Read berom 2 Samwɛl 21 Bible Online

2 Samwɛl 21 - berom bible

2 Samwɛl 21

¹Jeng de Davit a sé re negwɔm, vyong ya re bemat neshey netat burang. Davit a hwo rangal Dagwi Darwey, na a tɔk pyɛ de ya tɛ̀ vyong o. Dagwi Darwey a toyo a yɛ, a yang ɛ, “Nemi BeGibɛyɔn na sé e ra Saul tanga lɔ mɛ, yaga a kana mɔbɔs hɛn.”

²Ano kwong, Davit a yila BeGibɛyɔn na a ha na yɛn. Ko di, BeGibɛyɔn ba sé BeIsrayɛl wɛt. Yɛn a sé bwang BeAmɔr de gwa tɛt ɛ, gwomo de BeIsrayɛl ba sira a gwɛ, ba rɔda mɔbɔs hɛn wɛt. Ko yaga remo de Saul a vɔk yey hwɔshɔ yaga BeIsrayɛl tanga BeYuda, a jama na a wey na yɛn mwa.

³Davit kwong a yang ɛn, “E sɛ́ de ma rɔda ra a yin, na me tala mɛ banɛn vemo, na yin tɛ̀ a bemat Dagwi Darwey nerat ɛ?”

⁴Yɛn a yang ɛ, “Hâ dyam shinang kɛ dyam pyɛng ha sé e tē mot na Saul na belɔ mɛ wɛt. Wot e simo na be mɔrɔ mwat hwak e ji bwang BeIsrayɛl arɔng wɛt.” Davit a rangal hɛn a ye, “Ko sɛ̌ e sɛ́ de yin e simo na me ra a yin ɛ?”

⁵Yɛn a yang ɛ, “Saul a simo a wey na wot, a simo a ba di gwining mot e sangal e ji BeIsrayɛl wɛt.

⁶Yaga ano, hwo nɔng ot nèy mɛ beras betaama, na wot mɔrɔ hɛn e nuyel Dagwi Darwey e Gibeya, repomô Saul, womo de Dagwi Darwey à kasa.” Davit a yang ɛn, “Ma rɔda nɔng in hɛn.”

⁷A hwo pat Mɛfibɔshɛt Yɔnatan Saul, a tik ɛ jaram yaga sira de há sè e tē mɛ na Yɔnatan Saul o.

⁸Ko a tɛ̀ be vo a yɛ Armoni tanga Mɛfibɔshɛt, nèy Saul de Rispa hwông Aya a tɔ̀ a yɛ, tanga nèy bewen netungun ne Adriyɛl Barzilai wo Mɛhɔla nemo de hwā mɛ Merap hwông Saul a tɔ̀ a yɛ.

⁹Davit a nɔ̂ng BeGibɛyɔn hɛn. Yɛn a mɔrɔ hɛn e ra raku e nuyel Dagwi Darwey. Ko ba wey na bemat vane betaama e jeng jining. Jeng yane ya sè mɛsɛng bwâl baale.

¹⁰Rispa, jɛn Saul, a jut gworugû sesin, a lasha gwɛ e ra gbondong hwak, a sangal ɛ e kwɔ̂n bavin o yi e jeng bwal o vɔk e jeng de rwak wa rop e ra bavin o. A tɔk tik benon be gyirik e ra bavin o nagwi wɛt, ko naturuk a ró ngyāma.

¹¹Jeng de ba ha a Davit pyɛ de Rispa a ra,

¹²a vɛ̌ wɔ̀ hashe bekup Saul tanga ve sɔ mɛ Yɔnatan yi e kwɔ̂n BeYabɛsh e Gileyat. Yɛn a ga kana jut vɛ yaang yi e majey-jɔgɔ̂ Bet-Shan e kwɔn de BeFilisti bá lɔ̌ bemat vane tuk de ba re Saul e como e rakû Gilbowa.

¹³Davit a hashe bekup Saul na ve Yɔnatan, ba tula vɛ tanga bwang bemat de ba mɔbɔs hɛn e hwomo arɔng.

¹⁴Ba lɛrɛ vɛ tanga bekup Saul na Yɔnatan e sak Kish dâ Saul, e Zela e ji vwêl yerê Bɛnyamin. Ba ra kayɛ pyɛ de gbɔng gwɔ̀m a nɔng nu. E bamâ hane, Dagwi a wok wôn bemat mɛ e ra vwel o.

¹⁵Como ya to hwo e tê BeFilisti na BeIsrayɛl. Davit tanga bemât como mɛ ba wɔ̂ tô como mo. Yɛ kwong a vɛ̌ ruru vit.

¹⁶Gwohwɔ̀k GwoFilisti mo gwohwak gwa sè de ba tâng gwɛ a Yishbi-Bɛnɔp. Nedirîk celes bara mɛ de ba yong na dyam pama na wul sede kilo betat na rebit o, a to gana wal pwas o. E di mɛ, a rɔda mɔrɔ Davit.

¹⁷Ko Abishai Zɛruya a vɛ̌ ba sɛlɛ Davit. A hwo e ra gwohwɔ̀k GwoFilisti mo, a vɛ̌ mɔrɔ gwɛ. E bamâ hane, bemât Davit ba hwo tɛ̀ ɛ, a sira a yɛn, a rɔda to ba raa hɛn vɔk e de tô como wɛt. Yɛn a yang ɛ, “Di, BeIsrayɛl ba tɛ̀ bayis e ra hwo, wot e simo na wot bidɛ hwō wɛt.”

¹⁸Bamâ hane, como cak ya to hwo e tē mɛn na BeFilisti e Gop, ko wo Husha hwak de reza mɛ a Sibɛkai a vɛ̌ mɔrɔ gwohwɔ̀k mɛn o gwohwak de ba tâng gwɛ à Saf.

¹⁹Ba to tó como mo cak e Gop o gbak, ko Ɛlkanan Yayir wo Bet-Lɛhɛm a mɔrɔ Gɔliyat wo Gat, womo de shɛ bare mɛ na sé sede hwêy rúm.

²⁰Ba to tó como mo cak e Gat. E hwomo ba man na gwohwɔ̀k gwohwak de gwa dal na nerey, gwa vɔk beken vɔ tyiimin e kagwɛ vwɔ na beken bol tyiimin e kagwɛ bwol arɔng, mwa nèy vɔ mɛ tanga nèy bol na sé kuru baba na nɛ nenaas.

²¹Jeng de a dura a BeIsrayɛl byɛs, Yɔnatan hwêy Shimei, gwa Davit a vɛ̌ hwo e ra yɛ, a pere mɔrɔ hɛ.

²²Bèhwɔk vemo benaas ba sé yi e yerê Rafa e Gat, ko Davit na bemat mɛ ba mɔbɔs hɛn.