Read berom 2 Samwɛl 16 Bible Online

2 Samwɛl 16 - berom bible

2 Samwɛl 16

¹Jeng de Davit a ga kana kyè tyɔng wɔ̀ kwey ratɛ̂t raku, a man na Ziba, mwât fwôm Mɛfibɔshɛt, de a sé kyè vey man na yɛ. A vɔk ɛ bemadung beba, de a tɛ̀ a vɛ bagat kpam-tuk naga beba (200), nèy anap gushuk de ba shumung nɛ naga gwining (100) na nèy cɔ́gɔt nelǎ mo naga gwining (100) tanga nshî anap e bura gwining.

²Gbɔng Gwɔ̀m Davit a yâng Ziba, “Hwà vêy sɛ́ na pyɛ́ yemo ɛ?” Ziba a toyo a yɛ, a ye, “À da, ma vey na bemadung o na belɔ mo be lagsa, kpam-tuk tanga nèy cɔgɔt o, yaga na bewen be tɛ̀ e nu, ko nshî anap, yaga na be gang mɛ yey e ji hey hemo.”

³Ko gbɔng gwɔ̀m a rangal hɛ, a ye, “Ko sɛ̌ Mɛfibɔshɛt, hwêy hwêy dalɔ mō a wɛ̌ a yɛ ɛ?” Ziba a toyo a yɛ, a ye, “Á wane a sé sangal e Yɛrusalɛm, a ye, a remo bemât Israyɛl ba rɔda toyo a yɛ na segwɔm da mɛ.”

⁴Jeng de gbɔng gwɔ̀m a wok ano, a vɛ̌ yâng Ziba, “Di, pyɛ̂ Mɛfibɔshɛt mwa ya ga tɛ́ ɛ myo.” Ziba a ye, “À darwey hom gbɔng gwɔ̀m, ma sé mwo. Ka ma di wɛ̂ng sangal na hwo zɔng.”

⁵Jeng de Gbɔng Gwɔ̀m Davit a wɔ̀ wul Bahurim, a di mwat hwak de be tang ɛ à Shimei Gera, wo cang lɔ Saul. A sé nusu, a wɔ̀ man na yɛ, ko a hwo vagâm dusa hɛ.

⁶A hwo bomos Davit tanga bemat mɛ na beta, mwa ano de mwa bemât como mɛ ba gwɔrɔ hɛ.

⁷A mok gawey e ra Davit, a tē, “Kyè! Kyè yi e ngamo! Mwât mɔbɔ̂s bemat! Gwomwat gwoves zɔng!

⁸Yàa! Dagwi Darwey a sé tala a hwo pyɔ̌n nemi de hwà mɔbɔs belɔ Saul, na hwo sey ɛ negwɔm mɛ. Dagwi Darwey a ga sey ɛ segwɔm o, a nɔ̂ng hwey mō Absalɔm. Ko hwo, ba ga gang o yaga hwà sé mwât mɔbɔ̂s bemat!”

⁹Abishai de neng mɛ à Zɛruya a hwo yâng gbɔng gwɔ̀m, “Yaga sɛ́ de hwà tik revîn vu remo re dusa hwo ɛ? Tik me wɔ e hwomo na me tùt rato mɛ.”

¹⁰Gbɔng gwɔ̀m a yang ɛ tanga gwà mɛ Yowap, “Pyɛ min ya sé wɛt, à yin nèy Zɛruya! Ka sede e Dagwi Darwey à wɛ de a yang ɛ, a vey dusa me, wǎ de a vɔk reto na a rangal hɛ retîn pyɛ mo ɛ?”

¹¹Ko a to gwɛ̌ ha a Abishai tanga mwa bemat de ba sé tanga yɛ, “Di in, hwêy tɔ̂ jim hom ha sé jama na he mɔrɔ me e negya, tàga WoBɛnyamin arɛt? Tik in hɛ. A re nuyel na sedusa mo, yaga e Dagwi Darwey à wɛ de a tomo hɛ.

¹²Wa a tɔk, kɛ gyeng Dagwi Darwey a rɔda di reyɔm de me sɛ, ko a rɔda tosho reyɔm hom, na a sege dusa mo he tɛ́ ɛ nerat ɛ?”

¹³Ko Davit tanga bemat mɛ ba re nuyel na kwɛngɛl mɛn. Shimei a sé kyě raa hɛn e bak vwâ rahwol, a sé re nuyel na sedusa, na bomos hɛn na beta, a páa ɛn na fongol.

¹⁴Gbɔng gwɔ̀m tanga bemat mɛ mwa ba wɔ̀ wul Rɔt Yɔrdan, ba ga ruru tashak, e hwomo ba de pɔnglɔ.

¹⁵Absalɔm kwong a ba wul, a yel e Yɛrusalɛm tanga mwa bemât Israyɛl de ba sé tanga yɛ. Ahitɔfɛl arɔng a sè e ji bemat o.

¹⁶Jeng de Hushai WoArki, sâ Davit a vey na Absalɔm, a kyul ɛ, a ye, “Neken mō ne ros, a gbɔng gwɔ̀m! Show, à da!”

¹⁷Absalɔm a hwo ye, “Àa, à Hushai, tɛ̂ yey o a hane de hwà tɛ̀ na sá mō mo a? Yaga sɛ́ de hwà kyè tanga yɛ wɛt ɛ?”

¹⁸Hushai a toyo a yɛ, a ye, “E rɛ̌ de mê ra ano ɛ? Ma sé wo mwat de Dagwi Darwey tanga BeIsrayɛl ba kasa, na a tɛ́ ɛ gwɔ̀m, ko ma rɔda sè tanga yɛ.

¹⁹Ko di, e wǎ de mê ra a yɛ fwom ɛ? E hwey o kɛ da mo ɛ? Sede remo de ma kana ra a da mō fwom, ano de ma rɔda to ra a hwo.”

²⁰Absalɔm kwong a hwo yâng Ahitɔfɛl, “Vo a wot redu e ra pyɛ de wot a rɔda ra.”

²¹Ahitɔfɛl a yang ɛ, “Di, da mō a tik bejɛn mɛ na be bɛrɛng lɔ mo. Yel na hwo vɔk ɛn. Ano BeIsrayɛl mwa ba rɔda tɔk, hwà ga gas o na da mō, vit a yong hak e tē min. Ano kwong, bemât raà bama mō ba rɔda gwɛ̌ yey ting.”

²²Yɛn a hwo yong a Absalɔm buk e ragyip duk, ba vɛ̀sɛ a yɛ na bejɛn o, ko e bayîs bemât Israyɛl dɛtdɛt, Absalɔm a yel a dyɛngɛs na vɛ.

²³E jeng o, karɛ redu de Ahitɔfɛl a vo, be sey zɔng sede ra yi na Dagwi. Ano de Davit a kana raa hâ Ahitɔfɛl, ko Absalɔm a to sé raa arɔng.