Read berom 2 Samwɛl 23 Bible Online

2 Samwɛl 23 - berom bible

2 Samwɛl 23

¹Wok in neha Davit, me hwêy Yɛsɛ: Dagwi a ga tɛ̀ me wo nerey, Dagwi wo Yakɔp a ga kasa me, a tɛ̀ a me negwɔm, a to tɛ̀ me wo yis na lɛlɛ̂ somo yaga Israyɛl.

²Gabik Dagwi Darwey he ha yi na me, há mɛ ha sé e nu hom.

³Dagwi BeIsrayɛl a ga hanat, Wo Gyengês BeIsrayɛl, a ha e ra me, “Gbɔng gwɔ̀m de a sé re negwɔm na tsak o, de e wet betong na hâ Dagwi,

⁴yɛ a sé sede gwi de gwo ta e zang-gwi gasi, jey ya nusu wɛshɛrɛk vit a bale, gwi de gwo tɛ̀ sɔng gwo nɛp e bama de rwak wa ga ye wang.”

⁵Mwin, lɔ hom ha rɔda sangal gak na Dagwi, yaga a ga wuna sira na me gbak-gbak, wunâ sira de ba rɔda gas hɛ wɛt, sira de ba rɔda sege hɛ wɛt. Me gyeng ɛ, a rɔda sɛlɛ me, kayɛ pyɛ de ma wok cwey o, a rɔda nɔng me.

⁶Ko bemat beves ba sé sede rɔgɔ de be bomos e jey, vit a mwat de e tɔk ra hɛ na vɔ sǎn,

⁷be ra hɛ na pyɛ dyam kɛ shɛ bara, kya ha rɔda re hɛ e kwɔn o.

⁸Bazâ besugâ Davit a vemo ngan: Yɔshɛp-Bashɛbɛt yi e Takemon, yɛ à sè wo nuyêl besuga berey o betat. E yɛ de a tó como na bara mɛ, a mɔbɔs bemat naga rwit (800) e como jining.

⁹Wo neba mo de a raa hɛ à Ɛlazar Dodo yi e Ahowa. Tuhak, yɛ tanga Davit yɛn a woros regyɛng BeFilisti de ra tula hɛ, na re tó como na BeIsrayɛl. BeIsrayɛl ba sek wɔ e bama,

¹⁰ko yɛ kwong a toro dìng na a tó como na BeFilisti mo, sɛ̌ vwɔ mɛ gwa ye jwɛɛnɛn, marak a vo a yɛ vwɔ, a tɔk viri gwɛ yi e wal mɛ wɛt. Dagwi Darwey a nɔng ɛn gbɔng wɛng tuk hane mo. BeIsrayɛl ba toyo hɛn vɔk na Ɛlazar, na be wɔ̀ hashe pyɛ́ comô vane de ba mɔbɔs.

¹¹Wo netat e ji besuga betat o yɛ a Shama Age yi e Harar. BeFilisti ba tula hɛn e Lehi, e kwɔn de cap shila ya sé ɛ. BeIsrayɛl ba tele yi e nuyel mɛn,

¹²ko Shama a tumal e tê cap o, na a bin dul yɛ, a mɔbɔs BeFilisti. Dagwi Darwey a nɔng ɛn gbɔng wɛng tuk hane mo.

¹³Tuhak, lɛs na jeng bwal, bemat betat e ji besuga kuru batat ba gyirik vɔk e fwarâ Adulam wɔ na Davit. A sè e jeng de regyɛng BeFilisti ba tɛ̀ dura e nɛk Rɛfayim.

¹⁴E jeng yane Davit a sè e kwɔ̂n dal, ko BeFilisti behak ba sè e Bet-Lɛhɛm.

¹⁵Davit a hwo wok cwey lɔ, ko a ye, “Wa a rɔda wɔ̀ sɛ̀ a me nshî sɔ yi e hwes bagat na rwi repomô Bet-Lɛhɛm ɛ?”

¹⁶Bekaan como vane mo betat ba ta e tê bǔk comô BeFilisti, ba wɔ̀ vo nshi e hwes o, ba vey nɔ̂ng Davit. Ko a kyɛm a sɔ nɛ wɛt, a ye, “Dagwi Darwey a ró mɛ̀, ma rɔda sɔ nshi nemo de bemat ba ye waa à neken mɛn wɛt!” Yaga ano, a sɔ nɛ wɛt, ko a shusha nɛ e vwel, nɔrɔ̂ pyɛ̂ sɔ vɔk na Dagwi Darwey. Gbɔng pyɛ́ de besuga betat vane ba ra à yane.

¹⁸Abishai, gwà Yowap de neng mɛn à Zɛruya, a sè mwât nuyêl besugâ como vane kuru batat. A jut bara mɛ, a mɔbɔs mɛ bemat repugu mɛ naga betat (300). Yi ano de a sɛ̀ a tó mɛ za e ji bemat kuru batat o.

¹⁹Yɛ a dal bemat vane kuru batat na za, yaga ano, de a tɛ́ ɛ wo nuyel mɛn, ko a de wul berey o vere betat wɛt.

²⁰Bɛnaya Yɛhɔyada yi e Kapsɛyɛl a sè kaan como arɔng, a ra pyɛ́ pyak na yey ting. A mɔbɔs bekaan besugâ comô BeMowap beba. Tuhak de nemuk fwala na rop sede wút, a wɔ̀ yel e ji vɔng fwara, a vɛ̌ mɔrɔ gukum e hwomo.

²¹A to mɔrɔ WoMisra hwak de a sé hwɔk, womo de a vɔk bara, yɛ pyɛ mɛ a vɔk gwele zɔng, ko a wɔ̀ hwo e ra yɛ, a kabra bara mɛ mo, ko a mɔrɔ hɛ na wɛ.

²²Pyɛ́ de Bɛnaya a ra à yane, ko a sɛ̀ mɛ za e ji besuga vane kuru batat.

²³A dal vane kuru batat, ko a de wul berey o vere wɛt. Davit kwong a tɛ̀ ɛ a sè wo nuyêl bemât gyeng mɛ.

²⁴Behak e ji besuga kuru batat o vɛ à: Asahɛl gwà Yowap Elhanan Dodo yi e Bet-Lɛhɛm

²⁵Shama tanga Ɛlika yi e Harot

²⁶Heles yi e Pɛlɛt Ira Ikɛsh yi e Tekowa

²⁷Abiyɛzɛr yi e Anatot Mɛbunai yi e Husha

²⁸Zalmɔn yi e Ahowa Maharai yi e Netofa

²⁹Hɛlɛp Baana yi e Netofa Itayi Ribai yi e Gibeya e vwêl yerê Bɛnyamin

³⁰Bɛnaya yi e Piratɔn Hidai yi e benɛk bagat na Gaash

³¹Abi-Albon yi e Araba Azmavɛt yi e Bahurim

³²Eliyaba yi e Shaalbɔn nèy Yashɛn

³³Yɔnatan Shama yi e Harar Ahiyam Sharar yi e Harar Ɛlifɛlɛt Ahasbai yi e Maaka

³⁴Ɛliyam Ahitɔfɛl yi e Gilo

³⁵Hɛzrɔ yi e Karmɛl Parai yi e Arap

³⁶Igal Natan yi e Zoba Bani yi e Gat

³⁷Zɛlɛk yi e Amɔn Naharai yi e Bɛɛrɔt, mwât vɔk pyɛ̂ comô Yowap

³⁸Ira na Garep yi e Yatir Uriya WoHiti

³⁹Mwa besugâ como vane mo ba sé kuru batat na vɛ betaama.