Read berom 2 Samwɛl 22 Bible Online

2 Samwɛl 22 - berom bible

2 Samwɛl 22

¹Sede Dagwi Darwey a sey Davit yi e vwɔ̂ Saul tanga bemat repugu mɛ. Davit a ra a Dagwi Darwey lwɛlɛ gwomo ngan:

²Hwà sé fwarâ dal hom, kwɔ̂n dál hom, mwât sey me.

³Dagwi hom de hwo gyenges me, hwà sé ruga hom, mwat dul hom, negâk neken hom.

⁴Jeng de me yila hwo yaga sɛlɛ, hwó sey me yi e vwɔ̂ vê repugu hom. Be somo Dagwi Darwey!

⁵Ngyâng reku ya ga vo me gak, gawey, sede rwîk nshi, ha jut me.

⁶Ngyâng reku ya ga rɔgɔs me, sak ba tɛ̀ a me segun.

⁷E ji reyɔm hom, ma yila Dagwi Darwey. Ma tosho a Dagwi hom yaga sɛlɛ. A wok me e ji lɔ̂ re a yɛ fongol, fwɔ̂ sesin hom gwa gaba e betong mɛ.

⁸Vwel ha hwo digis ding-ding, batîs beraku ba rɛ̌, ba digis yaga shôm Dagwi ya sogo.

⁹Kyeng ha tugus yi e nenu wol mɛ, nebelem kya na tē bwerep yi e nu mɛ, cilâ kya ya tē kák.

¹⁰A wunta lagwi, ko a gyirik e jey na rele de ra siri e nɛ̂n bol mɛ.

¹¹A laga pyɛ cen, ko a sogo e gwi, a sé turus, e rini e ra gul.

¹²A kyiri rato mɛ na lwil, bale basit de ba sila na rwak ba rɔnɔ hɛ.

¹³Yi na nedyɛt de na sé e nuyel mɛ, fwala tanga cíla kya ba tabas e ji bale mo.

¹⁴Ko Dagwi Darwey a lumta yi e lagwi, ba wok fwɔ̂ Womo De A Dal Na Reto Mwa.

¹⁵A tabas ket mɛ, ko a shara vê repugu, a ró ɛn na nebwerep gbara, ba pere tele.

¹⁶Retîs gworep ra nusu wɛshɛrɛk, retîs vwel ra ta e jey, jeng de hwo Dagwi Darwey hwà shìra vê repugu mō, jeng de shom mō ya ye puu.

¹⁷Yi e hwomo e lagwi a nára vwɔ mɛ, a kaba me, a pat me yi e ji nshî ciwil.

¹⁸A sey me yi e vwɔ̂ bemât repugu hom vê gap, yi e vwɔ̂ vemo de ba kyɛ́ ɛn me, de ba dal me na gap.

¹⁹Jeng de ma sé re reyɔm, ba hwo e ra me, ko Dagwi Darwey a dul me.

²⁰A pat me, a hala mɛ washak, a sey me, yaga a pɛngɛ yey na me.

²¹Dagwi Darwey a tala me pyɔlɔ, yaga me ra pyɛ́ de ya sé a yɛ cik. A tala me na nerat, yaga a sɛ̀ me na renɛn wɛt.

²²Ma ga gyeng badu Dagwi Darwey, Ma ga doyo a Dagwi bama, na me ra pyɛ́ vyes wɛt.

²³Ma ga gyeng mwa pyɛ́ de a nɔng nu e ra yɛ, ma ga kyɛ́ me nà gyeng badu mɛ wɛt.

²⁴Ma ra tyɛng pyɛ́ de yɛ e simo na me, ma gyeng tó hom yi e râ pyɛ́ vyes.

²⁵A tala me na nerat, yaga me ra pyɛ́ de ya sé a yɛ cik, yaga a tɔk ma sila gyat.

²⁶À Dagwi Darwey, hwà ye waa a vemo wɛt de ba ye waa a hwo arɔng wɛt. Hwà sé wo nerat na vemo de ba sila gyat.

²⁷Na vemo de ba vɔk nenu neba wɛt, ma vɔk nenu neba arɔng wɛt, ko na vemo de ba sé gang-gang, mê sè kang-gang na yɛn arɔng.

²⁸Hwó sey vemo de ba jut ɛn e nû pyɛ cak wɛt, ko hwó ra jɔgɔ na vemo de be dak kaa wɛt.

²⁹Hwó nɔngɔs me negbey, à Dagwi Darwey, hwó ró a me lwil, à Dagwi hom.

³⁰Hwó nɔngɔs me gap na me hwo e ra vê repugu hom, na reto mō mê tɔk ye lyál e ra jwâ-pomo.

³¹Dagwi womo mo, tomong mɛ ba sé gyat, reha mɛ ra sé tsak o, vit à tô yey. Yɛ a sé sede ruga na mwa vemo de be jama a dul ɛn.

³²Dagwi nju mɛ zɔng, yɛ wɛ à Dagwi Darwey, e yɛ wɛ zɔng de a sé fwarâ dal mot.

³³E yɛ wɛ à Dagwi de e nɔngɔs me gap, e yongos gwong de mê kyè ɛ tyang.

³⁴A yong bol hom sede ve ròs, e gyeng netyang hom e ra beraku.

³⁵E masa a me begwông tô como, na me tɔk ye net a gbang de wa vɔk gap ding-ding.

³⁶A Dagwi Darwey, hwó dul me, hwó sey me, hwó vɔk me na vwɔ yege mō, hwó sey yila hom yaga sɛlɛ, hwà tɛ̀ me ma vɔk gap.

³⁷Hwó yong begwong hom gyat, mê tíi bol wɛt.

³⁸Ma ro bemât repugu hom, ma vos ɛn, ma toyo rè bama wɛt, sɛ̌ ma wey na yɛn hywiri.

³⁹Ma dak ɛn, ma pere tɛ̀ ɛn laashash e vwel, ba to tɔ̀k sogo wɛt, ba dyɛng laashash e nɛ̂n bol hom.

⁴⁰Hwà nɔng me gap tô como, hwà nɔng vê repugu hom e vwɔ hom.

⁴¹Hwá tɛ̀ bemât repugu hom be tele yi e nuyel hom, ma vey na vemo de ba kyɛ́ ɛn me.

⁴²Ba tosho yaga sɛlɛ, ko vit à mwat de a sey ɛn, ba yila hwo Dagwi Darwey, ko hwà hanat a yɛn wɛt.

⁴³Ma bunut hɛn, ba tɛ́ ɛn sede fongol de gul gwo pɛsɛl, ma bɔrɔs hɛn sede bwɔrɔ̂k hyok.

⁴⁴Hwà ga sey me yi e vwɔ̂ bemat de be hwosom me, hwà ga tɛ̀, me re negwɔm e ra yére bemât jey, ba ga tɛ́ ɛn bemat hom, mwa ano de ma kana tɔk ɛn wɛt.

⁴⁵Yére dyuk ye vow, ye tē a me guduruk, be dyɛng bato mɛn, ko be raa neha hom.

⁴⁶Ba ga tɛ́ ɛn tófey, be nunus yi e nekwɔn dal mɛn na vôw rebek.

⁴⁷Dagwi Darwey a sé kwen! Me somo hɛ, yɛ womo de a sé fwarâ dal hom! Dagwi, mwât sey me, mê nɔng ɛ nerey!

⁴⁸Yɛ wɛ de a hywit me yi e vwɔ̂ bemât repugu hom, a tɛ̀ yére bemat jey e nɛn hom,

⁴⁹Ko a sey me yi na vê repugu hom. À Dagwi Darwey, hwà nɔng me reto e ra bemat de be kyɛ́ ɛn me, hwà sey me yi e vwɔ̂ bemât sogô nehywɛ.

⁵⁰Yaga ano de mê nɔng o nerey e ji yére bemât jey, mê ra a hwo lwɛlɛ, na me somo hwo.

⁵¹Hwà tɛ̀, gbɔng gwɔ̀m mō a di gbɔng wɛng, hwà tɛ̀ yey na womo de hwà kasa kayɛ jeng, me Davit tanga yére hom wɔ̀ sɛ̀ mɛ nezamang.