Read berom 2 Samwɛl 5 Bible Online

2 Samwɛl 5 - berom bible

2 Samwɛl 5

¹Yére Israyɛl mwa ya vey na Davit e Hɛbrɔn, ya yang ɛ, “Di, wot a sé nemi mō.

²Yimo jeng de Saul á sè re negwɔm e ra wot, e hwo wɛ hwá sè mwât nuyêl BeIsrayɛl e de como, ko Dagwi Darwey á ha a hwo, hwà rɔda sè lwêk bemat mɛ BeIsrayɛl, ko hwà rɔda re negwɔm e ra yɛn.”

³Ano kwong, bemakûk Israyɛl mwa ba vey na Davit e Hɛbrɔn, ko yɛ gbɔng gwɔ̀m o a wuna hɛ na sira na yɛn e nuyêl Dagwi Darwey e hwomo. Yɛn arɔng ba shushu hɛ na něy, na a tɛ́ ɛ gbɔng gwɔ̀m e ra BeIsrayɛl.

⁴Davit á vɔk neshey kuru batat jeng de á hwo re negwɔm, ko á tɛ̀ neshey kuru banaas e de rê negwɔm o.

⁵A re negwɔm e ra yerê Yuda neshey netaama na pɛl tyiimin e Hɛbrɔn, ko a re negwɔm e ra BeIsrayɛl mwa tanga BeYuda neshey kuru batat na nɛ netat e Yɛrusalɛm.

⁶A vane ano, gbɔng gwɔ̀m Davit tanga bemat mɛ ba nára hɛn vɔk e Yɛrusalɛm. E jeng yane, BeYebus ba sé na sangal e repomo mo. Yɛn a bare, Davit ê tɔk yel e hwomo wɛt, ko yɛn a yang ɛ, “Hwô kyɛm hwo yel e ngamo ko tyɔng wɛt! Ka bebók na begúruk bemat zɔng ba vey na be ró o e jey!”

⁷Ko Davit a yâng bemat mɛ tuk hane, “Kawɛ de ê wɔ̀ re BeYebus na como, tik na a tut yi e lwel nshi de gwa sé e nɛn vwel. Káa, ma kyɛ́ me bebók na begúruk bemat vane tyɔng wɛt!” Yaga ano, de be ye, “Bebók tanga begúruk bemat be tɔk yel e Gbɔng Duk Re Fongol wɛt.” Gwong a gwane de Davit a tɔk re repomo mo de ba gwɔrɔ na jwâ-pomo, ra sè e rahwôl Siyɔn. A vɛ̌ tɛ̀ rɛ re tɛ́ ɛ gbɔng repomo mɛ, ko a yishi rɛ a gbɔng repomô Davit. A gwɛ jwâ-pomo mo ɛ̀ gap na lɔk, a pɛrɛ yi e Milo vɔk e nuyel.

¹⁰Davit kwong a gwɛsɛ gap yaga Dagwi Darwey, Da Jey Mwa a sè tanga yɛ.

¹¹Hiram, gbɔng gwɔ̀m Tur, a tomo a Davit betom. Yɛn a vɔk ɛ bagâp cɔ́gɔt sida de ba ga yɛt, ko bemât fwôm cɔ́gɔt tanga bemât lɔ̂k beduk na beta ba sè tanga yɛn arɔng. Yɛn a lɔk a Davit lɔ gbɔng gwɔ̀m.

¹²Ano kwong, Davit a tɔk, Dagwi Darwey a ga tɛ̀ ɛ a sè gbɔng gwɔ̀m e ra BeIsrayɛl, ko a ga to tɛ̀ segwɔm mɛ sē vɔk nerey ding-ding. Dagwi Darwey a ra ano, yaga a tɛ̀ yey na bemat mɛ BeIsrayɛl.

¹³Bama de Davit a hala Hɛbrɔn wɛrɛ e Yɛrusalɛm, a to gwɛ̌ vos bejɛn-beha, tanga behâ weneng, ko ba gwɛ̌ tɔs a yɛ nèy bewen na behwong arɔng.

¹⁴Bazâ nèy bewen de ba tɔs a yɛ e Yɛrusalɛm a vemo ngan: Shamuwa, na Shobap, na Natan, na Sɔlɔmɔn,

¹⁵na Ibhar, na Ɛlishuwa, na Nɛfɛk, na Yafiya,

¹⁶na Ɛlishama, na Ɛliyada tanga Ɛlifɛlɛt.

¹⁷BeFilisti ba wok, ba ga kasa Davit na a tɛ́ ɛ gbɔng gwɔ̀m e ra BeIsrayɛl mwa, yɛn a tomo bemât como mɛn mwa wɔ̀ jama hɛ, na be vo ɛ. Ko Davit a wok ha mo, a vɛ̌ wɔ̀ lɛrɛ hɛ e kwɔ̂n dál hak.

¹⁸Jeng de BeFilisti ba pom, ba vɛ̌ shara hɛn e nɛk Rɛfayim.

¹⁹Davit kwong a rangâl Dagwi Darwey, a ye, “Me kyè wɔ̂ como na BeFilisti a? Hwà rɔda nɔng me wɛng e ra yɛn a?” Dagwi Darwey a ye, “Ci, ma rɔda nɔng o wɛng e ra yɛn!”

²⁰Ano kwong, Davit a nusu, a di wɛng a re BeFilisti, ko a ye, “Dagwi Darwey a vugu bemât repugu hom e nuyel hom, sede remo tɛmɛ-nshi wo vugu gwong.” Yaga ano, ba vo a kwɔn o rezâ Baal Pɛrazim wɔgɔ, Darwêy Vugu.

²¹BeFilisti ba tele, ba hala pyɛ̂ sekwit mɛn e hwomo, ko Davit tanga bemat mɛ ba vɔk ba hashe yɛ, ba kyè mɛ.

²²E bamâ jeng cak, BeFilisti mo ba to wɔ shara hɛn e nɛk Rɛfayim.

²³Ko Davit a to rangâl Dagwi Darwey. Ko Dagwi Darwey a yang ɛ, “Hwo kwon wɔ̀ man ragey na yɛn wɛt. Gwɔrɔ e bama mɛn, na hwo wɔ̀ hwo ɛn e bak batîn cɔ́gɔt dɔ́m.

²⁴Jeng de hwà wok wus e ra cɔ́gɔt o sede wûs kwɛngɛl, ko hwo ye kyùk-kyuk, hwo hwo e ra yɛn, yaga hane hê dura, ma ga sey yel min, na me re BeFilisti mo.”

²⁵Davit kwong a ra tyɛng na pyɛ de Dagwi Darwey a ga nɔng ɛ nu, ko a re BeFilisti mo, a ro ɛn yi e Gibɛyɔn pere vɔk e Gɛzɛr.