Read berom 2 Samwɛl 4 Bible Online

2 Samwɛl 4 - berom bible

2 Samwɛl 4

¹Sede Ishbɔshɛt Saul a wok, Abnɛr a ga ku e Hɛbrɔn, nemi na gaba a yɛ e yey, ko mwa BeIsrayɛl ba tɛ̀ bengyip.

²Ishbɔshɛt o á vɔk bemat beba de ba sé bemât nuyêl bagyɛng bemât jugu mɛ. Yɛn vɛ a Baana tanga Rekap. Yɛn a sé nèy Rimɔn yi e Bɛɛrɔt e vwêl yerê Bɛnyamin, yaga ba tɛ̀ Bɛɛrɔt e ji sevwêl Bɛnyamin.

³Bemât Bɛɛrɔt bà kana tele vɔk e Gitayim, ko ba sangal e hwomo sede bekyɛn vey e yunung.

⁴Yɔnatan Saul á vɔk hwey wen de ba tang hɛ a Mɛfibɔshɛt. Há vɔk neshey netungun e jeng de ba mɔrɔ beda mɛ Saul na Yɔnatan. Jeng de ba yi na reha mo yi e Yɛzrɛɛl, ko lwêk hɛ á vɛ̌ jut hɛ, a tele mɛ. Yaga a tele ding-ding, ha pere wɔ hywit ɛ, ha gaba, ko ha tɛ́ ɛ guruk.

⁵A vane ano, Rekap tanga Baana ba nára hɛn vɔk e lɔ Ishbɔshɛt, ko yɛn a wɔ̀ wul e tê-gwi, e jeng de a sé pɔnglɔ.

⁶Yɛn a yel e ji lɔ mo, sede ba sé kyè wɔ jama alkama. Ba sɛ Ishbɔshɛt e dyɛngɛ e ra gwat e duk pɔlɔ mɛ, ko ba vɛ̌ luga hɛ e jim, ba mɔrɔ hɛ, ko ba pat to mo, ba kyè mɛ. Ba re mɛ turuk, ba kwey mɛ e nɛk Rɔt Yɔrdan.

⁸Yɛn a vey mɛ na Davit e Hɛbrɔn, ko ba yang gbɔng gwɔ̀m o, “Nā tô Ishbɔshɛt, hwey mwât repugu mo Saul, de a kana jama na a wey na hwo. Di, yunung Dagwi Darwey a ga simo a hwo, à darwey mot, na hwo tala Saul na cáng mɛ pyɔ̌n mɛn.”

⁹Davit a toyo a yɛn, a ye, “Ma sira me na Dagwi Darwey, de a sey me yi e karɛ reyɔm!

¹⁰Jeng de mwat hwak á kana vey ha a me e Ziklak rehâ rekû Saul, á bare, a sé vey na yɛgɛ̂t yey pyɛng, ko má tɛ̀ ba vo ɛ, ba mɔrɔ hɛ. Pyɔ̌n a yane de ma nɔng ɛ yaga yɛgɛt mɛ mo!”

¹¹E rɛ̌ e negya jeng de bemât nengyas ba wɔ̀ mɔrɔ mwat rwat e ji lɔ mɛ, e ra gwât dyɛngɛ mɛ ɛ̀. Ma rɔda tala pyɔ̌n nemi mɛ e ra yin, na me gas in na jey!

¹²Ano kwong, Davit a nɔ̂ng bemat mɛ nu, ko ba mɔbɔs Baana na Rekap o. Ba kpɔgɔm vɔ tanga bol mɛn, ko ba rɔgɔs babek mɛn rerɛgɛ e vwâ kadung e Hɛbrɔn. Ko ba jut ratô Ishbɔshɛt, ba wɔ̀ lɛrɛ e ji sak Abnɛr e Hɛbrɔn.