê BeSirya e ra byɛ. Ba jut vɛ gu kuru baba (20,000) yi e bapomô Bet-Rehop na Zoba, behak gu kuru na vɛ baba (12,000) yi e Tɔp, tanga Gbɔng Gwɔ̀m Maaka na bemat mɛ gu rining (1,000).

⁷Jeng de Davit a wok ano, a vɛ̌ tomo Yowap na bemât como mwa.

⁸BeAmɔn arɔng ba nusu, yɛn a ngyɛrɛ hɛn yaga tô como e rwi gbɔng repomo mɛn Raba, ko BeSirya yi e Zoba na Rehop tanga bemât Tɔp na Maaka ba ngyɛrɛ hɛn e cwɛl.

⁹Sede Yowap a di, bagyɛng bemât como ba ngyɛrɛ hɛn e nuyel na bama mɛ, a vɛ̌ kasa bekyàrang como yi e ji BeIsrayɛl, a ngyɛrɛ hɛn na be man gey na BeSirya.

¹⁰A jut bwâng bemat o, a tɛ̀ vɛ e vwɔ̂ gwà mɛ Abishai, de a ngyɛrɛ hɛn na be man gey na BeAmɔn.

¹¹Yowap a yang Abishai, “Sede hwà di, BeSirya bê dal gap hom, ko hwo vey sɛlɛ me, ko ka sede BeAmɔn bê dal gap mō, ko mê vey sɛlɛ hwo arɔng.

¹²Tɛ̀ yey ting! Tik na wot tó como mo na yey ting yaga bemat mot tanga bagbɔng bapomô Dagwi mot arɔng! Tik na Dagwi Darwey a ra pyɛ de a di ya sé a yɛ tyɛng.”

¹³Yowap kwong na bemat mɛ ba ye dǔng wɔ̀ tó como na BeSirya, ko BeSirya ba pere tele yi e nuyel mɛn.

¹⁴Sede BeAmɔn ba di BeSirya ba sé tele, yɛn arɔng ba vɛ̌ tele yi e nuyêl Abishai, ba wɔ̀ yel e ji gbɔng repomo. Ano kwong, Yowap a toyo yi e de tô como na BeAmɔn, a vɛ hɛ e Yɛrusalɛm.

¹⁵Bama de BeSirya ba di BeIsrayɛl ba ga rɛ́ ɛn e como, ko yɛn a to wɔ̀ tula hɛn.

¹⁶Gbɔng gwɔ̀m Zoba, Hadadɛzɛr, a tomo be vey na BeSirya de ba sé e gurâ Gwɔrɔt Ɛifaratɛs. Yɛn a sé e vwɔ̂ Shobak, mwât nuyel como mɛ, ko yɛn a vey e Helam.

¹⁷Jeng de ba ha a Davit ha mo, a vɛ̌ tula BeIsrayɛl mwa, a ye mɛ̀ dɔ a Rɔt Yɔrdan, ko a kyè mɛ wɔ e Helam. BeSirya arɔng ba ngyɛrɛ bemât como mɛn na be man mɛ gey na Davit. Ba hwo como,

¹⁸ko BeIsrayɛl ba hwo ro ɛn, yɛn a tele. Davit na bemat mɛ ba mɔbɔs bemât comô bekyɛkyɛ̂ bedwa mɛn naga betaama (700), ko bemât como e ra bedwa gu kuru banaas (40,000). Ba to mǎ Shobak, mwât nuyêl como mɛn, ko a ku e hwomo.

¹⁹Jeng de begbɔng begwɔ̀m de ba sè e vwɔ̂ Hadadɛzɛr ba di, BeIsrayɛl ba ga re ɛn e como mo, ba vɛ̌ wuna sangâl netyang na BeIsrayɛl, ba tɛ́ ɛn bemât fwom mɛn. Yi ano, BeSirya ba tɛ̀ bengyip, ba to simo be sɛlɛ BeAmɔn wɛt.