Read berom 2 Samwɛl 11 Bible Online

2 Samwɛl 11 - berom bible

2 Samwɛl 11

¹E jeng naswigi, jeng de begbɔng begwɔ̀m be kyese tô como, Davit a tomo Yowap na bemât nuyel mɛ tanga mwa bemât comô Israyɛl, na yɛn a wɔ̀ to como na BeAmɔn. Yɛn a re ɛn, ko yɛn a to gwɔrɔ gbɔng repomô Raba na como. Ko Davit a nàra e sangal e lɔ e Yɛrusalɛm.

²Tuhak, nahywegelek, Davit a hwo sogo yi e de pɔnglɔ, a sè gwɔrɔ e ra ragyip lɔ gbɔng gwɔ̀m. Yi e ragyip o a hwo di hwā hwak a sè kus ɛ. Hwā mo á sè zɛrɛ mo tyɔng wɛt.

³Ko Davit a hwo tomo mwat hwak na a wɔ̀ rangal hâ hwā mo. Ba ha a yɛ, a sé Batsheba, hwông Ɛliyam, hwâ Uriya WoHiti.

⁴Davit kwong a tomo betom na be wɔ̀ vey na yɛ. Hwā mo a vey na yɛ, ko a dyɛng mɛ. Hwā mo a ga mɛsɛ̂ng yɛnɛ berang mɛ, a ga to kus ɛ tyɛng na Badu Mose. E bama mo, a toyo hɛ vɔk e lɔ mɛ.

⁵Hwā mo a hwo sey jim, ko a tomo, be ha a Davit, “Ma ga sey jim”.

⁶Davit kwong a tomo, be ha a Yowap, a tomo a yɛ na Uriya, WoHiti. Ko Yowap a tomo hɛ vey na Davit.

⁷Jeng de Uriya a wul na yɛ, Davit a rangsal hɛ rehâ netyang Yowap na ne bemât como tanga rehâ como mo arɔng.

⁸E bama mo, Davit a yang ɛ, “Kyè vɔk e lɔ mō, na hwo wɔ̀ kus bol mō, na hwo pɔnglɔ”. Uriya a nusu, ko gbɔng gwɔ̀m o a tomo na pyɛ neshow na be raa hɛ mɛ.

⁹Ko Uriya a wɔ́ e lɔ mɛ wɛt, a vɛ̌ pɔl tanga mwa bemât fwôm lɔ gbɔng gwɔ̀m e rwi lɔ mo.

¹⁰Jeng de ba ha a Davit, Uriya á wɔ́ e lɔ mɛ wɛt, ko a yang ɛ, “Hwà sé mɛsɛ̂ng vɛ hwo yi e de kwɛngɛl yikyik. Yaga sɛ́ de hwà kwey wɔ e lɔ mō wɛt ɛ?”.

¹¹Uriya a toyo a yɛ, a ye, “BeIsrayɛl tanga BeYuda ba sé sangal; e kwarâ como, ko Kundung wuna-na-sirâ Dagwi gwa sé e ji buk e hey, ko mwât nuyel hom Yowap tanga bemât nuyêl como mɛ ba sé dyɛng e hey dɛdɛrɛng. Yi e rɛ̌ de mê wɔ e lɔ hom na me re, na me sɔ, na me dyɛng na hwā hom ɛ? Ma sira me, mê kyɛm me ra pyɛ ano wɛt!”

¹²Davit a yâng Uriya, “Yàa, hwo sangal e ngamo gbak yunung, ko nahwol ma rɔda ba tɛ̀ o e gwong.” Ano kwong, Uriya a nàra e Yɛrusalɛm tuk hane. Ko Davit a rini hɛ rê pyɛ́ tanga yɛ, a nɔngɔs hɛ nshî anap a sɔ, na a feng mɛ. Ko nahywegelek, Uriya a kyè wɔ̀ dyɛng e ra pyɛ dyɛngɛ mɛ tanga bemât fwôm darwey mɛ, a kyè wɛrɛ e lɔ mɛ wɛt.

¹⁴Nagasi, Davit a jɛk a Yowap bwok-rwang, ko a tomo gwɛ̀ e vwɔ̂ Uriya.

¹⁵A jɛk e ji bwok-rwang o ngan: “Tomo na Uriya vɔk e nuyêl kwɔn de como mo ya dal mwa na nepep, ko yin gwɛ̌ sek na bama yi na yɛ, yaga na be bin mɔrɔ hɛ.”

¹⁶Ano kwong, Yowap de a ga rɔnɔ repomo mo, a vɛ̌ tomo Uriya wɔ e kwɔn de bemât repugu vê gap ba sé ɛ.

¹⁷Sede bemât repomo mo ba nusu, na be tó como, ba mɔbɔs behak e ji bemât comô Davit, ko Uriya arɔng á sè e ji vɛ.

¹⁸Yowap a tomo, be ha a Davit pyɛ̂ mwa e ra como mo.

¹⁹A nɔ̂ng mwât tomo mo nu, sede a yɛnɛ ha a gbɔng gwɔ̀m mwa rehâ como mo,

²⁰gyeng rɔ̌ shom mɛ ya rɔda sogo, ko a rɔda rangal hɛ, a ye, “Yaga sɛ́ de yin a wɔ́ bagat na repomo na como mo arɛt? Yin a tɔk, bemat bê tɔk tabas ket yi e jwâ-pomo wɛt arɛt?

²¹E wa de á kana mɔrɔ Abimɛlɛk Gidɛyɔn e Tɛbɛs ɛ? A sè e hwā de á kana barak vwɔ̂ fwa hwongo e ra yɛ, yi e jwâ-pomo, a pere wɔ̀ ku wɛt arɛt? Yaga sɛ́ de yin a wul bagat ano na jwâ-pomo ɛ? Ka sede gbɔng gwɔ̀m a rangal hɛ ano, ko a ye, ‘Mwât fwom mō Uriya, WoHiti, a sé e ji bemat de ba kushu mo arɔng.’ ”

²²Tom o a nára hɛ. Jeng de a wul a wɔ̀ ha a Davit mwa pyɛ́ de Yowap a ha a yɛ.

²³A ye, “À da, bemât repugu mō ba dal gap mot, ba nusu yi e repomo, ba man gèy na wot e cwɛl, ko wot a ro ɛn vɔk e rwi repomo mo.

²⁴Ko bemât begbang ba hwo tabas na ket yi e jwâ-pomo, ko behak e ji bemât como mō ba kushu. Mwât fwom mō Uriya, WoHiti, a sé e ji bemat de ba kushu mo arɔng.”

²⁵Davit a yâng tom o, a wɔ há a Yowap, a tik pyɛ yemo ye bɔrɔk hɛ wɛt, yaga bebara be kasa wɛt. Yɛ a gwɛ̌ yey ting, na a mɔ́t ɛn e como mo, mwa tanga repomo mo, na a wey na rɛ!

²⁶Sede hwâ Uriya a wok, rwas mɛ a ga ku, ko a tosho sesin mɛ.

²⁷Bamâ jeng de negasî sesin na ga kwey, Davit a tomo be wɔ̀ jut ɛ vey e ji lɔ mɛ. A tɛ́ ɛ hwā mɛ, ko a tɔ a yɛ hwey wen.