Read berom 2 Samwɛl 19 Bible Online

2 Samwɛl 19 - berom bible

2 Samwɛl 19

¹Ba ha a Yowap, gbɔng gwɔ̀m a sé tosho sesîn hwey mɛ Absalɔm.

²Yaga ano, yey pyɛng de ba vɔk yaga dî wɛng e como ya tɛ́ ɛ yey sit na mwa, yaga bemât comô Davit ba wok, gbɔng gwɔ̀m a vɔk lashê yey yaga rekû hwey mɛ.

³Ba yel mɔɔt e ji repomo sede bemat de ba wok rekyen, yaga ba ré ɛn e como.

⁴Gbɔng gwɔ̀m a bang bayis mɛ, ko a moklo sesin, a tē, “Káa, à hwey hom! À hwey hom Absalɔm! À hwey hom, à hwey hom!”

⁵Yowap kwong a wɔ́ na gbɔng gwɔ̀m. A yang ɛ, “Yunung hwà ga tɛ̀ a bemat mō rekyen, bemat vemo de ba sey neken mō na ne nèy mō bewen na behwong, na neken beha mō tanga ne bejɛn mō.

⁶Hwà tɛ̀ yey na bemat vemo de be kyɛ́ ɛn hwo, ko hwà kyɛ́ o vemo de be tɛ̀ yey na hwo! Hwà ga dura dɛdɛɛt yunung wɔgɔ, bemât nuyêl como tanga bemat mō mwa ba sé a hwo pyɛ cak wɛt. Ma di a remo, ka mwa wot vemo wot a yang kushu, na Absalɔm a nàra kwen, ka hwà sila na yey pyɛng.

⁷A remo, sogo! Nusu na hwo ha a bemât fwom mō hâ yɛklɛ yey. Ka sede ano wɛt, ma sira a hwo na Dagwi Darwey vit a mwat de a rɔda to sè tanga hwo e ji turuk hemo. Ko pyɛ mo ya rɔda tɛ́ ɛ vyes o ye dal pyɛ́ vyes de ya ga sang té na hwo yimo hwo wen vey e yunung.”

⁸Ano kwong, gbɔng gwɔ̀m a sogo, a wɔ̀ sangal e rwi repomo. Bemat mɛ ba wok, a sé e hwomo, ko mwa yɛn ba wɔ̀ tula hɛn e nuyel mɛ. BeIsrayɛl mwa ba ga kana tele wɛrɛn, kawɛ mwat a kyè vɔk e lɔ mɛ.

⁹Mwa hɛn e kahɛ kwɔn ba hwo tô cuna e tē mɛn, ba tē, “E Gbɔng Gwɔ̀m Davit wɛ de a kana sey ot yi na bemât repugu mot, a sey ot yi e vwɔ̂ BeFilisti. Ko di, a remo a ga tele, a hàla vwel o yaga Absalɔm.

¹⁰Ko Absalɔm de wot a tɛ̀ ɛ na a tɛ́ ɛ gbɔng gwɔ̀m mot o, a ga ku e ji como. A remo, yaga sɛ́ de wot e bɛrɛng yuu nà wɔ̀ jut Gbɔng Gwɔ̀m Davit vey mɛ e lɔ ɛ?”

¹¹Jeng de hâ BeIsrayɛl hane ha gaba e betong Davit, a hwo tomo vɔk na bepiris, yɛn à Zadɔk tanga Abiyatar, a yang ɛn, yɛn a rangâl bemakuk BeYuda wɔgɔ, “E sɛ́ ya tɛ̀ yin a sé vê bama e ra hâ toyo na gbɔng gwɔ̀m vɔk e lɔ mɛ arɛt?

¹²Yin a sé cáng hom, nemi hom arɔng. Yaga sɛ́ de yin ê de tɛ́ in vê bama e ra toyo na me vɔk e lɔ ɛ?”

¹³Davit a to yang ɛn, be ha a Amasa wɔgɔ, “Hwà sé cang hom. Yi e remo, ma rɔda tɛ̀ o hwo sè mwât nuyêl bemât como hom e tô Yowap. Tik na Dagwi Darwey a wey na me, ka sede ma kwɔrɔ ha hom hemo.”

¹⁴Ha hane ha hwɔtɔ neyey BeYuda mwa sede mwat gwining. Yɛn a hwo tomo a yɛ wɔgɔ, a toyo vey e lɔ, yɛ tanga bemat mɛ mwa.

¹⁵Gbɔng gwɔ̀m a hwo sogo wɛrɛ e lɔ, a wɔ̀ wul Yɔrdan. BeYuda ba ga wul Gilgal, na be ye dɔ a rɔt o, na be wɔ̀ kyɔk ɛ a ye dɔ wɔ e lɔ.

¹⁶E jeng o Shimei Gera, WoBɛnyamin yi e Bahurim, a ra ziri vɔk e Yɔrdan tanga BeYuda, na a wɔ̀ man na Gbɔng Gwɔ̀m Davit o arɔng.

¹⁷A vɔk ɛ bemat gu rining yi e yerê Bɛnyamin. Ziba, mwât fwôm lɔ Saul arɔng a gwɛ̌ vey na nèy mɛ bewen kuru na nɛ netungun, tanga bemât fwom kuru baba, yɛn a tanga wul e Yɔrdan gyam gbɔng gwɔ̀m a pom.

¹⁸Yɛn a ye dɔ a rɔt, na be wɔ̀ vey na gbɔng gwɔ̀m tanga belɔ mɛ, na be to ra mwa pyɛ de ya rɔda jam a yɛ. Sede gbɔng gwɔ̀m a sé kyè wɔ̀ ye dɔ, Shimei Gera a gaba e cat bol mɛ,

¹⁹a hwo yang ɛ, “À darwey hom, hwo kwon vɔk me e yey wɛt, kɛ hwo bare na buru de me, sam mō, ma buru e tuk de hwo, à darwey hom, hwà kana tik Yɛrusalɛm. À darwey hom, pat pyɛ́ yane de ma ra mo yi e ji yey mō. Yē bam a yɛ̄.

²⁰Yaga ma tɔk, ma ga ra a hwo renɛn. Pyɛ ma yane de ya tɛ̀ ma sé wo mɛsɛng yi e yerê Yɔsɛf de ma vey man na hwo yunung, à darwey hom.”

²¹Abishai Zɛruya a pere wɔ ye, “A sé naka na be mɔrɔ Shimei, yaga a ga dusa yɛ womo de Dagwi Darwey a kasa na a sè gbɔng gwɔ̀m.”

²²Ko Davit a yang ɛ tanga gwà mɛ Yowap, “À yin nèy Zɛruya, e wa de a rangal hin bare min ɛ? Yaga sɛ́ de yin e ra repugu me yunung ɛ? E me wɛ a gbɔng gwɔ̀m BeIsrayɛl a remo, yaga ano, vit a WoIsrayɛl hwak de ba rɔda mɔrɔ yunung.”

²³Ko a hwo yâng Shimei, “Ma sé sira a hwo, ba rɔda mɔrɔ hwo wɛt.”

²⁴Mɛfibɔshɛt, hwêy hwêy Saul, a gyirik vey man na gbɔng gwɔ̀m arɔng. Yimo tuk de Davit a tele vey e tuk de a toyo tyang, Mɛfibɔshɛt a ga mara kus bol mɛ kɛ berugu mɛ wɛt, a ka yong negyɛk mɛ wɛt.

²⁵Jeng de a pom yi e Yɛrusalɛm na a vey man na gbɔng gwɔ̀m, ko gbɔng gwɔ̀m o a yang ɛ, “Yaga sɛ́ de hwà kyè tanga me wɛt, à Mɛfibɔshɛt ɛ?”

²⁶A toyo a yɛ, a ye, “À darwey hom gbɔng gwɔ̀m, sede remo de hwà tɔk ma sé guruk, ma yâng mwât fwom hom, a tɛ̀ a me ɛ nerwey e madung, na me kyè tanga hwo, ko yɛ a de ra a me nengyas.

²⁷A ga lashe reza hom na hwo, à darwey hom gbɔng gwɔ̀m. Ko hwo, à darwey, hwà sé cik sede tom-lagwi wo Dagwi. Yaga ano, ra pyɛ de hwà di ya sé tyɛng zɔng.

²⁸Mwa ano de mwa bemât cang lɔ da hom ba jam na hwo, à darwey hom, hwo wey na yɛn, ko hwà simo a me, me sè hwak e ji vemo de be re pyɛ́ e tebut mō. Vit a me à reto de mê to jama pyɛ cak yi na hwo, à darwey.”

²⁹Gbɔng gwɔ̀m a toyo a yɛ, a yang ɛ, “Há ha ga vey ano. Ma ga kana nɔng nu, hwo tanga Ziba yin a rɔda gas pyɛ̂ nedanelɔ Saul.”

³⁰Mɛfibɔshɛt a ye, “Bē tik a Ziba pyɛ́ mo, a vɔk mwa. Yey pyɛng hom yɛ̄ a, remo de hwo darwey hom gbɔng gwɔ̀m hwà ga vey e lɔ tyang.”

³¹Barzilai yi e Gileyat a vey arɔng yi e Rogelim, na a wɔ̀ kyɔk gbɔng gwɔ̀m e gurâ Yɔrdan.

³²Barzilai o a ga kana kwop kpushuk, a vɔk neshey kuru rwit. Yɛ mo a sè gbɔng darwey yaga á vɔk yas, ko á kana nɔngɔs gbɔng gwɔ̀m pyɛ̂ re jeng de á sè na sangal e Mahanayim.

³³Gbɔng gwɔ̀m o a yang ɛ, “Vey wot kyè na hwo wɔ̀ sangal tanga me e Yɛrusalɛm, ma rɔda vɔk o.”

³⁴Ko Barzilai a yang ɛ, “Bwang nepɔlɔ hom ala e jey, na me to sè o vɔk e Yɛrusalɛm, à darwey hom gbɔng gwɔ̀m ɛ?

³⁵Me de ma ga tɛ̀ neshey kuru rwit, vit me to me wok cwey pyɛ cak kɛ me to wok netâ pyɛ̂ re kɛ pyɛ̂ sɔ wɛt, me ka to wok netâ fwɔ̂ lwɛlɛ arɔng wɛt. Ma rɔda tɛ́ me a hwo pyɛ nedirik zɔng, a da hom gbɔng gwɔ̀m.

³⁶Ma ka vey na be tala me byɛ̂ pyɛ cak ano wɛt. Ma rɔda kyɔk o tyɔng wɔ̄ e gurâ Yɔrdan zɔng.

³⁷Tik me toyo vɔk e lɔ, na me wɔ̀ sangal na me ku e pomo hom bagat na sak da hom na neng hom. Ko di, sɔ hom Kimham à wane. A rɔda ra a hwo fwom. Vɔk ɛ e hwomo na hwo, a darwey, ra a yɛ pyɛ de hwà di ya jam a hwo.”

³⁸Gbɔng gwɔ̀m a yang ɛ, “Ey, ma rɔda jut ɛ na a sangal tanga me, ma rɔda ra a yɛ tyɛng pyɛ de hwó simo. Ko ma rɔda to ra a hwo kayɛ pyɛ de hwà rangal me arɔng.”

³⁹Ano kwong, Davit a kula Barzilai e gèy, ko a tɛ̀ a yɛ netyang. E bama mo, Davit tanga mwa bemat mɛ ba ye dɔ a Rɔt Yɔrdan, Barzilai kwong a toyo vɔk e lɔ mɛ.

⁴⁰Jeng de gbɔng gwɔ̀m a kyè vɔk e Gilgal, Kimham a kyè tanga yɛ. Ko mwa bemât comô Yuda tanga rebît bemât comô Israyɛl ba wɔ̄ kyɔk ɛ.

⁴¹BeIsrayɛl mwa ba wɔ́ na gbɔng gwɔ̀m, ba yang ɛ, “Neken mō ne ros! Yaga sɛ́ de begwa mot BeYuda ba shigi hɛn na be vey jut o, be kyɔk o na belɔ mō tanga bemat mō, ba ye mɛ dɔ e Yɔrdan ɛ?”

⁴²BeYuda mwa ba toyo a yɛn na ha, ba ye, “Yaga yɛ a sé cang mot. Yaga sɛ́ de yin a tɛ̀ shom ano ɛ? Yin a kyɛ́, yin wok, gbɔng gwɔ̀m a nɔng ot pyɛ̂ re kɛ pyɛ cak arɛt?”

⁴³Ko BeIsrayɛl ba ye, “Wot a vɔk ɛ numo mot zang kuru e ji Gbɔng Gwɔ̀m Davit wot dal in mɛ, mwa ano de a sé cang min. Sɛ́ ya tɛ̀, yin a dura a wot byɛs ɛ? Yin kwon ye bam wɛt, e wot vɛ de wot a tanga pɛrɛ hâ toyo na gbɔng gwɔ̀m o vey e lɔ.” Ko BeYuda ba dal na paà shom e ra BeIsrayɛl.