Read berom 2 Samwɛl 6 Bible Online

2 Samwɛl 6 - berom bible

2 Samwɛl 6

¹Davit kwong a to hwo tula besugâ como Israyɛl de nepyak vɛ na wul gu kuru batat (30,000).

²Yɛ na bemat mɛ mo ba sogo, ba kyè vɔk e Baala e vwêl Yuda, na yɛn a wɔ̀ jut mɛ Kundung Wuna-na-Sirâ Dagwi vey mɛ e Yɛrusalɛm. Ba yishi gwɛ na rezâ Dagwi Darwey, Da Jey Mwa, de kwɔ̂n sangal mɛ ha sé e ra pyɛ́ cɛn de ba tâng yɛ à Kɛrup.

³E jeng yane gwa sè e lɔ Abinadap de ha sé e rahwol. Ba jut ba tɛ̀ gwɛ e ra kyɛkyɛ̂ berɔndɔng pwas. Ko Uza tanga gwà mɛ Ahiyo, nèy Abinadap, ba kyě gyeng kyɛkyɛ mo. Ahiyo a sè kyè e yêl gwɛ.

⁵Davit kwong tanga mwa BeIsrayɛl ba rɛ̌ na gap mɛn mwa, na be nɔ̂ng Dagwi Darwey nerey, ba ra lɛlɛ na yōm kwo, na yōm shǐ na bebing tanga begwák.

⁶Jeng de yɛn a vey wul gazû Nakɔn, berɔndɔng o ba tiri bol, ko Uza a vɛ̌ nára vwɔ mɛ, a kaba mɛ kundung o.

⁷Dagwi Darwey a tɛ̀ shom na Uza, yaga a nɔng ɛ nerey wɛt, ko a mɔrɔ hɛ. Uza à vɔk a ku e hagât Kundung Wuna-na-Sirâ Dagwi o.

⁸Davit kwong a wok shom de Dagwi Darwey a pat shom e ra Uza, ko pere vey e yunung ba tâng kwɔn o à Pɛrɛs-Uza.

⁹Davit a vo bengyip Dagwi Darwey tuk hane, ko a ye, “E rɛ̌ de Kundung Wuna-na-Sirâ Dagwi gwô vey na me ɛ?”

¹⁰Yaga ano, a yong ɛ̀, na a jut gwɛ, na gwo sè na yɛ e gbɔng repomô Davit wɛt, ko a kwey mɛ wɔ e lɔ Ɔbɛt-Ɛdɔm wo repomo Gat e negya.

¹¹Kundung o gwa nàra e hwomo pɛl tat. Ko Dagwi Darwey a tɛ̀ a Ɔbɛt-Ɛdɔm nerat, mwa na belɔ mɛ.

¹²Jeng de gbɔng gwɔ̀m Davit a wok, Dagwi Darwey a ga tɛ̀ a belɔ Ɔbɛt-Ɛdɔm tanga pyɛ́ mwa de a vɔk nerat yaga Kundung Wuna-na-Sira mo, a vɛ̌ wɔ̀ jut gwɛ yi e lɔ Ɔbɛt-Ɛdɔm o, a vey mɛ e Yɛrusalɛm na gbɔng nzem yey pyɛng.

¹³Jeng de bemât jût kundung o ba bɔrɔ zang tyiimin zɔng, ko Davit a tɛ̀ ɛn be tumal na a nára nɔrɔ̂ yas de be yɛt vɔk na Dagwi hê mus rɔndɔng tanga hwey o de ha mɔsɔ naka.

¹⁴Bama mo, ba to sogo kwɛngɛl, ko Davit a rɔgɔs rugû linen pwɛng e rawit mɛ zɔng, a rɛ̌ mɛ na gap mɛ mwa, na a nɔ̂ng Dagwi Darwey mɛ nerey.

¹⁵Ano kwong, yɛ tanga mwa BeIsrayɛl ba vey wul na Kundung Wuna-na-Sirâ Dagwi na mok tanga pɛsɛ̂l bedurum.

¹⁶Jeng de ba sé yel na kundung o e ji gbɔng repomô Davit, ko hwā mɛ Mikal, hwông Saul, a ye byak e repɔk duk, ko a di gbɔng gwɔ̀m Davit a sé tē lōm, a sé rɛ̌ e nuyêl Dagwi Darwey, ko a vɛ̌ byɛs ɛ e yey mɛ.

¹⁷Ba vey na kundung o, ba yel mɛ e ji buk de Davit a ga kana yong, ba tɛ̀ gwɛ gyat e kwɔn de ba ga kana yong yaga gwɛ. Davit kwong a nára nenɔrɔ̂ yas de be rangas burang tanga nenɔrɔ wunâ nesa vɔk na Dagwi Darwey.

¹⁸Bama de a ga yɛnɛ nása nenɔrɔ mo, ko a vɛ̌ tɛ̀ nerat e ra bemat e ji rezâ Dagwi Darwey, Da Jey Mwa.

¹⁹Ko a nɔ̂ng kawɛ e ji bemât Israyɛl, beras na beha, kpam-tuk bagasak gwining, na cung namâ rangas.

²⁰Sede Davit a toyo vɔk e lɔ, na a tɛ̀ a belɔ mɛ netyang, ko Mikal a nusu wɔ̀ man na yɛ, a ye, “Kée kàa! Di gbɔng gwɔ̀m Israyɛl de a nɔ̂ng tó mɛ nerey yunung! A hywɛrɛm hɛ e nuyêl behwông fwom nelɔ bemât fwom mɛ, sede remo de betɔn be ra!”

²¹Davit a toyo a yɛ, a ye, “Ma rɛ̌ na me nɔ̂ng Dagwi Darwey nerey. E yɛ de a kasa me e tô da mo kɛ hwak yi e cang mɛ, ko a tɛ̀, me re negwɔm e ra bemat mɛ BeIsrayɛl. Ma rɔda re nuyel na rɛ̌ e nuyêl Dagwi Darwey,

²²ma rɔda gwɛ̌ tɛ̀ to hom, na me sè pyɛ byɛs de ya dal ano. Ey, ma rɔda sè pyɛ byɛs e bayis mō, ko e bayîs behwong vemo de hwà ha e ra yɛn, yɛn a rɔda nɔng me nerey!”

²³Mikal, hwông Saul, a sang tɔ̀ hwey wɛt vɔk e reku mɛ.