Read berom 2 Samwɛl 17 Bible Online

2 Samwɛl 17 - berom bible

2 Samwɛl 17

¹E bamâ hane, Ahitɔfɛl a hwo yâng Absalɔm, “Tik na me kasa bemat gu kuru na vɛ baba (12,000), ko e ji turuk hemo ma rɔda raa bol Davit.

²Ma rɔda wɔ̀ hwo e ra yɛ, jeng de a sé rɔngɔl ná ruru jwɛɛnɛn, ko a sé a yɛ gbɛrɛk. A rɔda tɛ̀ bengyip, ko bemat mɛ ba rɔda tele. Mê mɔrɔ gbɔng gwɔ̀m o nju mɛ zɔng,

³ko mê toyo na bemat mwa vey na hwo, sede remo de yimo gyam yɛn a kana toyo vɔk na yɛ, yɛ womo de hwà sé jama a remo. Ko bemat o ba rɔda sangal tyang.”

⁴Ha hane ha jam a Absalɔm tanga mwa bemakuk Israyɛl.

⁵Ko mwa ano a ye, “Tik wot yila Hushai WoArki arɔng, na wot rangal hɛ wot wok pyɛ de ê ye.”

⁶Ba hwo yila Hushai, a vey, ko Absalɔm a yang ɛ, “Di, redu de Ahitɔfɛl a vo a het ngan. Wot raa hɛ a, kɛ hwà di e rɛ̌? Vo a wot mo a redu mō.”

⁷Hushai a hwo yâng Absalɔm, “Redu de Ahitɔfɛl a vo e jeng yemo ra sé tyɛng wɛt.

⁸Hwà tɔk da mō tanga bemat mɛ ba sé besugâ como. A remo shom yê re a yɛn yey tyɔng wɛt, ba sé sede cwey de ba hashe a yɛ nèy mɛ. Da mō a sé kaan como, ê dyɛng e kwɔn hining o tanga bemat mɛ wɛt.

⁹Kɛ gyeng, a remo a sé e ji fwara kɛ e kwɔn hak e lɛrɛ ayi. Ka sede ê pɛrɛ hwo e ra bemât como mō, ko kawɛ mwat de a wok a rɔda ye, ‘Di, ba ga wey na bemat de be raa Absalɔm.’

¹⁰Hane ha rɔda tɛ̀ vemo e ji bemat mō de ba dal na yey ting, vemo de ba vɔk yey sede begukum, ba rɔda tɛ̀ bengyip, yaga kawɛ mwat e ji Israyɛl a tɔk da mō a sé sugâ como tyɔng wɛt, bemat mɛ arɔng ba sé bekaan como.

¹¹Redu de ma rɔda vo à ret ngan: Tik na hwo tula BeIsrayɛl mwa neyɛnɛ vwel o, nepyak mɛn nê sè sede bazɛ̂k kwogôm gbɔng rep. Ko hwo kyè e nuyel mɛn vɔk e de como mo.

¹²Ano kwong, wot a rɔda wɔ̀ jama Davit, wot ê hwo e ra yɛ hák e kahɛ kwɔn de wot a sɛ̀ ɛ, ko kɛ yɛ kɛ hwak e ji bemat mɛ vit a winde ê hywit ɛ na neken.

¹³Ko ka sede a tele vɔk e ji repomo, bemat mot mwa ba rɔda vey na rik, bê rɔnɔ mɛ jwâ-pomo mo, bê hwɔshɔ mɛ rɛ vɔk e ji nɛk, bê tɛt ɛ gwofwa gwohwak e ra mumwɛ wɛt.”

¹⁴Ha hane ha jam a Absalɔm tanga mwa BeIsrayɛl, yɛn a ye, “Redu de Hushai WoArki a vo ra dal remo de Ahitɔfɛl a vo.” Ko e ji hâ mwin, Dagwi Darwey a ga kana yong ɛ na a lashe ha rat de Ahitɔfɛl a vo, na a bin vey a Absalɔm na gawey.

¹⁵Hushai a wɔ̀ ha a Zadɔk tanga Abiyatar, bepiris, redu de Ahitɔfɛl a vo a Absalɔm tanga bemakûk Israyɛl na remo de yɛ pyɛ mɛ a vo a yɛn.

¹⁶Ko a yang ɛn, “A remo ngan, tomo hin be wɔ̀ ha a Davit, yɛ a kwon pɔl e tê hey e bak nekwɔn té dɔ a Yɔrdan e ji turuk hemo wɛt. Ko tik na yɛ a ye dɔ e gura gworo ziri. Ka ano wɛt, bê wey na yɛ tanga bemat mɛ mwa.”

¹⁷Yɔnatan Abiyatar tanga Ahimaas Zadɔk ba sè sangal e kwɔ̂n lwêl nshî Ɛn-Rɔgɛl. Ba sè gyeng e hwomo, e bamâ repomô Yɛrusalɛm, yaga ba simo be di ɛn jeng de yɛn a yel e ji repomo mo wɛt. Hwong fwom hwak a sé de ê wokos a yɛn pyɛ́ de ya sé tē, ko ê kyese wɔ̀ ha a yɛn, yɛn arɔng bê kyese wɔ̀ ha a Davit.

¹⁸Ko wen hwak a hwo di ɛn, a pere wɔ̀ ha a Absalɔm. Yɛn kwong, ba hwo kyè ziri, ba wɔ̀ yel e lɔ mwat hwak e Bahurim. Mwat o a vɔk hwes nshi e bwî lɔ mɛ, yɛn a wɔ̀ yel ba lɛrɛ hɛn e gwɛ.

¹⁹Hwâ lɔ mo a hwo lasha gwoput e rwi hwes o, a tɛnɛ ɛ pyɛ́ a dul ɛn mɛ, vit a mwat de a tɔk pyɛ de ya sé e kwɔn o.

²⁰Jeng de bemât Absalɔm ba vey sɛ̀ hwā mo, ba hwo rangal hɛ, ba ye, “BeYɔnatan tanga Ahimaas a vɛ ɛ?” Ko a yang ɛn, ba ga ye dɔ a rɔt be kyè. Yɛn a jama, ko yɛn a ka sɛ̀ ɛn wɛt, yɛn a vɛ̌ toyo hɛn vɔk e Yɛrusalɛm.

²¹E bama de yɛn a ga kyè, BeYɔnatan tanga Ahimaas ba nusu yi e ji hwes o, yɛn a wɔ̀ ha a gbɔng gwɔ̀m Davit. Yɛn a ha a yɛ, a ye dɔ a rɔt o ziri, yaga Ahitɔfɛl a ga yong begwông nengyas na a wey na yɛ.

²²Davit kwong a sogo tanga bemat mɛ mwa, ba hwo ye dɔ. E rwa hwôl gasi, vit a gwining de a tɛt ɛ wɛt.

²³Jeng de Ahitɔfɛl a di, ba kyɛ́ ɛn nà ra fwom na redu de a vo a yɛn, a vɛ̌ ye lak a madung mɛ, a kyè vɔk e repomo mɛ, a yong pyɛ̂ lɔ mɛ gyat. E bama mo, a wɔ̀ ta ngyɔt a ku. Ba lɛrɛ hɛ e sak beda mɛ.

²⁴Davit a kana wɔ̀ wul repomô Mahanayim, jeng de Absalɔm arɔng tanga mwa bemat mɛ ba ye dɔ a Rɔt Yɔrdan.

²⁵Absalɔm kwong a ga kana tɛ̀ Amasa Yɛtɛr a tɛ́ ɛ mwât nuyêl como mɛ e tô Yowap. Yɛtɛr yɛ a WoIshmayɛl de a vo Abigɛl hwông Nahat. Abigɛl o a sé gwa Zɛruya, dê Yowap.

²⁶Absalɔm tanga BeIsrayɛl ba tɛ̀ bǔk como mɛn e bak batîn vwêl Gileyat.

²⁷Jeng de Davit a wɔ̀ wul Mahanayim, Shobi Nahash yi e Raba, gbɔng repomô BeAmɔn, na Makir Amiyɛl yi e Lɔ-Dɛbar tanga Barzilai yi e Rogelim e vwêl Gileyat ba wɔ̂ sɛ̀ ɛn e hwomo.

²⁸Ba vey a Davit tanga bemat mɛ na beput na pyɛ̂ banga tanga neshǐ na nerwey bwos. Ba vɔk ɛ pyɛ̂ yenêng alkama na baale, na nemuk pyɛ̂ yeneng de ba halang, na yére shila bya, na shok, na nevasal pigidik, na hamal nevasal rɔndɔng, tanga tyīmit cak, yaga yɛn a tɔk, Davit tanga bemat mɛ ba rɔda ruru, bê wok vyong tanga yêy hwɔshɔ yaga kwɛngɛl e ji hey.