Read berom 2 Samwɛl 24 Bible Online

2 Samwɛl 24 - berom bible

2 Samwɛl 24

¹Dagwi Darwey a to tɛ̀ shom na BeIsrayɛl. Yaga ano, a cuga Davit e ra yɛn wɔgɔ, a wɔ̀ bara bemat de ba vey tô como e ji BeIsrayɛl na BeYuda.

²Ano kwong, gbɔng gwɔ̀m a hwo nɔ̂ng Yowap, mwât nuyêl bemât como nu, a tɛ̀ be yel e ji yerê Israyɛl e bebak vwel mɛn yi e bak womo vɔk e neyɛnɛ woro, na be bara bemat o mwa, wɔgɔ, yɛ e simo na a tɔk nepyak bemat o.

³Yowap a hwo toyo a yɛ na ha, a ye, “A da gbɔng gwɔ̀m, tik na Dagwi Darwey, Dagwi mō, a tɛ̀ BeIsrayɛl be gwɛ̌ hɛn zang naga be dal pyɛ de ba sé, tik na hwo to wul jeng o na hwo di pyɛ de Dagwi ê ra! Ko e sɛ́ de ya tɛ̀ gbɔng gwɔ̀m e simo a ra ano ɛ?”

⁴Ko gbɔng gwɔ̀m a kyɛ́ ɛ nà wok hâ Yowap na bwâng bemât nuyêl como, a tɛ̀ ɛn gbing-gbing, be bara bemat o. Ano kwong, yɛn a sogo yi e nuyel gbɔng gwɔ̀m, ba wɔ̀ hwo bara BeIsrayɛl.

⁵Yɛn a ye dɔ a Rɔt Yɔrdan, yɛn a pɛrɛ bara mo e repomô Arower tanga remo de ra sé e tê nɛk, ba pere mɛ vwêl yerê Gat wɔ̂ wul mɛ Yazɛr.

⁶Ba kyè vɔk e Gileyat na Kadɛsh e vwêl BeHiti, ba kwey vɔk e Dan-Yaan, ko ba pere wɔ̀ wul mɛ Sidɔn.

⁷Yi e hwomo ba kwey mɛ rwa batin vɔk e repomô dal hê Tur na vɔk e mwa bapomô BeHivi tanga BeKanaan. E yɛnɛ mo yɛn a wɔ́ wul Bɛɛr-Sheba e rwa batîn vwêl yerê Yuda.

⁸E bama de ba kyě kyè e neyɛnɛ vwel o mwa pɛl shatat na nepɔlɔ kuru baba, ba toyo hɛn vey e Yɛrusalɛm.

⁹Yowap a nɔ̂ng gbɔng gwɔ̀m nepyak bemat de ba vey tô como e ji BeIsrayɛl gu naga batungun (500,000).

¹⁰E bama de Davit a ga sɛ̀ nepyak bemat o, yey mɛ ya dyɛng wɛt. A yâng Dagwi Darwey, “Ma ga ra fwôm netɔ̌n.”

¹¹Dagwi Darwey a ha na Gat, zarap mɛ de e vos a Davit badu a yang ɛ, “Kyè wɔ̀ ha na Davit, ma sé nɔng ɛ pyɛ́ tyat na a kasa jining e ji mo, kayɛ mo de a kasa, mê ra a yɛ yɛ̀.” Bop nagasi, jeng de Davit a nusu,

¹³Gat a wɔ́ na yɛ, a ha a yɛ pyɛ de Dagwi Darwey a ha, ko a rangal hɛ, a ye, “Hwó simo na vyong ye hwo e vwel mō neshey netat, kɛ hwô tele yi e nuyel bemât repugu mō pɛl tat, kɛ tumbang wo hwo e ra vwel mō pɔlɔ tat ɛ? Bare e ji yey mo a remo, na hwo ha a me pyɛ de mê toyo a Dagwi Darwey de a tomo me?”

¹⁴Davit a ye, “Yaa kukuuk! Ma ga yel e gwazɛrɛk! Nduga me gaba e vwɔ̂ Dagwi Darwey e negya, yaga yɛ a sé wo nemwishish, ko me simo me gaba e vwɔ̂ bemat wɛt.”

¹⁵Dagwi Darwey kwong a tomo na tumbang e ra BeIsrayɛl yi e nagasi mo vɔk e jeng de yɛ pyɛ mɛ a kasa. Bemat gu kuru bataama (70,000) yi e yɛnɛ bak vwel hemo vɔk e here ba kushu.

¹⁶Jeng de tom-lagwî Dagwi Darwey a sé kyè wɔ̀ wey na Yɛrusalɛm, Dagwi Darwey a ye mwishish, a yang ɛ, “Tik ano! Hane ha ga vey!” Tom o a sè bagat na gazu de wa sé wo Arauna WoYebus.

¹⁷Davit a di tom-lagwi o de a sé wey na bemat, ko a yâng Dagwi Darwey, “E me wɛ a mwât nɛn o. E me de ma buru. Bemat vemo ba ga ra sɛ́ ɛ? Tabak me na belɔ hom zɔng.”

¹⁸Tuk hining hane mo, Gat a toyo wɔ̄ na Davit a yang ɛ, “Tūt vɔk e gazû Arauna, na hwo lɔk a Dagwi Darwey gàgbang rangâs yas.”

¹⁹Davit kwong a tút tyɛng na pyɛ de Dagwi Darwey a nɔ̂ng Gat nu.

²⁰Jeng de Arauna a doyo a di gbɔng gwɔ̀m tanga bemat mɛ, a hwo wɔ̀ séy ɛn e gwong, a gaba e cat bol gbɔng gwɔ̀m.

²¹A ye, “Neken mō ne ros! Ala, à darwey ɛ?” Davit a yang ɛ, “Me simo me sey gazu mō, na me lɔk a Dagwi Darwey gàgbang rangâs yas, yaga na be tɛ̀ kwɔ̂k tumbang womo de wa hwo.”

²²Arauna a yang ɛ, “À da, vɔk gazu mo, na hwo nára a Dagwi Darwey. Di berɔndɔng betat à vemo, jut vɛ, na hwo nára mɛ nɔrɔ e ra gàgbang rangas o, jut cɔ́gɔt dâk pyɛ̂ gazu tanga sesêk vɔk berɔndɔng o na be té mɛ pyɛ̂ kya mo.

²³À da, ma nɔng o pyɛ́ yane mwa.” A to yang ɛ, “Tik na Dagwi Darwey, Dagwi mō, a sey nɔrɔ mō.”

²⁴Ko gbɔng gwɔ̀m o a yang ɛ, “Wěy, wey, ma rɔda tala hwo mwa nepyak dyām de wa kaba naka. Ma rɔda nára a Dagwi Darwey nɔrɔ̂ pyɛ̂ rangas de ba nɔng me e nɔrɔ wɛt.” Ano kwong, a sey kwɔ̂n gazu mo na berɔndɔng o e nû shɛkɛl dyām pyɛng kuru batungun (50).

²⁵Ko a lɔk ɛ gàgbang rangas yas vɔk na Dagwi. A nása ɛ nenɔrɔ̂ rangas burang tanga nè wunâ nesa. Dagwi Darwey kwong a sey won mɛ e ra vwel mɛ, ko tumbang o wa vɛ̌ tumal.