Read berom 2 Samwɛl 3 Bible Online

2 Samwɛl 3 - berom bible

2 Samwɛl 3

¹Ba sǎ e de tô como e tê bemât bak Saul tanga bemât bak Davit, bá ros ɛ. Bak o wo Davit wa gwɛsɛ gap, ko wo Saul wa toros hɛ gbɛrɛk.

²Bazâ nèy bewen netyiimin de ba tɔs a Davit e Hɛbrɔn a vemo: Amnɔn de a tɔ na Abinowam, hwông BeYɛzrɛɛl, Kileyap de a tɔ na Abigɛl, hwâ kwɔ̌ Nabal wo Karmɛl, Absalɔm de a tɔ na Maaka, hwông Talmai, gwɔ̀m Gɛshur,

⁴Adoniya de a tɔ na Hagit, Shefatiya de a tɔ na Abital,

⁵Tanga Itireyam de a tɔ na Ɛkla. Mwa nèy nane ba tɔs a Davit nɛ e Hɛbrɔn.

⁶Jeng de bá rɔ̌ tó como e tê bemât bak Saul tanga vê bak Davit, Abnɛr á sè gwɛ̌ sɛ̀ gap e lɔ Saul.

⁷Di, Saul á vɔk jɛn-hwā hwak de ba tang ɛ a Rispa, hwông Aya. Tuhak, Ishbɔshɛt a hwo yâng Abnɛr, “Yaga sɛ́ de hwà dyɛng na jɛn-hwâ da hom ɛ?”

⁸Abnɛr a tɛ̀ shom sizɔng, yaga pyɛ de Ishbɔshɛt a ha a yɛ, ko a toyo a yɛ, a yang ɛ, “Hwà tē, ma sé mwât fanang de a wuna nu na BeYuda arɛt? Vēy e tuk hemo, ma raa lɔ da mō Saul mwa na belɔ mɛ tanga besa mɛ arɔng. Ma ga dul o nà gaba e vwɔ̂ Davit e negya. Ko di yunung kwong kē, hwà sé reme me na hwā womo.

⁹Dagwi Darwey a ga kana sira a Davit wɔgɔ, ê jut negwɔm yi e lɔ Saul na yére mɛ, ko ê tɛ̀ Davit a se gbɔng gwɔ̀m Israyɛl mwa na Yuda, e ra mwa sevwel o yi e Dan vɔk e Bɛɛr-Sheba. Tik na Dagwi a wey na me, ka sede ma tɛ̀ pyɛ mó ye tɛ́ ɛ mwin wɛt.”

¹¹Ishbɔshɛt a kyɛm a tɔk to hanat a Abnɛr pyɛ cak wɛt, yaga e wok bengyip mɛ.

¹²Abnɛr a pere tomo betom vɔk na Davit e Hɛbrɔn a yang ɛ, “E wa de ê re negwɔm e ra vwel hemo arɛt? Di, yong ɛ̀ na me, ko ma rɔda sɛlɛ hwo na hwo re vwêl Israyɛl, he tɛ́ ɛ mo.”

¹³Ano kwong Davit a yang ɛ, “A jam ano, ma rɔda yong ɛ̀ na hwo. Ko pyɛ jining de me simo na hwo a yet: Hwo kyè vey na me wɛt, sɛ̌ hwà vɔk a me ɛ hwā hom Mikal, hwông Saul.”

¹⁴Ko Davit a tomo betom vɔk na Ishbɔshɛt Saul arɔng, a yang ɛ, “Toyo a me na hwā hom Mikal, de ma tala yas mɛ na bahwô bedulûs BeFilisti naga.”

¹⁵Ano kwong, Ishbɔshɛt a nɔng nu be wɔ̀ jut ɛ yi e lɔ rwas mɛ Paltiyɛl Layish.

¹⁶Rwas o a kyè na yɛ, a kyě tosho a raa hɛ vey e Bahurim. Ko Abnɛr a yang ɛ, “Toyo hwo vɔk e lɔ”, a vɛ̌ toyo hɛ.

¹⁷Abnɛr a wɔ na bemakûk Israyɛl, a yang ɛn, “Yin á kana simo yimo na Davit a tɛ́ ɛ gwɔ̀m min.

¹⁸Jeng a yemo kē! Bare hin, Dagwi Darwey a ga kana sira, a rɔda ra fwom na sam mɛ Davit, na a bin sey bemat mɛ BeIsrayɛl yi e vwɔ̂ BeFilisti, tanga yi e vwɔ mwa bemât repugu mɛn.”

¹⁹Ko Abnɛr a wɔ̀ ha a BeBɛnyamin arɔng. E bama mo, a pere wɔ̀ ha a Davit e Hɛbrɔn pyɛ de BeIsrayɛl na mwa BeBɛnyamin ba yong ɛ na be ra.

²⁰Jeng de Abnɛr na bemat kuru baba de ba sé na yɛ ba wɔ̀ wul na Davit e Hɛbrɔn, Davit kwong a yong pyɛ̂ nzem yaga yɛn.

²¹Ano kwong, Abnɛr a hwo yâng Davit, “Mê sogo a remo, na me wɔ̀ tula a hwo mwa BeIsrayɛl, à darwey hom gbɔng gwɔ̀m, na yɛn a yong ɛ na hwo, yaga na hwo bin re negwɔm e ra yɛn sede remo de yey mō ye simo.” Ano, Davit a tɛ̀ Abnɛr e gwong, ko a kyè tyang.

²²Bamâ jeng tyɔng, Yowap tanga bemât Davit ba toyo yî jugu, ko ba vey na pyɛ́ pyak de ba hashe e de jugu mo.

²³Jeng de ba pom, ko ba ha a Yowap wɔgɔ, Abnɛr Nɛr a ga kana vey na gbɔng gwɔ̀m, ko gbɔng gwɔ̀m o a ga tɛ̀ ɛ e gwong, ko a ga kyè tyang.

²⁴Ano kwong, Yowap a pere wɔ̀ sɛ̀ Davit, ko a yang ɛ, “E sɛ́ à yane de hwà ga ra arɛt? Di, Abnɛr a ga vey e ngamo na hwo, ko yaga sɛ́ de hwà tik ɛ a kyè ɛ?

²⁵Hwà tɔk Abnɛr Nɛr, a vey kwɛlɛng hwo zɔng, yaga na a bɛrɛng begwong de hwó kweres ɛ, na a tɔk nezɛɛt pyɛ́ de hwó ra.”

²⁶Yowap kwong a nusu yi na Davit, a tomo betom be raa Abnɛr, ba wɔ̀ toyo na yɛ yi e hwês Sira, ko Davit a ka tɔk wɛt.

²⁷Jeng de Abnɛr a pom e Hɛbrɔn, Yowap a jut ɛ wɔ e bak gwining e rwi repomo, sede ê ha na yɛ yaang e hagat, ko a vɛ̌ luga hɛ e jim. Ano de a mɔrɔ Abnɛr yaga á kana mɔrɔ Asahɛl, gwa mɛ.

²⁸Jeng de Davit a wok ha mo, ko a ye, “Dagwi Darwey a tɔk me tanga bemat hom vɔ mot ba sé e ji rekû Abnɛr Nɛr ko tyɔng wɛt.

²⁹Tik na renɛn rane re sè e ratô Yowap tanga mwa belɔ mɛ! Be kwon bidɛ mwât serɔ de pyɛ́ mɛ ye nunus na nshi riishish, kɛ mwât sekwa, kɛ mwat de e kyè mùndang na a tē yìk na gwele, kɛ vyong wɛt, kɛ ba-sinang he gas ɛ na lɔ mo arɔng wɛt.”

³⁰Ano de Yowap tanga gwà mɛ Abishai ba mɔrɔ Abnɛr, yaga a kana mɔrɔ gwà mɛn swɛl o, Asahɛl e de como e Gibɛyɔn.

³¹E bama mo, Davit a nɔ̂ng Yowap tanga bemat de ba sé na yɛ nu, be hama berugu mɛn, be tɛ̀sɛ berugû sesin, na be tosho mɛ̀ Abnɛr. Ko yɛ gbɔng gwɔ̀m pyɛ mɛ a raa revin o wɔ e kwɔ̂n lɛrɛ mo.

³²Ba lɛrɛ Abnɛr e Hɛbrɔn, ko Davit a tosho sesîn Abnɛr rɛng-rɛng e nû sak, ko mwa bemat ba tosho arɔng.

³³Ko a tɛ̀ lwɛlɛ̂ sesin gwomo ngan e ra Abnɛr: “Yaga sɛ́ de Abnɛr a ku sede tɔn ɛ?

³⁴Ba rɔgɔs a yɛ vɔ mɛ wɛt, ba tɛ̀ a yɛ ngyang e bol wɛt. Hwà gaba sede mwat de a gaba e vɔ bemât nengyas.” Ko mwa bemat ba gwɛ̌ tosho e ra yɛ.

³⁵Ano arɔng, yɛn mwa ba vey shonong e ra Davit na a re pyɛ cak. Ko yaga gwi gwa sè rɔngɔl ɛ̀, Davit a ye, “Tik na Dagwi a wey na me, ka sede ma tɛ̀ kpam-tuk kɛ pyɛ cak ayi e nu gyam na gwi gwo hwo ɛ.”

³⁶Mwa bemat o ba di pyɛ de a ra, ko a jam a yɛn mwin, yɛn a vɔk yey pyɛng na kayɛ pyɛ de gbɔng gwɔ̀m o a ra.

³⁷Tuk hane, mwa bemât Davit tanga BeIsrayɛl mwa ba tɔk, pyɛ gbɔng gwɔ̀m ya sé e mɔrɔ̂ Abnɛr Nɛr wɛt.

³⁸Ko Davit a yâng bemât badu mɛ, “Yin a tɔk, a sé e gbɔng mwat de a ga gaba e ji Israyɛl yunung wɛt a?

³⁹Mwa ano de ma sé gbɔng gwɔ̀m de Dagwi a kasa, ma ga tɛ́ me gbɛrɛk, ko nèy Zɛruya nemo na sé a me hàs. Tik na Dagwi Darwey a tala vê nengyas tyɛng na pyɛ́ vyes mɛn!”