Read berom 2 Samwɛl 7 Bible Online

2 Samwɛl 7 - berom bible

2 Samwɛl 7

¹Gbɔng gwɔ̀m Davit a ga sɛ̀ sangal tɛk e ji lɔ rey mɛ, ko Dagwi Darwey a ga dul ɛ yi na bemât repugu de ba gwɔrɔ hɛ.

²Tuhak, a hwo yâng Natan, zarap Dagwi, “Di, me à womo ma sé sangal e ji lɔ rey de ba yong na cɔ́gɔt sida ryat o, ko Kundung Wuna-na-Sirâ Dagwi gwa sé e ji buk. A sé naka ano a?”

³Ko Natan a toyo a yɛ, a yang ɛ, “Kayɛ pyɛ de hwà di ya jam a hwo e yey mō, ci ra yɛ, yaga Dagwi Darwey a sé tanga hwo.”

⁴Ko e ji nabwalak nane, Dagwi Darwey a ha na Natan, a ye,

⁵“Ci wɔ̀ yâng mwat hom Davit, ma ye ngan: ‘E hwo wɛ de hwà rɔda lɔk a me lɔ de mê sangal e ji mo wɛt.

⁶Yimo de má pat BeIsrayɛl yi e Misra vey e yunung, ma ga sang sangal e lɔ de ba lɔk wɛt. Ma sé kyě kyè e ji buk zɔng, e gwɛ à kwɔ̂n sangal hom.

⁷Mwa kwɛngɛl de ma kyě kyè taga bemât Israyɛl, ma ga sang rangâl hwak e ji bemât nuyel mɛn vemo de ma tɛ̀, be sè belêk bemat hom wɔgɔ, yaga sɛ́ de yɛn a ga lɔk a me duk rwat de ba yong na cɔ́gɔt sida wɛt a?’

⁸“Di kwong, há a mwat hom Davit, me, Dagwi Darwey, Da Jey Mwa, ma ye ngan: ‘Ma jut o yi e hey e de gyêng vyēl, na me tɛ̀ o hwo tɛ́ o mwât nuyel e ra bemat hom BeIsrayɛl.

⁹Ma ga sè tanga hwo e kahɛ kwɔn de hwà wɔ́ ɛ, ma ga to ro a hwo bemât repugu mō yi e nuyel mō. Ko di, ma rɔda to tɛ̀, hwo sɛ̀ gbɔng reza tyɛng na begbɔng bemât nuyel vê jey.

¹⁰Ma ga nɔ̂ng bemat hom BeIsrayɛl kwɔ̂n sangal hê tó mɛn, ko ma tik ɛn e hɛ̄, yaga na be sangal ɛ, ko vit a mwat de a rɔda tɔk to shìsa hɛn ɛ. Bemât nengyas bê to tak a yɛn reyɔm sede raane,

¹¹jeng de ma tɛ̀sɛ bemât nuyel e ra yɛn wɛt. Ma rɔda dul o yi na bemât repugu mō mwa. Ko ma rɔda lɔk lɔ mō.

¹²Jeng de nepɔlɔ mō na ga sila hɛn, ko hwô wɔ sɛ̀ bedabeda mō, ma rɔda tɛ̀ hak e ji nèy mō na he re negwɔm, ko ma rɔda tɛ̀ negwɔm mo ne sangal na gap.

¹³E yɛ wɛ de a rɔda lɔk a me lɔ, ko me ma rɔda tɛ̀ gwofwa negwɔm gwo nàra e lɔ mɛ gbak-gbak.

¹⁴Ma rɔda sè da mɛ, yɛ arɔng a rɔda sè hwey hom. Ka sede a ra renɛn, ko ma rɔda tabak hɛ, sede remo de da e tabak hwey mɛ.

¹⁵Ko ma rɔda tik nà tɛ̀ yey na yɛ wɛt, sede remo de ma ra na Saul, de ma pat ɛ na me nɔng o negwɔm o.

¹⁶Lɔ mō tanga segwɔm mō ba rɔda nàra nesheneshey. Gwofwa negwɔm mō gwa rɔda nàra e lɔ mō gbak-gbak arɔng.’ ”

¹⁷Ko Natan a ha a Davit mwa pyɛ́ de Dagwi Darwey a dura a yɛ.

¹⁸Ano kwong, gbɔng gwɔ̀m Davit a wɔ̀ yel e ji bûk sangâl Dagwi Darwey, a hwo ra won, a ye, “À Darwey Dagwi Darwey, ma sé wa, kɛ belɔ hom ba sé beva, de hwà ga ra a me pyɛ́ ryat yemo ano ɛ?”

¹⁹Ko à Darwey Dagwi Darwey, hwà to sé gwɛ̌ ra pyɛ de ya dal yane, hwà to ha e ra sangâl lɔ hom vɔk e nuyel arɔng. Ano de hwo dopse ra na bemasi a?

²⁰Bwâng sɛ́ de ma rɔda ha a hwo arɛt? Hwà tɔk me, sam mō, à Darwey Dagwi Darwey.

²¹A sé yaga hwà ga ha a me pyɛ yemo, ko yaga hwà tɛ̀ yey na me de hwà ra pyɛ ryey yemo, yaga na hwo basa a me mɛ.

²²Hwà sé gbɔng o ding-ding, à Darwey Dagwi Darwey! Vit a hwak de a sé sede hwo. Kayɛ pyɛ de wot a wok ye dura, vit a Dagwi sɛ̌ hwo.

²³Vit a yere cak e ji jey sede BeIsrayɛl arɔng. Hwà wɔ̀ viri vɛ yi e sesam, na be tɛ́ ɛn bemat mō. Yaga gbɔng pyɛ̂ bes de hwà ra yaga yɛn, reza mō ra ga karak e jey mwa. Hwà ró yére bemât jey na bedagwi mɛn yi e nuyêl bemat mō de hwà viri hɛn yi e Misra na be sè bemo.

²⁴Hwà ga tɛ̀ BeIsrayɛl be tɛ́ ɛn bemo mwin gbak-gbak, ko hwo arɔng, à Dagwi Darwey, hwà ga tɛ́ o Dagwi mɛn.

²⁵“A remo à Darwey Dagwi Darwey, gyeng ha de hwà ga sira a me tanga lɔ hom. Rá tyɛng na pyɛ de hwà ga ha, hwà rɔda ra.

²⁶Ano de reza mō ra rɔda karak, ko bemat bê tē, ‘Dagwi Darwey, Da Jey Mwa a sé Dagwi e ra BeIsrayɛl!’ Ko hwà rɔda tɛ̀ gwofwa negwɔm hom gwo nàra gbak-gbak.

²⁷A Dagwi Darwey, Da Jey Mwa, Dagwi wo BeIsrayɛl, hwà ga dura pyɛ́ yemo na me, hwà ye, hwà rɔda lɔk lɔ hom. Yaga ano de me, mwat mō, ma sɛ̀ yey ting, na me ra won hemo vey na hwo.

²⁸Di, à Darwey, hwo wɛ à Dagwi Darwey! Hwó gyeng ha mō kayɛ jeng, ko hwà ga nɔng me neha nerat mo.

²⁹A remo, ma sé ra won, tɛ̀ a lɔ hom nerat mō, ko tik na kayɛ jeng be sɛ̀ mwat e ji lɔ hom de a rɔda sangal e gwofwa negwɔm hom. E hwo à Darwey Dagwi Darwey de hwà ga ha, yaga ano, nerat mō na rɔda sangal e ra lɔ hom gbak-gbak.”