Read berom 2 Samwɛl 18 Bible Online

2 Samwɛl 18 - berom bible

2 Samwɛl 18

¹Davit a tula bemât como mɛ e dem hining, a gas ɛn bagyɛng bagyɛng vê gu gu na vê naga naga. A tɛ̀ a yɛn bemât nuyel.

²A gas ɛn bagyɛng o batat, a tɛ̀ regyɛng o rining e vwɔ̂ Yowap, rining e vwɔ̂ gwà mɛ Abishai, tanga rining e vwɔ̂ Itayi WoGat. A yâng bemat mɛ, “Me pyɛ hom ma rɔda wɔ̄ e de como mo tanga yin arɔng.”

³Bemât como mo ba yang ɛ, “Wey, hwà rɔda kyè tanga wot vɔk e de como wɛt. Ka sede como ya wɔ̀ fes, wot a hwo tele, bemât repugu mot ba rɔda tik ot, ka a ka sé de rebit mot ba kushu, hane ha sé pyɛ wɛt. Ko bê tɛ̀ gap mɛn na be wey na hwo, yaga neken mō nju mo na dal ne bemat gu kuru (10,000). A dal naka na hwo sangal e ji repomo, ko hwo tɔk tomsal a wot na sɛlɛ.”

⁴Gbɔng gwɔ̀m a yang ɛn, “Pyɛ de yin a di ya jam a yin ma rɔda ra.” A tumal e vwara rwi repomo, ko bagyɛng bemât como ba kwey, bahak naga, bahak gu.

⁵A hwo nɔ̂ng Yowap na Abishai tanga Itayi nu, yɛn a vɔk lɛ̀ɛ wɔ na wen Absalɔm yaga yɛ. Bemât como mwa bá sè wokos pyɛ de a sé ha mo.

⁶Ano kwong, bemât como mo ba kyè, na be to como na bemât comô Absalɔm, vɛ a BeIsrayɛl. Ba tó yɛ e ji rehwôt Ɛfrayim.

⁷Bemât Davit ba re BeIsrayɛl. Gwopyɛ mo gwa sè gwovwes o ding-ding, bemat de ba mɔbɔs ba wul gu kuru baba (20,000) tuk hane mo.

⁸Como mo ya karak hɛ kagwa e ji vwel o, bemat de ba kushu e ji rehwot tuk hane yaga negbâng kwɔn o ba dal vemo de ba mɔbɔs na bewal na nepyak.

⁹Absalɔm a sè to como e ra dwa-madung mɛ, a vɛ̌ man na bemât comô Davit o behak. Jeng de dwa-madung o wa sé tele, wà pere yel e nɛ̂n nelang gbɔng cɔgɔ̂t ouk, ko nelang o na pere kaba hɛ e tôt rato mɛ. Madung o wa pere tele, wa hala Absalɔm e hwomo a sè ra rerɛgɛ.

¹⁰Hwak e ji bemat o a di ɛ, ko a wɔ̀ ha a Yowap a ye, “Ma di Absalɔm a sé ra rerɛgɛ e nelang cɔgɔ̂t ouk.”

¹¹Yowap a yang ɛ, “Hwà di ɛ a! Yaga sɛ́ de hwà mɔrɔ hɛ e jeng o wɛt ɛ? Ka ma yâng nɔng o dyam pyɛng kuru na gyindi.”

¹²Mwat o a toyo a Yowap na ha a ye, “Ka ba ka sila a me vɔ na dyam pyɛng gu, ko ma rɔda nára vwɔ hom na me ra mɛ hwêy gbɔng gwɔ̀m wɛt. Wot mwa wot a wok na betong mot gbɔng gwɔ̀m a yang o na Abishai tanga Itayi, yin gyeng wen womo Absalɔm yaga yɛ.

¹³Ko ka sede ma yâng tɛ̀ vwɔ hom, na me mɔrɔ hɛ, ko gbɔng gwɔ̀m a de wok, yaga vit a pyɛ de ya sé e lɛrɛ a yɛ, ko hwô de hwɔtɔ tó mō na hwo tik me.”

¹⁴Yowap a yang ɛ, “Ma rɔda lashe jeng na hwo e ngamo wɛt.” A hwo jut bebara betat e vwɔ mɛ, a wɔ̀ luga mɛ Absalɔm e ragey. A sè rɔngɔl kwen rerɛgɛ e nelang cɔgɔ̂t ouk o,

¹⁵jeng de bemât comô Yowap kuru de be vɔkɔs a yɛ pyɛ̂ como ba pere rɔnɔ Absalɔm, ko ba tala mɔrɔ mo.

¹⁶Yowap kwong a pɛl durum na be tik como mo, ko bemât como mɛ ba tik rô BeIsrayɛl.

¹⁷Ba jut revîn Absalɔm ba wɔ̀ bomo rɛ e ji gwovɔng ciwil e ji rehwot, ba tula ɛ gbɔng hwôl beta e rak o. Ko BeIsrayɛl mwa ba tele, kawɛ mwat vɔk e lɔ mɛ.

¹⁸Gyam Absalɔm a sè rɔngɔl kwen a ga kana lɔk pyɛ bare na yɛ e Nɛk Gbɔng Gwɔ̀m, yaga a ye, remo de vit a yɛ na hwey de ba rɔda bare mɛ na reza mɛ. Ano kwong a vo a pyɛ bare mo reza mɛ, ko ba rɔɔ yishi kwɔn o à “Pyɛ barê Absalɔm” vey e remo.

¹⁹Ano kwong Ahimaas Zadɔk a yâng Yowap, “Tik na me tele wɔ̀ ha a gbɔng gwɔ̀m yɛgɛt yemo de Dagwi Darwey a ga sey ɛ yi e vwɔ̂ bemât repugu mɛ.”

²⁰Ko Yowap a yang ɛ, “Wey, hwà rɔda wɔ na yɛgɛt yemo yunung wɛt. Hwô tɔk ba wɔ́ na yɛgɛt o hak a tuk, ko de yunung wɛt, yaga hwêy gbɔng gwɔ̀m ha ku.”

²¹Ano Yowap a yâng mwât fwom WoEtiyopya, “Ci wɔ̀ ha a gbɔng gwɔ̀m pyɛ de bayis mō ba di.” WoEtiyopya mo a hwo ye det e nuyel Yowap, ko a vɛ̌ nára hɛ na setelê wɔ.

²²Ahimaas a hwo shonong e ra Yowap, a ye, “Tik na me tele me raa e bamâ WoEtiyopya mo, ka de sɛ́ yê ka tē ayi.” Yowap a yang ɛ, “Yaga sɛ́ de hwô wɔ à hwey hom ɛ? Hwà rɔda sɛ̀ pyɔlɔ cak e hâ yɛgɛt o wɛt.”

²³Ko Ahimaas a ye, “Ka a ka sé sɛ́ ow, sɛ̌ mê raa WoEtiyopya mo.” Ko Yowap a yang ɛ, “Ci!” Ahimaas a hwo tele a kwey e gwông tyɛ̂l Yɔrdan, a pere kwey WoEtiyopya.

²⁴Davit kwong a sè sangal e tê rwi nusu na gwo yel e ji repomo. Mwât bɛrɛng nekanang a tút vɔk e rak o e ra jwâ-pomo, ko a hwo ye ganga, a vɛ̌ di mwat hwak a sé tele vey nju mɛ.

²⁵A hwo gbɔ, a hanat a gbɔng gwɔ̀m. Gbɔng gwɔ̀m o a yang ɛ, “Ka sede mwat o a sé tele nju mɛ, sɛ̌ a sé kyè vey na yɛgɛt.” Mwat o a gwɛ̌ vêy vey bagat.

²⁶Mwât nekanang o a to di mwat wo neba a to sé kyè vey na setele arɔng. A hwo hanat a mwât gyeng rwi repomo, a ye, “Di, mwat o hwak à wane a to sé tele vey.” Gbɔng gwɔ̀m a ye, “Wane mo arɔng a to sé kyè vey na yɛgɛt.”

²⁷Mwât nekanang a ye, “Ma di setelê mwat wo yel sede a sé Ahimaas Zadɔk.” Ko gbɔng gwɔ̀m a ye, “Wane a sé mwat rwat, a sé kyè vey na yɛgɛt yat.”

²⁸Jeng de Ahimaas a vey bagat na gbɔng gwɔ̀m, a vɛ̌ ye, “Tyang zɔng!” A hwo gaba e nuyel mɛ, a ye, “Be somo Dagwi Darwey, Dagwi mō, de a ga nɔng o wɛng e ra bemât repugu mō, à darwey!”

²⁹Gbɔng gwɔ̀m a ye, “Sɛ̌ wen wane Absalɔm a sé tyang à yɛ a?” Ahimaas a ye, “Jeng de Yowap a sè tomo mwât fwom mō tanga me, ma di kwɔn o ha rikta hɛ, ko ma tɔk kɛ e sé wɛt.”

³⁰Gbɔng gwɔ̀m a yang ɛ, “Kwey tumal e bak gwining.” Yɛ kwong a kwey a wɔ̀ tumal.

³¹E jeng o, WoEtiyopya mo a pom, a hwo yâng gbɔng gwɔ̀m o, “Neken mō ne ros! Ma vey a hwo na yɛgɛt yat! Yunung Dagwi Darwey a ga sey o yi e vwɔ̂ bemât repugu mō mwa.”

³²Gbɔng gwɔ̀m a rangal hɛ a ye, “Sɛ̌ wen wane Absalɔm a sé tyang à yɛ a?” WoEtiyopya mo a toyo a yɛ, a ye, “À darwey, tik na bemât repugu mō na mwa bemât sogô nehywɛ be tɛ́ ɛn tyɛng sede wen wane Absalɔm.”

³³Yêy gbɔng gwɔ̀m ya lashe hɛ ding-ding. A vɛ̌ tút vɔk e ji duk rak o, a sé kyě tosho. E tē, “Káa! À hwey hom Absalɔm! Anyee yeey, a hwey hom, à hwey hom Absalɔm, ka a yang sé e me wɛ de ma ku ko hwo wɛt! Káa, à Absalɔm, à hwey hom, à hwey hom!”