Read berom 2 Samwɛl 2 Bible Online

2 Samwɛl 2 - berom bible

2 Samwɛl 2

¹E bamâ pyɛ́ yane, Davit a rangâl Dagwi Darwey, a ye, “Mê kyè na me wɔ̀ re negwɔm e ji repomo rehak re yerê Yuda a?” Dagwi Darwey a toyo a yɛ, a ye, “Ey, ci.” A to ye, “E rɛ e ji mo ɛ?” Dagwi Darwey a yang ɛ, “Ci wɔ e repomô Hɛbrɔn.”

²Ano kwong, a sogo vɔk e Hɛbrɔn, a vɔk ɛ beha mɛ beba, vɛ à Ahinowam de a sé yi e Yɛzrɛɛl tanga Abigɛl, hwâ kwɔ̌ Nabal wɔgɔ, Tɔ́n yi e Karmɛl.

³Davit a to jut bemat de ba sé tanga yɛ, na belɔ mɛn, ko ba wɔ̀ sangal e Hɛbrɔn tanga bapomo de ba gwɔrɔ hɛ.

⁴Ano kwong bemât yerê Yuda ba vey e Hɛbrɔn, ba shushu hɛ na něy na a tɛ́ ɛ gbɔng gwɔ̀m mɛn. Jeng de ba ha a Davit wɔgɔ, e bemât Yabɛsh Gileyat de ba lɛrɛ revîn Saul,

⁵a vɛ̌ tomo betom wɔ̀ ha a yɛn, a ye, “Dagwi Darwey a tɛ̀ nerat e ra yin, yaga pyɛ ryat de yin a ga dura vɔk na darwey min Saul de yin a lɛrɛ revin mɛ.

⁶A remo, tik na Dagwi Darwey a ra a yin pyɛ́ ryat, na a dura a yin yɛ̀ e tɔk sege hɛ wɛt. Ko me arɔng, ma rɔda dura a yin nerat yaga pyɛ de yin a ga ra.

⁷Ano kwong, vɔk in yey ting, na yin ra neras! Gbɔng o min Saul a ga ku, ko BeYuda ba ga shushu me na něy na me tɛ́ me gbɔng gwɔ̀m mɛn.”

⁸A vane ano, Abnɛr Nɛr, gwɔ̀m comô Saul, a ga kana jut Ishbɔshɛt, hwêy Saul, a ye mɛ dɔ à Rɔt Yɔrdan vɔk e Mahanayim.

⁹Ko a wɔ̀ tɛ̀ ɛ gbɔng gwɔ̀m e ra Israyɛl, na a re negwɔm e bavwêl Gileyat, na Ashɛr, na Yɛzrɛɛl, na Ɛfrayim, tanga Bɛnyamin.

¹⁰Ishbɔshɛt Saul á vɔk neshey kuru banaas jeng de a tɛ́ ɛ gbɔng gwɔ̀m Israyɛl, ko á re nɛ̀ neshey neba. Ko yerê Yuda ya raa Davit,

¹¹ko á re negwɔm mɛn e Hɛbrɔn neshey netaama na pɛl tyiimin.

¹²Abnɛr tanga bemât comô Ishbɔshɛt ba tik Mahanayim, ko ba kyè vɔk e Gibɛyɔn.

¹³Yowap, de neng mɛ a Zɛruya, tanga bemât comô Davit ba nusu arɔng, ba wɔ̀ man na yɛn e kadûng Gibɛyɔn. Regyɛng o remo ra sangal e gurâ kadung o gwomo, ko regyɛng o rere e gura mo gworo.

¹⁴Abnɛr a hwo yâng Yowap, “Tik na bewen behak be sogo be mara tô como pyɛ mɛn e bayis mot.” Yowap kwong a ye, “Ey, tík ɛn be sogo be mara.”

¹⁵Yɛn a hwo sogo, ba basa nepyak mɛn, bemat kuru na vɛ beba vê Bɛnyamin e ra tô Ishbɔshɛt, ko bemat kuru na vɛ beba e ra tô Davit arɔng.

¹⁶Ano kwong, kawɛ a vo mumwɛ e rato, a luga hɛ e kuhagat na wal, ko mwa hɛn ba gabsa, ba kushu. Yaga ano, ba vo a kwɔn hane mo de ha sé bagat na Gibɛyɔn rezâ Helkat-Hazurim wɔgɔ, Cwɛl Bewal.

¹⁷E bama mo, ba hwo como pep zâ wɛt, ko bemât comô Davit ba re Abnɛr na bemât comô Israyɛl.

¹⁸Nèy Zɛruya nane netat, Yowap na Abishai tanga Asahɛl na sè e hwomo. Ko di, Asahɛl á sè mwât setele e bol hyiw sede ros.

¹⁹Asahɛl o a hwo ro Abnɛr, a raa hɛ makmak, a tɔk doyo, vɔk e vwɔ yege kɛ vwɔ mwɛlɛng wɛt.

²⁰Abnɛr a doyo, a di bama mɛ, ko a ye, “E hwo à womo à Asahɛl a?” Asahɛl a ye, “E me à wɛ”.

²¹Abnɛr a yang ɛ, “Doyo e bak hwak, mɔrɔ hwak e ji bemât como na hwo sey ɛ pyɛ́ mɛ.” Ko Asahɛl a kyɛ́ ɛ, a re nuyel na ro mɛ.

²²Abnɛr a to yang ɛ, “Tō o, hwo ro me wɛt! Yaga sɛ́ de hwó simo me mɔrɔ hwo ɛ? Sede ma mɔrɔ hwo, e rɛ̌ de mê man bayis na gwa mo Yowap ɛ?”

²³Ko Asahɛl a kyɛ́ ɛ nà tik ro mɛ. Yaga ano, Abnɛr a doyo bara, a luga hɛ mɛ e bama e jim pòrot, ko wa pere wɔ̀ nusu e ma. A vɛ̌ gaba e dem o, a ku. Mwa bemat de ba raa hɛ, jeng de ba pom e dem de revîn Asahɛl ra dyɛng ɛ, ba ka tumal e kwɔn o.

²⁴Ko Yowap tanga Abishai ba hwo rô Abnɛr. Jeng de gwi gwa sé gaba, ba wɔ̀ wul bak rahwôl Ama, de wa sé e rwa rak Giya, e gwông hekpâng Gibɛyɔn.

²⁵E hwomo, bemât yerê Bɛnyamin ba vey tula hɛn na Abnɛr, ba tɛ́ ɛn regyɛng rining e ra tɛ̂t rahwol.

²⁶Abnɛr a hwo yila Yowap a ye, “Bê re nuyel na yol o gbak-gbak arɛt? Hwà tɔk, yɛnɛ mo hê ba reneng wɛt a? Vɔk e yɛ̌ jeng de hwô nɔ̂ng bemat mō nu na be tik rô begwa mɛn ɛ?”

²⁷Yowap a toyo a yɛ, a ye, “Ma sira me na Dagwi, ka hwà hanat wɛt, ka bemat o ba yâng re nuyel na rô begwa mɛn o sɛ̌ gasi ha ye gbey.”

²⁸Ano kwong, Yowap a hwo pɛl durum, ko bemat o ba vɛ̌ tumal, ba to re nuyel na rô BeIsrayɛl wɛt, ba vɔk ba tɛ̀ kwɔ̂k tô como mo.

²⁹Abnɛr na bemat mɛ be re nuyel na kwɛngɛl mwa turuk hane e ji nɛk Rɔt Yɔrdan, ba ye dɔ a hɛ, yɛn a re nuyel na kwɛngɛl o het à gasi, ko ba pere wɔ̀ wul Mahanayim.

³⁰Bama de Yowap a tik rô Abnɛr, a tula bemât como mɛ mwa, ko a di vit à bemat kuru na vɛ shabetat e ji bemât Davit sana tɛ̀ Asahɛl e ji vɛ.

³¹Bemât comô Davit o ba ga mɔbɔs bemât comô yerê Bɛnyamin naga betat na vɛ kuru batyiimin (360) de bá sè na Abnɛr.

³²Yowap na bemat mɛ ba jut revîn Asahɛl, ba lɛrɛ rɛ e ji sak da mɛ, de ba sé e Bet-Lɛhɛm. E bama mo, yɛn a re nuyel na kwɛngɛl e ji turuk hane, ko ba wɔ̀ wul Hɛbrɔn gasi he sè tē gbey.