Read berom 2 Samwɛl 14 Bible Online

2 Samwɛl 14 - berom bible

2 Samwɛl 14

¹Yowap a hwo di, yêy gbɔng gwɔ̀m Davit ya ga wɛrɛ e ra Absalɔm.

²Yaga ano a hwo tomo vɔk e repomô Tekowa, na be wɔ̀ yishi a yɛ hwâ netsitsɛng hwak de a sé e hwomo. A yang ɛ, “Ye hwà sé e ji sesin. Tɔrɔ hwo na berugû sesin, hwo kwon mɔmɔ hwo na něy wɛt. Ra sede hwà ga tɛ̀ nepɔlɔ pyak e de lashê yey yaga mwat a ku a hwo.

³E bama mo, kyè wɔ na gbɔng gwɔ̀m.” Ko Yowap a tɛ̀ a yɛ neha de a rɔda ha e nu.

⁴Jeng de hwā mo a pom na gbɔng gwɔ̀m, a gaba guduruk, a ye det e vwel ko a yang ɛ, “À Da, gbɔng gwɔ̀m, sɛlɛ me.”

⁵Gbɔng gwɔ̀m a rangal hɛ, a ye, “E sɛ́ de ye bɔrɔk hwo ɛ?” Hwā mo a toyo a yɛ, a ye, “Tik me zɔng, ma sé kuma, rwas hom a ga ku.

⁶Ko di, má vɔk nèy bewen neba, yɛn a hwo yol na bemɛn e hey, ko mwat hwak á sè e hwomo na a gas ɛn wɛt. Gwining a vɛ̌ rusu mumwɛ, a pere mɔrɔ hɛ.

⁷Ko di, cáng lɔ mo mwa ba wuna hɛn e ra me wɔgɔ, mé nára a yɛn womo de a rusu mumwɛ mo, na be mɔrɔ hɛ e tô nekên gwa mɛ de a ga mɔrɔ. Ka sede yɛn a ra ano, ko ma rɔda sè vit à hwey de hê re nedanelɔ mo. Yɛn a rɔda wey na pyɛ de ma tik ɛ yey, ko yɛn a rɔda tɛ̀, rezâ dalɔ hom re vuru hɛ e jey.”

⁸Gbɔng gwɔ̀m a yang ɛ, “Kyè vɔk e lɔ, ko ma rɔda di ha mō mo.”

⁹Ko a yang ɛ, “À darwey gbɔng gwɔ̀m, tik na banɛn o be sangal e ra me tanga belɔ hom, ko tik hwo tanga lɔ mō be sè vit à buru hak.”

¹⁰Gbɔng gwɔ̀m a toyo a yɛ, a yang ɛ, “Ka sede mwat hwak a hanat a hwo pyɛ cak, vey a me na yɛ, ko a rɔda to ba shɔk a hwo jim wɛt.”

¹¹Hwā mo a yang ɛ, “Neken gbɔng gwɔ̀m ne ros. Tik na hwo ra won na Dagwi Darwey, Dagwi mō na a dul mwât talâ pyɔ̌n nemi de a kwon gwɛ̌ e ra gawey o yi na mɔrɔ̂ hwey hom wɛt.” Gbɔng gwɔ̀m a toyo a yɛ, a ye, “Ma sira me na Dagwi Darwey, vit a pyɛ de yê té na hwey mō wɛt.”

¹²Ano kwong, hwā mo a yang ɛ, “Me ra won na hwo, à da, tik na me hanat a hwo pyɛ jining zɔng.” Gbɔng gwɔ̀m a yang ɛ, “Hanat.”

¹³Hwā mo a yang ɛ, “Yaga sɛ́ de hwà ga yong yerê pyɛ́ yemo e ra bemât Dagwi arɛt? Hwà kyɛ́ o nà toyo na hwey mō vey e lɔ. Yi ano hwà gang tó mo na shɔt yi na ha de hwà ha.

¹⁴Wot mwa wot a rɔda kushu. Wot a sé sede nshi de nà losho hɛ e vwel, ko be tɔk to hashe nɛ wɛt, yaga na ga ye jɔng. Ko Dagwi ê wey na neken mwat wɛt. Yaga ano, ê yong gwong, yaga na mwat de ba sira a yɛ na lɔ a sǎ e jey gbak-gbak wɛt.

¹⁵Ko di, à da, ma vey ha a hwo pyɛ yemo, yaga bemat ba ga tɛ̀ a me bengyip. Ma bare, ma rɔda ha na gbɔng gwɔ̀m, gyeng a rɔda wok won hom na a sɛlɛ me.

¹⁶Gyeng a rɔda sey me yi e vwɔ̂ mwat de e simo a wey na me tanga hwey hom, na a gas ot yi e vwel de Dagwi a ga kana nɔng bemat mɛ.

¹⁷Ma ye, ka sede ma sɛ̀ ha yi na hwo, ko ha rɔda nɔng me pɔngɔ, yaga hwà sé sede tom-lagwi wo Dagwi, hwó tɔk gas pyɛ́ ryat na pyɛ́ vyes. Tik na Dagwi Darwey, Dagwi mō a sè tanga hwo.”

¹⁸Ano kwong, gbɔng gwɔ̀m a yâng hwā mo, “Hwo kwon lɛrɛ a me na pyɛ cak de ma rɔda rangal hwo wɛt.” Hwā mo a yang ɛ, “À darwey hom, rangal me zɔng.”

¹⁹Gbɔng gwɔ̀m a rangal hɛ, a ye, “Nû Yowap ha sé e ji ha mo hemo wɛt a?” Hwā mo a toyo a yɛ, a ye, “Ey, e tsak o mwin, à da. A sé e mwât fwom mō Yowap de a misang a me pyɛ de mê ra, ko a tɛ̀ ha hemo mwa e nu hom.

²⁰Ko a ra ano, yaga na a yong mɛ̀ pyɛ́ de ya ga té. À darwey, hwà vɔk netsitsɛng sede ne tom-lagwi wo Dagwi, hwà tɔk kayɛ pyɛ de yé tē e ji jey.”

²¹A vane ano, gbɔng gwɔ̀m a yâng Yowap, “Me simo be wɔ toyo na wen wane mo Absalɔm. Ci wɔ jut ɛ.”

²²Yowap a hwo gaba guduruk na bayis mɛ e vwel, ko a yang ɛ, “Dagwi a tɛ̀ a hwo nerat, à gbɔng gwɔ̀m. A remo, ma tɔk ma ga sɛ̀ nerat e bayis mō, yaga hwà ga sey won hom.”

²³E bama mo, Yowap a kyè vɔk e Gɛshur, ko a wɔ̀ toyo na Absalɔm vey e Yɛrusalɛm.

²⁴Ko gbɔng gwɔ̀m a ye, “Tik na yɛ a wɔ̀ sangal e lɔ̂ tó mɛ, a kwon vey e bayis hom wɛt.” Yaga ano, Absalɔm a pere vɔk e ji lɔ mɛ, ko a tɔk vey e nuyêl gbɔng gwɔ̀m wɛt.

²⁵Absalɔm a sè rwat e bɛrɛng tyɔng wɛt. E ji Israyɛl mwa ba sɛ̀ mwat de ba somo hɛ yaga nerat mɛ sede Absalɔm wɛt. Yi e tɛ̂t rato mɛ pere vey e tas bwol mɛ vit a kebyàba.

²⁶A vɔk tot rey, e yɛrɛs hɛ zang hining e shey, yaga ha ga tɛ́ ɛ a yɛ dirik pyak. Kayɛ jeng de a yɛt hɛ, ko be mara nedirik o, ko ne wul kilo beba de be mara na pyɛ mara ye lɔ gwɔ̀m.

²⁷Absalɔm a vɔk nèy bewen netat na hwong gwining. Ba vo a hwong o rezâ Tamar, ko a sé zɛrɛ mo.

²⁸Absalɔm a sangal e Yɛrusalɛm a wul neshey neba, ko a tɔk vey e nuyêl da mɛ wɛt.

²⁹Tuhak, a hwo tomo be yishi a yɛ Yowap, na a tomo hɛ na da mɛ, ko Yowap a kyɛ́ ɛ nà vey. A to tomo hê neba, ko Yowap a to kyɛ́ ɛ na vey gbak.

³⁰Ano kwong, a hwo yâng bemât fwom mɛ, “Di in, hwirî Yowap gwa sé bagat na nwang, ko a vɔk ɛ baale e gwɛ. Kyè in wɔ̀ tɛ̀ kya e gwɛ.” Ko bemat o ba wɔ̀ tɛ̀ kya.

³¹Yowap kwong a sogo wɔ e lɔ Absalɔm, ko a yang ɛ, “Yaga sɛ́ de bemât fwom mō ba wɔ̀ tɛ̀ kya e hwiri hom arɛt?”

³²Absalɔm a yang ɛ, “Wok, ma tomo bemat na hwo wɔgɔ, hwo vey na me, ko hwà kyɛ́ o. Ma ga simo me tomo hwo na gbɔng gwɔ̀m, na hwo wɔ̀ rangal a me hɛ, yaga sɛ́ de a tɛ̀, me vɛ me yi e Gɛshur ɛ? A yang dal a me ka ma rɔngɔl e hwomo! Ko di a remo, me simo hwo yong gwong de mê wɔ di bayîs gbɔng gwɔ̀m, ko ka sede ma vɔk nɛn, de ê tɛ̀ be mɔrɔ me, tik na yɛ a mɔrɔ me zɔng!”

³³Yowap a hwo wɔ̀ na gbɔng gwɔ̀m, a ha a yɛ pyɛ de Absalɔm a ha. Ko gbɔng gwɔ̀m a hwo tomo Absalɔm a wɔ́. Absalɔm a hwo wɔ, a ye guduruk na bayis det e vwel e nuyêl mɛ. Gbɔng gwɔ̀m kwong, a sey ɛ, ko a kula hɛ e gèy.