Read berom 2 Samwɛl 13 Bible Online

2 Samwɛl 13 - berom bible

2 Samwɛl 13

¹Absalɔm, hwêy Davit á vɔk gwà mɛ hwong o de bá tang ɛ à Tamar, á sè zɛrɛ mo tyɔng wɛt, ko á rɔngɔl sana ra weneng. Ko Amnɔn, wen da mɛ, á tɛ̀ yey na yɛ. Simo hane mo há re a yɛ yey sizɔng, á pere hwo ro ɛ, yaga ê tɔk ra pyɛ cak na yɛ wɛt.

³Amnɔn kwong á vɔk sa mɛ hwak de bá tang ɛ à Yɔnadap Shimeya, hwêy gwà Davit. Yɔnadap o á vɔk netsitsɛng pyak.

⁴A hwo yâng Amnɔn, “E sɛ́ ya tɛ̀ de hwó bɛɛ rìshish kahɛ tuk ano, ko hwo hwêy gbɔng gwɔ̀m ɛ? Hwô tɔk ha a me wɛt a?” Amnɔn a hwo yang ɛ, “Ma tɛ̀ yey na Tamar, hwông dê gwà hom Absalɔm.”

⁵Yɔnadap a yang ɛ, “Ye wɔgɔ, hwó ro o, ko wɔ̀ dyɛng e ra gwat. Ka sede da mō a vey di o, ko hwo yang ɛ, a tomo a hwo gwà mō Tamar na a vey nɔng o pyɛ cak na hwo re, na a to kyeres pyɛ́ mo e bayis mō, hwo bɛrɛng hɛ, na a nɔngɔs hwo yɛ na vwɔ mɛ.”

⁶Ano kwong, Amnɔn a hwo dyɛng e gwat wɔgɔ, e ro ɛ. Jeng de gbɔng gwɔ̀m a vey di ɛ, Amnɔn a hwo yang ɛ, “Gabɔk wɛt, tik na gwà hom Tamar a vey yong a me nekpam-tuk rɔkrɔk e bayis hom, yaga na a nɔngɔs me yɛ na vwɔ mɛ.”

⁷Davit a hwo tomo mwat vɔk na Tamar e lɔ mɛ, a ye, “Ci e lɔ gwà mō Amnɔn na hwo wɔ̀ yong a yɛ pyɛ́.”

⁸Tamar kwong a sogo wɔ e lɔ gwà mɛ mo de a sè e dyɛngɛ. A jut nemuk de ba ga bɔrɔk na pyɛ́ detidetu, a tugut nɛ, a yong mɛ nekpam-tuk rɔkrɔk o ko a halang nɛ, e bayis mɛ.

⁹A tɛ̀ nɛ e kepey, a wɔ̀ nɔng ɛ, ko Amnɔn a kyɛ́ ɛ nà re. A ye, “Be yang kawɛ mwat a nusu yi e ngamo.” Ko kawɛ mwat a hwo nusu hɛ.

¹⁰Amnɔn a hwo yâng Tamar, “Vey mɛ na pyɛ́ mo e ngamo e ji duk dyɛngɛ hom, yaga na hwo nɔngɔs me yɛ na vwɔ mō.” Tamar a hwo jut nekpam-tuk de a ga yong o, a yel mɛ wɔ̀ nɔ̂ng gwà mɛ mo e ji duk dyɛngɛ mɛ.

¹¹Jeng de a sé nára a yɛ pyɛ́ mo, ko a vɛ̌ kaba hɛ, a yang ɛ, “A gwà hom, vey e ra gwat na me.”

¹²Hwong o a yang ɛ, “Káa, à gwa hom! Hwo vo me na tek wɛt! Be ra pyɛ yerê yemo e ji Israyɛl wɛt. Hwo ra pyɛ vyes yemo wɛt!

¹³Ko me ɛ, mê tɛ̀ to hom e gwa na rekyɛn remo ɛ? Ko hwo kwong ɛ, hwà rɔda tɛ́ o hwak e ji betɔn beves e ji Israyɛl. Gabɔk wɛt, ha na gbɔng gwɔ̀m, a rɔda ro mɛ nà nɔng o me e weneng wɛt.”

¹⁴Ko a tɛ̀ tong na a wok ɛ wɛt. Remo de a dal ɛ na gap, a vɛ̌ vo ɛ, a dyɛng mɛ na retek.

¹⁵E bama mo, Amnɔn a kyɛ́ ɛ hɛ, a hwo bɛrɛng hɛ ves sizɔng. Mwin, bɛrɛng hɛ ves o mo ha dal yerê simo de á kana simo hɛ. A yang ɛ, “Sogo, nusu hwo!”

¹⁶Hwong o a yang ɛ, “Kée wey! Hwo ro me ano wɛt! Hemo hê dal renɛn de hwà ga kana ra na me na neves.” Ko Amnɔn a to tɛ̀ tong na a wok ɛ wɛt.

¹⁷A hwo yila mwât fwom mɛ, a yang ɛ, “Pat ɛ e majey, na hwo man rwi duk o e bama mɛ.”

¹⁸Mwat o a ra ano. Tamar kwong á tɛ̀ gworugu gwolwis gwo vɔ lis, yere berugu ma vane de nèy behwong begbɔng begwɔ̀m de na ga ra weneng wɛt na tɛ̀sɛ.

¹⁹Tamar a hanta gworugu mo, a tɛ̀ fongol-kya e rato, ko a tɛ̀ vɔ e rato, a kyè e tosho na fwɔ rɛng-rɛng.

²⁰Jeng de gwà mɛ Absalɔm a di ɛ, a yang ɛ, “Amnɔn a ga lashe hwo a? Sǎ yaang zɔng, a gwà hom, yɛ a sé gwà mō. Hwo kwon sap wɛt.” Ano kwong, Tamar a sangal yɔɔm nju mɛ e lɔ gwà mɛ Absalɔm.

²¹Jeng de Gbɔng Gwɔ̀m Davit a wok pyɛ yane, a wok shom. Ko mwa ano, a simo a tabak Amnɔn wɛt, yaga a tɛ̀ yey na yɛ, remo de a sé hwêy mɛsɛng mɛ.

²²Absalɔm a ka hanat ha hak na Amnɔn wɛt, kɛ rat o kɛ ves o ayi, a kyɛ́ ɛ hɛ sizɔng, yaga a ga tɛ̀ gwa mɛ Tamar a tɛ́ ɛ pyɛ rekyen.

²³E bamâ neshey neba, Absalɔm a tɛ̀ ba sè yɛ̂t setôt tyīmit mɛ e Baal-Hazɔr bagat na yɛnɛ̂ bak vwêl Ɛfrayim. A hwo rini mwa begwa mɛ bewen vɔk e hwomo.

²⁴A wɔ́ na gbɔng gwɔ̀m, a yang ɛ, “À da, ma sé yɛt setôt tyīmit hom. Gabɔk wɛt, kɛ hwo tanga bemât fwom mō yin ê kyɛm yin ba wuna na wot bɛ?”

²⁵Ko gbɔng gwɔ̀m a yang ɛ, “Wey, à hwey hom. Wot mwa wot ê ba vey wɛt, yaga wot ê ba gwɛ̌ a hwo ɛ nedirik zɔng.” Ko Absalɔm a shonong e ra yɛ. Da mɛ a kyɛ́ ɛ gbak, ko a tɛ̀ a yɛ netey kɛk.

²⁶Absalɔm a to yang ɛ, “De gwa sé ano, ko tik gwà hom Amnɔn a kyè tanga wot.” Gbɔng gwɔ̀m a yang ɛ, “Yaga sɛ́ de ê kyè tanga yin ɛ?”

²⁷Ko Absalɔm a shonong e ra yɛ. E yɛnɛ mo, gbɔng gwɔ̀m a de simo Amnɔn tanga bwâng nèy mɛ ne kyè tanga yɛ. Ano kwong, Absalɔm a yong pyɛ̂ re nzem yere ye begbɔng begwɔ̀m.

²⁸A nɔ̂ng bemat fwom mɛ nu wɔgɔ, jeng de yɛn a di Amnɔn a ga hwo feng nshî anap, ko yɛ Absalɔm a yang ɛn, be mɔrɔ hɛ, ko yɛn be vɛ̌ mɔrɔ hɛ. Yɛn kwon tɛ̀ bengyip wɛt. Be mɔrɔ hɛ zɔng, yaga e yɛ de a nɔng ɛn nu, ko yɛn a tɛ̀ yey neras arɔng.

²⁹Ano de bemat Absalɔm ba mɔrɔ Amnɔn tyɛng na ha de a nɔng ɛn nu. Mwa nèy gbɔng gwɔ̀m na sogo, kawɛ a laga madung mɛ, a vɛ̌ tele.

³⁰Jeng de yɛn a sè rɔngɔl e gwông wɛrɛn, bá vey ha a Davit, Absalɔm a ga mɔbɔs nèy bewen mɛ mwa nɛ, vit à hining de ba tik ɛ.

³¹Ko yɛ a hwo sogo, a hama berugu mɛ, ko a gaba e vwel. Bemât fwom mɛ de ba sé tanga yɛ ba hama berugu mɛn arɔng.

³²Ko Yɔnadap Shimeya, hwêy gwà Davit, a yang ɛ, “À darwey, hwo kwon bare, ba ga mɔbɔs mwa nèy bewen mō wɛt, e Amnɔn nju mɛ zɔng de a ga ku. Pyɛ ma yemo de ya sé e yêy Absalɔm yimo tuk de Amnɔn à kana lashe gwà mɛ Tamar.

³³Hwo kwon sey tsak o na neha wɔgɔ, mwa nèy mō bewen na ga kushu. A sé e Amnɔn zɔng de a ga ku.”

³⁴E ji jeng o arɔng, Absalɔm a vɛ̌ tele. Ko wen bɛrɛng nekanang a ye ganga a bayis mɛ, a pere di bemat pyak ba sé kyè yi e gwông Hɔrɔnayim e vwarâ raku vey pom. A wɔ̀ ha a gbɔng gwɔ̀m pyɛ de a ga di.

³⁵Yɔnadap kwong a hwo yâng gbɔng gwɔ̀m, “Di, nèy bewen mō a nemo na ga vɛ hɛn, tyɛng sede remo de ma ga ha.”

³⁶A sè yɛnɛ ha, ko gobok, nèy bewen o na vɛ̌ pom, na tɛ̀ lwɛlɛ̂ sin, gbɔng gwɔ̀m arɔng tanga mwa bemat fwom mɛ ba wuna hɛn ba tosho tyɔng wɛt.

³⁷Absalɔm a tele, a wɔ́ na gwɔ̀m Gɛshur, Talmai Amihut, a wɔ sangal e hwomo neshey netat. Ko Davit a dopse tosho sesin hwey mɛ Amnɔn nepɔlɔ pyak.

³⁹Jeng de ba ga wɔrɔk hɛ, ko yey mɛ ya to toyo hɛ e ra Absalɔm.