Read berom 2 Samwɛl 15 Bible Online

2 Samwɛl 15 - berom bible

2 Samwɛl 15

¹Bamâ hane, Absalɔm a hwo séy a tó mɛ kyɛkyɛ̂ bedwa, na bedwa tanga bemât kyɔkɔs mɛ kuru batungun.

²E tulsa bop nagasi, na a wɔ̀ tumal e gwong vɔk e rwi repomo. Sede mwat hwak ê vey na ha de bê wɔ mɛ na gbɔng gwɔ̀m a gas a yɛn, ko Absalɔm a rɔda yila hɛ e bak gwining, na a rangal hɛ, kwɔn de a yi ɛ. Sede mwat o a ha a yɛ yere de a yi ɛ,

³tanga ha de a vey mɛ, ko Absalɔm a rɔda yang ɛ, “Ha mo ha sé rat, ha to sé tyɛng, ko di, vit a mwat de gbɔng gwɔ̀m a tɛ̀ na a wok hɛ.”

⁴Ko a rɔda to ye, “Káa, ka ba yâng tɛ̀, me sè mwât râ shɔt e vwel hemo ne! Ka kawɛ mwat de a yâng vey na ha mɛ na me, ko ma yâng ra a yɛn shɔt tsak o.”

⁵Ko ka sede mwat a kyè vey man na yɛ, na a ye guduruk e nuyel mɛ na a kyul ɛ, ko Absalɔm ê nára a mwat o vwɔ, a kaba hɛ, ko a kula hɛ e gèy.

⁶A dopse ra a BeIsrayɛl ano kayɛ jeng de ba vɛ̀sɛ na gbɔng gwɔ̀m, na a ra a yɛn shɔt. Yi ano, a jut neyey bemât Israyɛl.

⁷E bama neshey nenaas, Absalɔm a yâng gbɔng gwɔ̀m, “À da, jeng de má sè na sangal e Gɛshur e sevwêl Sirya, ma kana sira a Dagwi Darwey wɔgɔ, ka sede a toyo na me vey e Yɛrusalɛm tyang, ko ma rɔda wɔ̀ re a yɛ fongol na me nára a yɛ nɔrɔ. A remo, simo a me na me wɔ̀ e Hɛbrɔn, na me wɔ̀ sila sira mo.”

¹⁰Ko Absalɔm a tomo betom yaang vɔk na yére Israyɛl mwa, be ha a yɛ̄ wɔgɔ, “Jeng de yɛn a wok toshô bedurum, ko yɛn a vɛ̌ mok, yɛn a tē, ‘Absalɔm a ga tɛ́ ɛ gbɔng gwɔ̀m e Hɛbrɔn!’ ” Ano kwong, Absalɔm a wɔ e Hɛbrɔn.

¹¹Bemat naga beba yi e Yɛrusalɛm ba raa hɛ. A kana rini hɛn sede bekɛnɛt mɛ, ko yɛn a dopɛ na yey rining, yɛn a ka tɔk ɛ pyɛ cak wɛt.

¹²Jeng de Absalɔm á sè nása nenɔrɔ vɔk na Dagwi, a hwo tomo be wɔ̀ vey na Ahitɔfɛl yi e repomô Gilo, womo de á sè mwât vos a gbɔng gwɔ̀m Davit badu. Yi ano, bemat de ba wuna nu na be sogo nehywɛ ba gwɛ̌ gap, ko nepyak bemât raà bamâ Absalɔm na re nuyel na gwɛsɛ hɛn.

¹³Tom hwak a vey ha a Davit wɔgɔ, neyey bemât Israyɛl na ga wɛrɛn na Absalɔm.

¹⁴Ano kwong, Davit a yâng bemât badu mɛ de ba sé tanga yɛ, e Yɛrusalɛm, “Vey in! A sé gbing-gbing wot tele. Ka ano wɛt, hwak a rɔda hywit ɛ yi e vwɔ̂ Absalɔm wɛt. Rá in ziri, ka ano wɛt, a rɔda ye dedung, a vey fút ot, na a hwo e ra gbɔng repomo remo, na a wey na kawɛ mwat.”

¹⁵Yɛn a hwo toyo a yɛ ba yang ɛ, “À darwey, wot bemat mō wot a sé e yong ot na wot ra kayɛ pyɛ de hwà ha a wot.”

¹⁶Ano kwong, gbɔng gwɔ̀m a vɛ̌ nu ɛ, ko mwa belɔ mɛ tanga bemat mɛ mwa ba raa hɛ. Ko a tik bejɛn-beha kuru na be bɛrɛng lɔ mo.

¹⁷Jeng de a kaba gwong, yɛ na mwa bemat de ba raa hɛ, ko yɛn a pere tumal e lɔ hê tala mo.

¹⁸Mwa bemat mɛ ba kwey e nuyel mɛ, mwa na bemât gyeng mɛ tanga bemât como naga betyiimin (600) de bá kana raa hɛ yi e Gat.

¹⁹Ko a hwo yâng Itayi, mwât nuyêl BeGat o, “Yaga sɛ́ de hwô raa hot arɔng ɛ? Toyo na hwo wɔ̀ sangal na gbɔng gwɔ̀m pwas. Hwà sé mwat duk, hwà tele yi e repomo mō.

²⁰Di, hwà sé mwat pwas e ngamo zɔng, ko yunung ma rɔda tɛ̀ o hwo kyě gǎ tanga wot a? Ma ka tɔk kwɔn de mê kyè vɔk ɛ wɛt. To o, ko hwo vɔk ɛ bemat mō. Tik na Dagwi Darwey a dura a hwo nerat mɛ, ko a sege hɛ yi na yin wɛt.”

²¹Ko Itayi a toyo a yɛ, a yang ɛ, “À darwey, ma sira me na Dagwi Darwey, ma to sira me na neken mō arɔng, kahɛ kwɔn de hwô sɛ̀ ɛ, ma rɔda sè tanga hwo, kɛ ê sè gwo reku ow.”

²²Davit a yâng Itayi, “Kwey e yel, cot a wot.” Itayi kwong a kwey e yel ko mwa bemât raa mɛ na belɔ mɛn ba dopɛ e yɛ.

²³Mwa bwang bemât Yɛrusalɛm ba tosho ba dak sekun sede ba di ɛn ba sé kyè. Ko gbɔng gwɔ̀m o a ye dɔ a nɛk Kidrɔn, ko mwa bemat mɛ tanga yɛ ba kyè vɔk e bak tê hey.

²⁴Zadɔk, yɛ piris á sè e hwomo arɔng, ko BeLevi de bá sè tanga yɛ, ba vɔk ɛ Kundung Wuna-na-Sirâ Dagwi. Bá tik gwɛ e vwel sɛ̌ bemat ba nusu mwa yi e ji gbɔng repomo. Abiyatar, piris, á sè e kwɔn o arɔng.

²⁵Ko gbɔng gwɔ̀m a yâng Zadɔk, “Jut Kundung Wuna-na-Sira vɔk e ji repomo. Ka sede Dagwi Darwey a dura a me nerat mɛ, ko a rɔda ba toyo na me tuhak, ano ma rɔda ba di gwɛ na kwɔ̂n sangâl gwɛ.

²⁶Ko ka sede a di, ma jam a yɛ wɛt, tik na a ra a me pyɛ de ya jam a yɛ.”

²⁷A to yâng Zadɔk, “Di, toyo hin, hwo tanga Abiyatar, ko jut in besɔ min Ahimaas tanga Yɔnatan, na yin toyo vɔk e ji gbɔng pomo mo tyang.

²⁸Di kwong, ma rɔda sangal me gyeng e tê hey e bak nekwɔn té dɔ à Yɔrdan sɛ̌ ma wok ha yi na yin.”

²⁹Ano kwong, Zadɔk tanga Abiyatar ba jut Kundung Wuna-na-Sirâ Dagwi vɔk e Yɛrusalɛm, ko ba sangal e hwomo.

³⁰Davit a hwo tut na sesin vɔk e Raku Pat, a bang rato mɛ, ko a kyè na bol mɛ sana bekpatak. Mwa vemo de ba sé tanga yɛ ba bangas bato mɛn arɔng, ba sé tosho ba raa be kyè.

³¹Ba ha a Davit wɔgɔ, Ahitɔfɛl a sé e ji bemât sogô nehywɛ tanga Absalɔm. Ko Davit a ye, “À Dagwi Darwey, tɛ̀ netsitsɛ̂ng Ahitɔfɛl ne tɛ́ ɛn netɔn.”

³²Jeng de a wul ratɛt o, kwɔn de be re a Dagwi ɛ fongol, ko sa mɛ Hushai, WoArki, a vey man na yɛ e hwomo. Berugu mɛ ba sè e hama, ko a tɛ̀ fongol e rato mɛ arɔng.

³³Davit a yang ɛ, “Ka sede hwà kyè tanga me, ko hwà rɔda gwɛ̌ a me ɛ nedirik.

³⁴Hwà rɔda tɔk sɛlɛ me, ka sede hwà toyo wɔ e ji gbɔng repomo na hwo wɔ̀ yâng Absalɔm wɔgɔ, hwô tɛ́ o mwât fwom mɛ, tyɛng sede remo de hwà ra a da mɛ fwom raane. Yi ano, hwà rɔda lashe redu de Ahitɔfɛl a vo a yɛ rɛ.

³⁵Zadɔk tanga Abiyatar, bepiris, ba sé e hwomo arɔng. Tik na hwo ha a yɛn kayɛ pyɛ de hwà wok e ji lɔ gbɔng gwɔ̀m.

³⁶Remo de Ahimaas tanga Yɔnatan ba sé tanga beda mɛn, yin tɔk tomsal a me kayɛ pyɛ de yin a wok e vɔ mɛn.”

³⁷Ko Hushai, sâ Davit, a wul Yɛrusalɛm tyɛng e jeng de Absalɔm á sè yeles e ji repomo mo arɔng.