Read berom 2 Samwɛl 8 Bible Online

2 Samwɛl 8 - berom bible

2 Samwɛl 8

¹A vane ano, Davit a to wɔ̀ hwo e ra BeFilisti, a re ɛn na como, ko a yɛnɛ rê negwɔm mɛn e ra vwel o.

²Ano arɔng, a re BeMowap na como. A tɛ̀ ɛn be dyɛng gwarwang mɛn e vwel. A yong rwik a masa mɛ. Sede a mara na rwik o zang ba, ko a mɔbɔs hɛn, ko mara hê tat a tik ɛn beken. Yaga ano, BeMowap ba tɛ́ ɛn bepɛng mɛ, ko ba talsa hɛ pyɛ́ de ba tɛ̀ a yɛn.

³E bama mo, a re gbɔng gwɔ̀m Zoba, Rehop, na como, e jeng de a sé kyè wɔ e Gwɔrɔt Ɛifaratɛs, na a to wɔ̀ tɛ̀ retô negwɔm mɛ e hwomo.

⁴Davit a sey ɛ bemât bedwa mɛ gu kuru na vɛ bataama (17,000), tanga bemât bol gu kuru baba (20,000). A tik ɛ bedwa mo naga gwining (100) yaga hwɔlɔ̂ bekyɛkyɛ, ko ba yɛt a bwang o mo mwa vɛ badìng bol bama mɛn.

⁵Jeng de BeSirya yi e Damaskus ba wɔ̀ sɛlɛ Hadadɛzɛr na como mo, Davit a mɔbɔs bemât como gu kuru baba na vɛ baba (22,000) e ji vɛ.

⁶A tɛ̀sɛ bagyɛng bemât como mɛ, e ji bak vwel mɛn, ko BeSirya mo ba tɛ́ ɛn bepɛng mɛ, ko ba talsa hɛ pyɛ́ de ba tɛ̀ a yɛn. Dagwi Darwey a nɔ̂ng Davit wɛng e kahɛ kwɔn de a wɔ́ ɛ como.

⁷Davit kwong a jut beruga como vê dyam shinang de bemât nuyêl comô Hadadɛzɛr bá kana vɔk, ko a vey mɛ e Yɛrusalɛm.

⁸A to hashe dyam pama pyak sedesi yi e bapomô Bɛta, na Berotai, bapomo de ba sé vê Hadadɛzɛr.

⁹Sede Tɔyi, gbɔng gwɔ̀m Hamat, a wok, Davit a ga re mwa bemât comô Hadadɛzɛr na como,

¹⁰a tomo sɔ mɛ́ Yɔram vɔk na Gbɔng Gwɔ̀m Davit na a wɔ̀ kyul ɛ, na a yang ɛ show na yey pyɛng yaga wɛng de a di, yaga Hadadɛzɛr a ga dopse tó como na Tɔyi mo. Yɔram o a vɔk a Davit nɔrɔ̂ pyɛ́ detidetu de ba yong na dyam shinang, na dyam pyɛng tanga dyam pama.

¹¹Gbɔng Gwɔ̀m Davit kwong a tik a Dagwi Darwey nedirî pyɛ́ yemo mo jaram tyɛng sede remo de a ga kana ra na dyam pyɛng tanga dyam shinang de a ga kana hashe yi e yére mwa de a re yɛ e como,

¹²yɛ à BeƐdɔm, na BeMowap, na BeAmɔr, na BeFilisti, tanga BeAmalɛk. A to tik a Dagwi pyɛ́ de a hashe yi na gbɔng gwɔ̀m Zoba, Hadadɛzɛr Rehop, jaram arɔng.

¹³Jeng de Davit a toyo bama de a ga mɔbɔs BeƐdɔm gu kuru na vɛ gu rwit (18,000) e Nɛk Nevwashe, a gwɛ ra za tyɔng wɛt.

¹⁴A tɛ̀sɛ bagyɛng bemât como e yɛnɛ̂ sevwêl Ɛdɔm mwa. BeƐdɔm o ba tɛ́ ɛn bemât fwom mɛ. Dagwi Darwey a nɔ̂ng Davit o wɛng e kahɛ kwɔn de a wɔ́ ɛ como.

¹⁵Davit kwong a re negwɔm e ra BeIsrayɛl mwa. A ra a yɛn pyɛ́ de ya sé tyɛng na tsak o.

¹⁶Yowap de neng mɛ a Zɛruya, á sè mwât nuyêl bemât como, Yɛhɔshafat Ahilut á sè mwât jɛ̂k neha,

¹⁷Zadɔk Ahitup tanga Ahimɛlɛk Abiyatar bá sè bepiris, ko Seraya á sè mwât jɛk gbɔng gwɔ̀m.

¹⁸Bɛnaya Yɛhɔyada á sè mwât nuyêl bemât gyeng gbɔng gwɔ̀m, ko nèy Davit bewen o bá sè bepiris.