Read berom 2 Samwɛl 20 Bible Online

2 Samwɛl 20 - berom bible

2 Samwɛl 20

¹Mwat vwes hwak a sè e Gilgal de ba tang ɛ à Sheba Bikri wo yerê Bɛnyamin. A pɛl durum, a ye, “Vit a wot na nû pyɛ cak na Davit, hwêy Yɛsɛ. À BeIsrayɛl, tik na kawɛ mwat a kyè vɔk e buk mɛ!”

²Mwa BeIsrayɛl ba gasang hɛn yi na Davit, ba raa Sheba Bikri. Ko BeYuda ba bana hɛn na Davit, ba raa hɛ yi e Yɔrdan vɔk e Yɛrusalɛm.

³Jeng de Davit a pom e lɔ mɛ e Yɛrusalɛm, a yong a bejɛn mɛ vane kuru de a kana tik ɛn na be bɛrɛng lɔ mo kwɔn hak, ko ba gyenges hɛn. A tɛ̀ be nɔngɔs hɛn kayɛ pyɛ mɛn, ko a dyɛngɛs na yɛn wɛt. Ba sangal e hwomo jaram vɔk e yɛnɛ̂ neken mɛn sede bekuma.

⁴E bama mo, Gbɔng Gwɔ̀m Davit a yâng Amasa, a rini BeYuda be vey tula hɛn na yɛ tuk hê tat, ko tik na Amasa pyɛ mɛ a ba vey arɔng.

⁵Amasa a kyè a wɔ̀ yishi BeYuda, ko a de rɛnɛ nà vey e jeng de gbɔng gwɔ̀m a ha a yɛ.

⁶Ko gbɔng gwɔ̀m a yâng Abishai, “Sheba Bikri a rɔda gwɛ̌ a wot negbang de na dal ne Absalɔm. Jut bemât como hom na hwo raa bol mɛ, gyam na a wɔ̀ wul bapomo de ba gwɔrɔ na jwâ-pomo, na a wɔ̀ dal.”

⁷Ano kwong, bemât Yowap, na bemât gyeng gbɔng gwɔ̀m tanga mwa besugâ como ba nusu yi e Yɛrusalɛm na mwât nuyel mɛn Abishai, ba raa bol Sheba Bikri.

⁸Jeng de yɛn a wɔ̀ wul gwofwa e Gibɛyɔn, Amasa a vey man na yɛn. Yowap a ga kana tɛ̀ yɔ̀m como mɛ, a ga rɔgɔs torô como na wal e ji fwal wɛ. Jeng de a sé kyè vey man na yɛ, ko wal o wa hywit ɛ wa vɛ̌ gaba.

⁹Yowap a yâng Amasa, “Ala à gwà hom ɛ, hwà sé tyang a?” A pere kaba negyɛk Amasa na vwɔ yege mɛ, na a man rwanâng yê show na yɛ.

¹⁰Ko Amasa a ka bɛrɛng naka wɛt kɛ Yowap a vɔk wal e vwɔ mwɛlɛng mɛ. Yowap a vɛ̌ luga hɛ na wɛ e jim, ko balagêy Amasa ba pere nusu e vwel. Yowap a to gwɛ̌ luga wɛt, yaga a ga ku. E bama mo, Yowap tanga gwà mɛ Abishai ba re nuyel na raà bol Sheba Bikri.

¹¹Revîn Amasa ra sé e dyɛngɛ e tê gwong, nemi na kyiri rɛ. Ko gwining e ji bewen Yowap a tumal bagat na revin o, a hwo gbɔ, a ye, “Mwa mwat de e simo Yowap na mwa mwat de e dyɛng mā e Davit, a vey raa Yowap!” Sede a di bemat ba pom ba tumsal ɛ, ko a vɛ̌ hwɔlɔ rɛ́ yi e gwong vɔk e regyeng, a bang rɛ na gworugu.

¹³E bama de ba ga jut revin o yi e kparâng gwong, kawɛ mwat a vɛ̌ raa Yowap wɔ̀ raa bol Sheba Bikri.

¹⁴Sheba a kana raa e ji mwa bavwêl yére Israyɛl, a pere wɔ̀ wul Abel-Bet-Maaka. Ko mwa cáng Bikri ya tula hɛn, ba vɛ̌ be dopɛ e yɛ vɔk e ji repomo mo.

¹⁵Bemât Yowap ba wok, Sheba a sé e hwomo, ko yɛn a wɔ̀ gwɔrɔ repomo mo. Yɛn a tula bagwɔt nefongol e bamâ jwâ-pomo mo tyɛng wɔ̀ sɛ̀ rak o. Jeng de ba sè tow o na be gangas wɛ,

¹⁶hwâ netsitsɛng hwak a yila yi e ji repomo mo a ye, “Wok in! Wok in! Yang in Yowap, a vey na me e ngamo, me simo me ha na yɛ.”

¹⁷Yowap a wɔ́, hwā mo a hwo rangal hɛ a ye, “E hwo wɛ a Yowap a?” Yowap a yang ɛ, “Ey, e me wɛ.” Hwā mo a yang ɛ, “À darwey, wet betong na me.” Yowap a yang ɛ, “Ma sé wokos hwo.”

¹⁸Hwā mo a ye, “Ba kana tē a raane wɔgɔ, ‘Jama hin vô redu e Abel’, ko ha hê tala hɛ.

¹⁹Repomo mot ra sé e ji bapomo de ba dal na sangal netyang e ji Israyɛl, bemat mot be wuna hɛn na gbɔng gwɔ̀m na yey rining. Yaga sɛ́ de hwó simo na hwo wey na rɛ ɛ? Hwó simo na hwo gang pyɛ de ya sé ye Dagwi Darwey arɛt?”

²⁰Yowap a toyo mɛ, a ye, “Dagwi a ro mɛ! Ma rɔda lashe kɛ wey na repomo min o wɛt!

²¹Ma yong ɛ ano wɛt, ko ma sé jama Sheba Bikri wo vwêl berakû Ɛfrayim zɔng. E yɛ de a vey na sogô nehywɛ e ra Gbɔng Gwɔ̀m Davit. Nɔng in me hɛ, me kwong ma rɔda tik repomo mo.” Hwā mo a yâng Yowap, “Wot a rɔda bomo a hwo to mɛ yi e ra jwâ-pomo.”

²²Hwā mo a kyè na netsitsɛng vɔk na bemât repomo mo. Yɛn kwong ba tùt ratô Sheba Bikri, ba bomo a Yowap rɛ. Ko Yowap a pɛl durum, yaga na bemat mɛ be tik repomo mo. Ba sogo, kawɛ a kyè vɔk e lɔ mɛ. Yowap kwong a toyo vɔk na Gbɔng Gwɔ̀m Davit e Yɛrusalɛm.

²³Yowap a sè wo nuyêl bemât comô Israyɛl mwa. Bɛnaya Yɛhɔyada yɛ wɛ à wo nuyêl bemât gyeng gbɔng gwɔ̀m.

²⁴Adoniram yɛ wɛ a wo nuyêl bemât râ fwôm retek. Yɛhɔshafat Ahilut yɛ a gbɔng mwât jɛ̂k neha.

²⁵Sheva yɛ a mwât jɛ̂k gbɔng gwɔ̀m. Zadɔk tanga Abiyatar yɛn a bepiris,

²⁶ko Ira yi e Yayir yɛ wɛ a piris Davit.