Read berom 2 Samwɛl 12 Bible Online

2 Samwɛl 12 - berom bible

2 Samwɛl 12

¹Pyɛ de Davit a ra ya kyɛ́ ɛ a Dagwi Darwey yey. A tomo Natan, zarap mɛ, wɔ na Davit. Jeng de a pom na yɛ, a hwo yang ɛ, “Bemat behak beba ba sé e ji repomo rehak, gwining a sé darwey, ko hwak a sé pwɛng.

²Darwey wane a vɔk yas pyak, berɔndɔng tanga vyēl tyimit.

³Ko pwɛng wane a vɔk pyɛ cak wɛt sɛ̌ keshěp tyimit kining zɔng de á kana sey. A gyeng kɛ, ko ka ras na yɛ tanga nèy mɛ. Ka reres pyɛ́ tanga yɛ yi e shǐ mɛ, ka sɔrɔs nshi yi e keshi mɛ, ko ka dyɛngɛs e ragey mɛ. Ka vɔ̀k ke tɛ́ ɛ sede hwóng mɛ.

⁴“Tuhak, darwey wane a sɛ̀ kwɛnɛt, ko a tik nà pat ɛ jining yi e ji tyīmit kɛ gwining yi e ji berɔndɔng, na a yong a yɛ mɛ pyɛ́. Ko a de wɔ̀ vo keshěp tyimit de ka sé ke pwɛng wane, a yong a kwɛnɛt o mɛ pyɛ̂ re.”

⁵Shom ya sogo a Davit sizɔng, a yâng Natan, “Ma sira me na Dagwi Darwey, mwat de a ra ano, a jam na be mɔrɔ hɛ!

⁶A sé gbing-gbing a tala á pwɛng wane vyēl nyaas yaga pyɛ de a ra, vit a di nemwishish.”

⁷Ko Natan a yâng Davit, “E hwo à mwat o! Wok pyɛ de Dagwi Darwey, Dagwi wo Israyɛl a ha a hwo: ‘Ma kasa hwo, ma tɛ̀ be shushu hwo na něy, na hwo tɛ́ o gbɔng gwɔ̀m e ra BeIsrayɛl, ko ma to sey o yi e vwɔ̂ Saul.

⁸Ma nɔng o lɔ dalɔ mo tanga beha mɛ. Ma tɛ̀ o gbɔng gwɔ̀m e ra BeIsrayɛl tanga BeYuda arɔng. Ka sede yane mwa ya radɛ a hwo, ko ma yâng tɔk gwɛ̌ a hwo ɛ cak gbak.

⁹Yaga sɛ́ de hwà kyɛ́ o nà gyeng ha hom, na hwo ra pyɛ de ya kyɛ́ ɛ a me yey arɛt? Hwà yong ɛ, na BeAmɔn be mɔrɔ Uriya, WoHiti, ko hwà jut hwā mɛ, a tɛ́ ɛ mwo. Yaga ano, bá-sinang ha rɔda gas ɛ na lɔ mō wɛt.

¹¹Ma sira me, ma rɔda tɛ̀ hwak e ji nèy lɔ mō a rɔda vey na pyɛ vyes e lɔ mō. E bayis mō, ma rɔda jut beha mō, ko mê nɔ̂ng mwat hwak vɛ, yɛ a rɔda dyɛng na vɛ e tê-gwi, bemat bé bɛrɛng.

¹²Hwà ra myo e lɛrɛ, ko ma rɔda tɛ̀ be ra yɛ e tê-gwi, e bayîs mwa BeIsrayɛl.’ ”

¹³Ko Davit a yâng Natan, “Ma ga ra a Dagwi Darwey banɛn.” Natan a toyo a yɛ, a ye, “Sede remo de hwà ga sey banɛn mō, Dagwi Darwey a ga hala a hwo vɛ. Hwà rɔda ku wɛt.

¹⁴Sede remo de hwà ga byɛnɛng Dagwi Darwey yi na pyɛ́ de hwà ga ra, ko di, hwey de ba ga tɔ a hwo ha rɔda ku.”

¹⁵Ko Natan a vɛ̌ tik Davit, a kyè vɔk e lɔ mɛ. Dagwi Darwey a tɛ̀ hwey de hwâ Uriya a ga tɔ̀ a Davit ha royo hɛ.

¹⁶Davit a ra won na Dagwi yaga hwey o. A tik rê pyɛ́, a yeles e ji duk mɛ naturuk, ko a dyɛngɛs e vwel.

¹⁷Bemakûk lɔ mo be sangsal e vwara mɛ, na be tɛ̀ ɛ a sogo, na a dyɛng e ra gwat, ko a kyɛ́ ɛ, a ka re pyɛ́ tanga yɛn wɛt.

¹⁸E tuk hê taama, hwey o ha ku. Bemât fwôm Davit ba wok bengyip nà ha a yɛ hâ rekû hwey o, yaga yɛn a bare, jeng de hwey o há sè rɔngɔl ken, bá ha na yɛ, ko á ka tɛ̀ tong na yɛn wɛt. E rɛ̌ de yɛn ê tɔk ha a yɛ rehâ rekû hwey o arɛt? Gyeng rɔ̌ ê wɔ mǎ hɛ.

¹⁹Jeng de Davit a di bemât fwom mɛ ba sé kyě ha show-shi-show na bemɛn, a pere wɔ̀ tɔk, hwey o ha ga ku. A rangal hɛn, “Hwey o ha ga ku a?” Yɛn a yang ɛ, “Ey, ha ga ku.”

²⁰Ko Davit a vɛ̌ sogo yi e vwel, a kus ɛ, a mɔmɔ hɛ na něy, a sege berugu mɛ, a kyè vɔk e duk rê fongol, ko a re a Dagwi Darwey fongol. E bama mo, a toyo vɔk e lɔ mɛ, a rangal be nɔng ɛ pyɛ́, ba tik a yɛ yɛ̄, ko a re.

²¹Bemât fwom mɛ ba rangal hɛ, ba ye, “E sɛ́ a yane de hwà ra ano ɛ? Jeng de hwey o há rɔngɔl ken, hwá kyɛ́ o pyɛ́, ko hwá tosho, ko remo de hwey o ha ga ku, hwà ga de sogo, hwà re pyɛ́ kē a!”

²²Ko a toyo a yɛn, a ye, “Jeng de hwey o há rɔngɔl ken, ma kyɛ́ me pyɛ́ ma tosho. Ma bare, wa a tɔk ɛ? Gyeng Dagwi Darwey ê tosho reyɔm hom, na a tik hwey o ken!

²³Ko remo de ha ga ku, yaga sɛ́ de mê kyɛ́ me pyɛ́ ɛ? Mê tɔk toyo na hɛ ken a? E me, mê ba wɔ̀ sɛ̀ hɛ, ko e hɛ de hê to toyo ba sɛ̀ me wɛt.”

²⁴E bama mo, Davit a wɔrɔk hwā mɛ Batsheba, a dyɛng na yɛ, ko a tɔ hwey wen. A vo a hɛ rezâ Sɔlɔmɔn. Dagwi Darwey a tɛ̀ yey na yɛ,

²⁵ko a tomo Natan, zarap mɛ na yɛ, na a wɔ̀ ha a Davit, na a vo a hɛ rezâ Yɛdidya wɔgɔ, womo de Dagwi Darwey a tɛ̀ yey na yɛ.

²⁶E ji jeng yane, Yowap a tó como na Raba wo BeAmɔn, ko a re bak repomo mo de gbɔng gwɔ̀m a sangal ɛ.

²⁷A hwo tomo betom vɔk na Davit wɔgɔ, a ga tó como na repomô Raba, ko a ga wɔ̀ vo kwɔ̂n lwêl nshi mɛn.

²⁸Tik na Davit a tula bwâng bemât como mwa, a wɔ̀ rɔnɔ mɛ repomo mo, na a re rɛ. Ka ano wɛt, ko yɛ Yowap ê re rɛ, ko bê yila rɛ na reza mɛ.

²⁹Ano kwong, Davit a tula bwâng bemât como mwa, a kyè mɛ, a wɔ̀ tó mɛ como e Raba, ko a re repomo mo.

³⁰A jut kpin negwɔm yi e ratô dagwi pyɛ sekwit mɛn Milkɔm. Nedirik kpin o na wul kilo kuru batat na vɛ betungun (35) vê dyam shinang, ko ba tɔrɔ wɛ na gwodyengere gworwat, ko ba tɛ̀ gwɛ e rato Davit. A to hashe pyɛ̂ jugu pyak sizɔng yi e repomo mo.

³¹A paa bemat de ba sé e hwomo, a tɛ̀ ɛn be ra fwom sesam gwô yɛ̂t cɔ́gɔt na bewal yìn, kɛ dâk pyɛ́ na begele dyam, kɛ tow pyɛ́ na tyém, kɛ yông bagat bwos lɔk. Davit a ra ano e mwa bapomo BeAmɔn. E bama mo, yɛ tanga mwa bemât como mɛ ba toyo vɔk e Yɛrusalɛm.